Dipotso Tse di Tswang Kwa Babading

A Mokeresete o tshwanetse go naya modiredipuso madinyana a tebogo kgotsa mpho gore a mo direle sengwe kgotsa a seo se tla lebiwa e le pipamolomo?

Gongwe le gongwe kwa Bakeresete ba nnang gone, ba batla go dira dilo ka botlhale fa ba dira dilo dingwe mo lefelong le ba nnang mo go lone, ba gakologelwa gore dilo tse di amogelwang e bile di le kafa molaong mo nageng e nngwe di ka ne di sa amogelwe gotlhelele e bile di se kafa molaong mo nageng e sele. (Diane 2:6-9) Gone mme, Mokeresete o tshwanetse gore ka metlha yotlhe a gakologelwe gore mongwe le mongwe yo o batlang go nna “molalediwa mo mogopeng wa [ga Jehofa]” o tshwanetse go tila go dirisa pipamolomo.—Pesalema 15:1, 5; Diane 17:23.

Pipamolomo ke eng? Go ya ka World Book Encyclopedia, “pipamolomo e raya go naya modiredipuso mongwe sengwe se se tlhwatlhwakgolo gore a se ka a dira tiro ya gagwe go ya ka molao gore yo a mo nayang pipamolomo eo a solegelwe molemo.” Ka jalo, go sa kgathalesege gore o nna kae, go naya moatlhodi kgotsa lepodise madi kgotsa mpho nngwe gore a se ka a diragatsa molao ke pipamolomo kgotsa go e naya motlhatlhobi gore a itlhokomolose molato o o o dirileng. Gape e tla bo e le pipamolomo go naya motho mpho gore a go tshware ka tsela e e kgethegileng, jaaka gore leina la gago e nne lone la ntlha mo lenaaneng la batho ba ba letetseng go direlwa sengwe kgotsa go sutelediwa kwa pele mo moleng. Go dira jalo go tla bo go sa bontshe lorato.—Mathaio 7:12; 22:39.

A mme e tla bo e le pipamolomo go naya modiredipuso mpho kgotsa madinyana a tebogo gore a go direle sengwe se tota a tshwanetseng go go direla sone kgotsa gore a se ka a go tshwara ka tsela e e sa siamang? Ka sekai, mo dinageng dingwe badiredibagolo ba ka ne ba sa batle go kwadisa bana mo sekolong, go robatsa mongwe mo bookelong kgotsa ba gana go ntsha dipampiri tsa go ya felo gongwe go fitlha ba amogela madinyana a tebogo. Kgotsa ba ka nna ba tsaya nako mo go sekasekeng dikopo tsa go ntšhafatsa dilaesense.

Go naya batho madinyana a tebogo le kafa seno se lejwang ka gone go farologana go ya ka mafelo. Kwa mafelong a batho ba tlwaetseng go ntsha madinyana a tebogo gone kgotsa a mo go one go lebeletsweng gore motho a dire jalo, Bakeresete bangwe ba ka nna ba ikutlwa gore go ya ka molao, ga ba tlole melaometheo ya Baebele fa ba naya modiredimogolo madinyana a tebogo gore a dire tiro ya gagwe. Mo dinageng dingwe batho ba ka nna ba leba dituelo tseo e le mpho ya go oketsa madi a mannye a modiri a a amogelang. Gakologelwa gore go na le pharologanyo fa gare ga go naya motho madinyana a tebogo gore a go direle sengwe se a tshwanetseng go se go direla le go naya motho pipamolomo gore a dire sengwe se se seng kafa molaong.

Kafa letlhakoreng le lengwe, fa Basupi bangwe ba ga Jehofa ba dira dikopo tse di kafa molaong, ba ganne go naya batlhatlhobi, badiredibagolo ba ba berekang mo melelwaneng kgotsa batho ba bangwe madinyana a tebogo tota le fa go dira jalo go tlwaelegile. Ka gonne Basupi ba itsege mo lefelong la bone gore ba dira jalo ka ntlha ya segakolodi sa bone le go tshepega, bone ka dinako tse dingwe ba direlwa dilo tse batho ba le bantsi ba di direlwang fela fa ba sena go duela madinyana a tebogo.—Diane 10:9; Mathaio 5:16.

Re ka sobokanya kgang eno ka go re motlhanka mongwe le mongwe wa ga Jehofa ke ene a tshwanetseng go itirela tshwetso ya gore a o tla ntsha madinyana a tebogo gore a direlwe sengwe se se kafa molaong kgotsa gore a tshwarwe sentle. Mo godimo ga moo, o tshwanetse go dira dilo ka tsela e e tla mo tlogelang a na le segakolodi se se siameng, e e sa tliseng kgobo mo leineng la ga Jehofa e bile e sa kgopise ba bangwe.—Mathaio 6:9; 1 Bakorintha 10:31-33; 2 Bakorintha 6:3; 1 Timotheo 1:5.