Go Tlhatloga ka Tsela e e Yang Kwa Motseng wa “The Bottom” Kwa Saba

SETLHAKETLHAKE sa Ma-Dutch sa Saba se kile sa bo e le lefelo le mo go lone batsamai ba dikepe mo Lewatleng la Caribbean ba neng ba rata thata go batla dikhumo. Gompieno, setlhaketlhake seno se sennye, se se leng bokgakala jwa dikilometara di le 240 kwa botlhaba jwa Puerto Rico, se na le baagi ba le 1 600, ba le 5 ba bone ke Basupi ba ga Jehofa. Le fa go ntse jalo, badiredi bano ba ba pelokgale ba batla sengwe se se leng tlhwatlhwakgolo go gaisa dikhumo. Ba batla ka tlhoafalo batho ba ba nang le “tshekamelo e e siameng ya go bona botshelo jo bo sa khutleng.”—Ditiro 13:48.

Dikgang tse di molemo tsa Bogosi jwa Modimo di ne tsa fitlha mo setlhaketlhakeng seno la ntlha ka June 22, 1952, fa sekepe sa dimetara di le 18 se se bidiwang Sibia, se se kgweediwang ke Basupi ba ga Jehofa, se ne se ema fa losing lwa Saba. (Mathaio 24:14) Barongwa bangwe e bong Gust Maki le Stanley Carter ba ne ba palama The Ladder, tselana ya ditepisi tse di fetang 500 tsa matlapa e e yang kwa godimo kwa motseng wa The Bottom, e leng motsemogolo wa Saba. * Ka makgolokgolo a dingwaga, tselana eno e tshesane e ne e le yone fela tsela e o ka fitlhelelang baagi ba setlhaketlhake seno ka yone.

Pego ya ntlha e e gatisitsweng ka tiro ya go rera ya Bakeresete kwa Saba e ne ya tlhagelela mo kgatisong ya 1966 Yearbook of Jehovah’s Witnesses. Go ya ka pego eo, go ne go na le Mosupi a le mongwe fela yo o tlhagafetseng kwa setlhaketlhakeng seo. Kwa morago, lelapa lengwe go tswa kwa Canada le  ne la nna dingwaga di le mmalwa le rera dikgang tse di molemo koo. Bosheng jaana, Russel le Kathy, banyalani ba ba tlogetseng tiro go tswa kwa United States, ba ne ba ya kwa Saba mme ba nna le seabe mo tirong ya go rera koo. Utlwa gore ba reng.

Go Etela Saba

Nna le mosadi wa me re ne ra goroga ka sefofane re le baeng ba ga Ronald, yo e neng e le ene fela Mosupi mo setlhaketlhakeng seno ka dingwaga tse dintsi tsa bo1990. Ronald o re letetse kwa boemafofaneng. O itumeletse lebokoso le lennye la merogo le re tlileng le lone jaaka mpho, e re ka go se na kgwebo ya go lema mo setlhaketlhakeng seno. Re palame teraka e nnye, re ne re tlhatloga ka iketlo ka tsela e e motsopodia fa thoko ga Thaba ya Scenery re ya kwa setlhoeng sa lekgwamolelo leno.

Re ema kwa motseng wa Hell’s Gate, fa Ronald a lebelela lomati lwa dikitsiso la botlhe go bona gore a taletso ya puo ya phatlalatsa ya Sontaga e sa ntse e le gone. Re itumelela go bona gore e sa ntse e le gone. O tsena gape mo terakeng mme re tswelela pele re tlhatloga go ya kwa motseng o mogolo wa setlhaketlhake seno, e leng Windwardside. Fela jaaka leina la one le bontsha, motse ono o montle o kafa letlhakoreng le le tletseng diphefo la setlhaketlhake seno, o bogodimo jwa dimetara tse di ka nnang 400 kwa godimo ga lewatle. Fa re tsena ka ntlo ya ga Ron, re bona letshwao le le mebalabala fa pele ga mathudi a ntlo le kaya gore ke Holo ya Bogosi ya Basupi ba ga Jehofa.

Ka nako ya dijo tsa motshegare ke botsa potso e e dirileng gore re ete, “Go tlile jang gore o nne mmoledi wa Bogosi mo Saba?”

