“Ke Itumelela Tsela e ke Thapisitsweng ka Yone”

MOSHA yo o bidiwang Kazuna o ne a gamarega fa morutabana wa gagwe a ne a akantsha gore a tsenele kgaisano ya go neela puo ka Seesemane. Kgaisano eo e ne e tlile go tsenelwa ke dikolo tsotlhe tse dikgolwane tsa mo setlhaketlhakeng se segolo sa Hokkaido se se kwa Japane bokone, mme sekolo se a se tsenang se ne se ise se ke se romele moithuti ope go tsenela kgaisano eo. Mo letsatsing la kgaisano, Kazuna o ne a tshogile ka gonne o ne a tlile go gaisana le baithuti ba bangwe ba ka nna 50. O ne a tshoga le go feta fa a ne a bona baatlhodi bangwe ba babedi ba puo ya bone e neng e le Seesemane.

Go ne ga bolelwa gore bafenyi ke bomang, mme go simololwa ka mofenyi wa maemo a a kwa tlase. Fa leina la ga Kazuna le ne le bidiwa la bofelo o ne a gakgametse tota. Ene le morutabana wa gagwe, yo o neng a bapile le ene, ba ne ba lebana ba jele kgakge. Kazuna yo o neng a sa ntse a gakgametse o ne a ya kwa pele a ya go tsaya sekgele sa gagwe sa maemo a ntlha!

Kazuna yo o itumetseng o ne a tlhalosa jaana: “Ke kgonne seno fela ka ntlha ya thapiso e ke e neilweng ke phuthego ya ga Jehofa ka Sekolo sa Bodiredi sa Puso ya Modimo. Ke itumelela tsela e ke thapisitsweng ka yone.” Sekolo seo se Kazuna a sa leng a ikwadisa mo go sone a sa le mmotlana, ke nngwe ya dipokano tsa phuthego tsa Basupi ba ga Jehofa. Fa Kazuna a ne a ipaakanyetsa kgaisano eo o ne a ela tlhoko thata tiriso ya maekerofounu, go bua ka tsela e e botsalano le e e matlhagatlhaga, go dirisa diatla, go leba bareetsi, le dilo tse dingwe tse di rutiwang mo Sekolong sa Bodiredi sa Puso ya Modimo.

Tsweetswee amogela taletso ya rona ya gore o tle go bona kafa sekolo seno se se tshwarwang beke le beke kwa Holong ya Bogosi ya Basupi ba ga Jehofa ya mo lefelong la gaeno se tshwarwang ka teng. Tla o iponele kafa bannye le bagolo ba solegelwang molemo ka teng. Mongwe le mongwe o a amogelwa mo pokanong eno. Fa o batla tshedimosetso e e oketsegileng ka sekolo seno se se tshwarelwang gaufi le legae la gago, tsweetswee ikgolaganye le Basupi ba ga Jehofa ba mo lefelong la gaeno.