Ke Mang yo o Tla Fepang Lefatshe?

GO YA ka se se fopholediwang ke World Food Programme, e leng mokgatlho wa lekgotla la Ditšhaba Tse di Kopaneng o o lwantshang tlala, batho ba le dimilione di le 800—ba bontsi jwa bone e leng bana—ba gaufi le go bolawa ke tlala. Bosheng jaana mokgatlho oo o ne wa re madi le nako e dinaga tse dintsi tse di tlhabologileng di neng di ka di dirisa go thusa go rarabolola bothata jono di ile tsa dirisiwa go rarabolola mathata a mangwe a a jaaka borukhutlhi. Go anama ga malwetse a a tshelanwang go okeditse bothata jono. Global School Feeding Report ya mokgatlho oo e ne ya bua jaana ka dinaga tsa Afrika tse AIDS e anameng thata mo go tsone: “Batsadi ba le bantsi ba a swa. Mme gantsi bana ba ba salang ba tlogelwa ba le nosi go iponela gore ba tla tshela jang mme bontsi jwa bone ga ba na kitso ka tsa temo le ka botshelo mme seno e nna modikologo o o sa feleng.”

World Food Programme e na le thulaganyo e maikaelelo a yone e leng go dira gore bana ba fiwe dijo bobotlana gangwe ka letsatsi mo dikolong. Maikaelelo a yone ga se fela go fokotsa tlala mme gape ke go dira gore go nne le dithulaganyo tsa ka metlha tse ka tsone ba rutang basha gore ba se ka ba tsenwa ke bolwetse jwa HIV/AIDS.

Mo mafelong a go setseng go dirilwe jalo mo go one, bana ba newa dijo, ba rutwa ka tsa boitekanelo e bile ba thusiwa le ka dilo tse dingwe. Gape go etswe tlhoko gore fa batho ba fetola boitshwaro jwa bone, dipalo tsa batho ba ba tsenwang ke bolwetse jwa HIV/AIDS di a fokotsega.

Ka maswabi, gantsi maiteko a batho a rarabolola fela karolo e e rileng ya bothata mme ga a bo rarabolole ka botlalo. Mme Baebele e re naya tsholofetso e e gomotsang ya gore bothata jwa tlala bo tla rarabololelwa ruri. Pesalema 72:16 ya re: “Go tla nna le dijo tsa ditlhaka di le dintsi mo lefatsheng.” Mo Bogosing jwa Modimo, batho ba tla bua jaana ka Jehofa Modimo: “O lebisitse tlhokomelo ya gago mo lefatsheng, gore o tle o le neye letlotlo . . . Wena o baakanya dijo tsa bone tsa ditlhaka, gonne o baakanya lefatshe ka yone tsela eo.”—Pesalema 65:9.

[Motswedi wa Setshwantsho mo go tsebe 32]

WFP/Y. Yuge