Ron a re: “Fa lekala la Basupi ba ga Jehofa la Puerto Rico le sena go agiwa ka 1993, nna le mosadi wa me re ne re ikutlwa re batla go sala mo kabelong ya mo nageng eno e sele. Mo nakong ya pele, re ne re etetse Saba le banyalani bangwe ba babulatsela mme ra lemoga gore go ne go na le baagi ba le 1 400 mme go se na Basupi bape. Ka jalo re ne ra buisana le Komiti ya Lekala la Puerto Rico ka go fudugela fano.

“Dilo di ne tsa tsamaya sentle, mme kgabagare re ne ra letlelelwa go fudugela gone. Ka maswabi, morago ga dingwaga di le pedi mosadi wa me o ne a lwala thata, mme re ne ra boela California. Morago ga loso lwa gagwe, ke ne ka boela mo Saba. Ga ke rate go simolola selo ke bo ke sa se fetse.”

Go Rera ka Ntlo le Ntlo Kwa Saba

Phapusi ya bojelo ya ntlo ya bogologolo ya ga Ron ya dingwaga di le lekgolo e dirisiwa gape jaaka Holo ya Bogosi. * Fa re ntse re ja dijo tsa mo mosong mme re ipaakanyetsa go ya bodireding, metsi a pula e e neng e sarasara a tsena mo kitšhining e e kwa ntle. Morago ga dijo tsa mo mosong, re ne ra ya go neela bosupi ka ntlo le ntlo kwa The Bottom go thibile maru. Mo legaeng lengwe le lengwe, Ron o dumedisa mong wa ntlo ka leina. Motlotlo wa rona o ka kgang nngwe ya bosheng mo lefelong leo. Batho ba le bantsi ba tlwaelane le Ron le bodiredi jwa gagwe, mme ba le bantsi ba amogela dikgatiso tsa Baebele kwantle ga bothata bope.

Go ka nna boima go boloka maina a ba ba kgatlhegelang molaetsa wa Bogosi fa o sa tlwaelana le batho ba motse. Ka ntlha yang? Ka gonne “molao o batla gore matlo otlhe a pentiwe ka mmala o o tshwanang,” go bolela jalo Ron. Ke lemoga gore seno se boammaaruri fa ke lebelela gaufi mme ke lemoga gore matlo otlhe a Saba a masweu mme marulelo a mahibidu.

Fa re sena go konela motlotlo wa rona wa Baebele, re laletsa mong wa ntlo gore a nne gone kwa puong ya phatlalatsa ya Baebele e e tshwarwang ka Sontaga kwa Holong ya Bogosi. Fa Ron a le gone mo setlhaketlhakeng, o neela puo ya phatlalatsa beke le beke. Gone jaanong, go tshwarwa dithuto tsa Baebele di le 17 kwa Saba. Batho ba le 20 ba ne ba le gone ka loso lwa Segopotso sa ga Keresete ka 2004. Mme le fa palo eo e ka bonala e le nnye, e emela peresente e le nngwe ya baagi botlhe ba Saba!

Eleruri, Basupi ba ga Jehofa ba iketleeleditse go fitlhelela batho ba le bantsi ka mo go ka kgonegang ka teng ka molaetsa wa Modimo wa poloko. E ka ne e le setlhaketlhake se se potlana jaaka Saba kgotsa kontinente yotlhe, Basupi ba ga Jehofa ba dira thomo ya bone ka boikanyegi ya go ‘dira batho ba ditšhaba tsotlhe barutwa.’—Mathaio 28:19.

Ka maswabi, loeto lwa rona lo tlile mo bokhutlong. Fa re palama sefofane sa rona, re sadisa Ronald sentle re bo re palama sefofane sa rona. Ga re kitla re lebala loeto lwa rona lwa go ya kwa Saba le nako e re neng ra nna le yone ya go tlhatlogela kwa The Bottom!

[Dintlha tse di kwa tlase]

[Dimmapa mo go tsebe 10]

(Go bona mokwalo o o feletseng, leba kgatiso)

PUERTO RICO

[Motswedi wa Setshwantsho mo go tsebe 10]

Background: www.sabatourism.com