“Nnang lo Disitse”

MO METLHENG ya bogologolo banna bangwe ba ne ba abelwa tiro ya go disa dikgoro tsa motse le tsa tempele, mme ka dinako dingwe le go disa magae a batho. Mo godimo ga tiro ya go tlhomamisa gore dikgoro di tswetswe bosigo, banna bano ba ne gape ba tshwanetse go nna balebedi. Eno e ne e le tiro e e tlhokang maikarabelo thata ka gonne gore motse o bolokege, go ne go ikaegile ka gore balebedi bano ba goe e le go tlhagisa batho fa go na le kotsi nngwe e e tlang.

Jesu Keresete o ne a tlwaelane le tiro eno ya badisa ba dikgoro kana balebedi ba dikgoro. Nako nngwe o ne a tshwantsha barutwa ba gagwe le balebedi ba kgoro mme a ba kgothaletsa gore ba nne ba disitse bokhutlo jwa tsamaiso ya dilo ya Sejuda. O ne a re: “Nnang lo lebile, nnang lo tsogile, gonne ga lo itse gore nako e e tlhomilweng e leng. Go tshwana le motho yo o tsayang loeto a ya nageng e e kgakala yo o neng a . . . laela molebedi wa kgoro gore a nne a disitse. Jalo nnang lo disitse, gonne ga lo itse gore mong wa ntlo o tla leng.”—Mareko 13:33-35.

Ka tsela e e tshwanang, ke dingwaga tse di fetang 125 jaanong makasine ono wa Tora ya Tebelo o ntse o fetisa kgothatso ya ga Jesu ya gore re ‘nne re disitse.’ O dira seo jang? Jaaka go bontshitswe mo tsebeng ya 2 ya makasine ono, “E nna e lebile ditiragalo tsa lefatshe fa di ntse di diragatsa boperofeti jwa Baebele. E gomotsa batho ba ditso tsotlhe ka mafoko a a molemo a gore Bogosi jwa Modimo bo tla tloga bo bolaya bao ba gatelelang bagabone le gore bo tla fetola lefatshe paradaise.” E re ka lefatshe ka bophara go anamisiwa dikhopi tse di fetang 26 000 000 tsa Tora ya Tebelo ka dipuo di le 150, seno se dirile gore e nne one makasine wa bodumedi o o anamisiwang go gaisa tsotlhe mo lefatsheng. Fela jaaka balebedi ba dikgoro ba mo metlheng ya bogologolo, Basupi ba ga Jehofa ba rotloetsa batho gongwe le gongwe gore ba ‘nne ba tsogile’ semoyeng ka gonne Mong e bong Jesu Keresete o setse a le gaufi le go boa go tla go atlhola tsamaiso eno ya dilo.—Mareko 13:26, 37.