Moafrika yo o Ikokobeditseng Yo o Neng a Rata Lefoko la Modimo

GANTSI batho ba ba etelang mafelo a Afrika ba gakgamadiwa ke go bona kafa go leng motlhofo ka teng go simolola motlotlo wa Baebele le batho ba ba nnang mo mafelong ano. Dipotso tse di jaaka, “Bogosi jwa Modimo ke eng?” kgotsa “A mathata a a jaaka go tlhaela ga dijo, bolwetse, ntwa le bokebekwa a tla rarabololelwa ruri?” di dira gore batho ba reetse. Ba le bantsi ba itumelela go letla mongwe yo ba sa mo itseng gore a ba bontshe dikarabo go tswa mo Baebeleng. Gantsi seno se dira gore go ithutwe Baebele le bone ka metlha. Mme fa baithuti ba gatela pele semoyeng, e nna Bakeresete ba ba kolobeditsweng.

Mongwe wa Baafrika ba ntlha ba ba neng ba dira jalo o umakiwa mo Baebeleng mo go Ditiro 8:26-40. E ne e le monna mongwe wa Moethiopia yo o neng a tsere loeto go ya kwa Jerusalema go ya go obamela Modimo wa boammaaruri, Jehofa.

Jaaka go bontshitswe mo setshwantshong se se fa tlase, monna yono wa Moethiopia o boela gae ka kara ya gagwe, mme o ntse a bala momeno. Go tla monna mongwe yo a sa mo itseng a bo a mmotsa jaana: “A tota o itse se o se balang?” Ka boikokobetso, monna yono wa Moethiopia o tlhalosa gore o tlhoka thuso a bo a kopa monna yono yo a sa mo itseng e bong Filipo, moreri wa Mokeresete, gore a pagame kara. Go tswa foo, o kopa Filipo gore a mo tlhalosetse bokao jwa temana e a fetsang go e bala. Filipo o mmolelela gore ke boporofeti jo bo buang ka Mesia, Jesu Keresete yo o sa tswang go bolawa. Gape Filipo o mmolelela dilo tse dingwe tse di malebana le “dikgang tse di molemo kaga Jesu,” tse kwantle ga pelaelo di akaretsang kgang ya go tsosiwa ga ga Jesu.

Fa monna yono wa Moethiopia a utlwa dithuto tseno tse di molemo tsa boammaaruri, o batla go nna morutwa wa ga Jesu mme o botsa jaana: “Ke eng se se nthibelang go kolobediwa?” Fa monna yono yo o ikokobeditseng wa Moafrika a sena go kolobediwa, o boela gae ka boitumelo, mme go tswa foo ga go tlhole go buiwa sepe ka ene mo Baebeleng.

Gompieno, Basupi ba ga Jehofa ba thusa batho ba le dimilionemilione mo lefatsheng lotlhe gore ba utlwe tsone “dikgang” tseno “tse di molemo.” Gone jaanong ba ithuta Baebele mahala le batho ba ka nna dimilione di le thataro kwa magaeng a bone.