Kafa re ka Dirang Gore Letsatsi Lengwe le Lengwe le Nne Mosola ka Gone

“RE BONTSHE gore re bale malatsi a rona jang ka tsela e ka yone re tla nnang le pelo e e botlhale.” (Pesalema 90:12) Eno ke thapelo e mokwadi wa Baebele, Moshe a neng a e rapela ka boikokobetso. Ke eng se tota a neng a se kopa? A le rona re tshwanetse go kopa jalo ka thapelo?

Mo Ps 90 temaneng ya 10, Moshe o ne a hutsafaditswe ke tsela e botshelo bo leng bokhutshwane ka yone. Mo lekgetlhong le lengwe, o ne a kwala mafoko a a builweng ke Jobe, yo o neng a re: “Motho yo o tsetsweng ke mosadi, o botshelo bokhutshwane e bile o tletse matshwenyego.” (Jobe 14:1) Go a bonala gore Moshe o ne a utlwisiwa botlhoko ke go lemoga gore botshelo jwa motho yo o sa itekanelang bo feta ka bonako fela. Ka jalo, o ne a tsaya letsatsi lengwe le lengwe la botshelo e le mpho e e tlhwatlhwakgolo. Fa Moshe a ne a kopa Modimo jaana, o ne a bontsha gore o rata go tshela malatsi a gagwe a a setseng ka tsela e e botlhale, e e tla itumedisang Mmopi wa gagwe. A le rona ga re a tshwanela go batla go tshela ka tsela e e nang le bokao letsatsi le letsatsi? Fa re batla go amogelwa ke Modimo gone jaanong, re tla leka ka natla go dira jalo.

Go na le lebaka le lengwe le le neng la rotloetsa Moshe le Jobe go tshela ka tsela e e nang le bokao letsatsi le letsatsi, lebaka le le rona le tshwanetseng la re rotloetsa. Banna bano ba babedi ba ba ratang Modimo ba ne ba lebile pele go bona tuelo ya bone ya mo nakong e e tlang—go tshela mo lefatsheng mo maemong a a itumedisang. (Jobe 14:14, 15; Bahebera 11:26) Ka nako eo, ga go na ope yo ditiro tsa gagwe tse di molemo di tla kgaosediwang ke loso. Mmopi wa rona o ikaeletse gore batho ba ba ikanyegang ba tshelele ruri mo lefatsheng la paradaise. (Isaia 65:21-24; Tshenolo 21:3, 4) Le wena o ka nna le tsholofelo eno fa o ‘bala malatsi a gago ka tsela e ka yone o tla nnang le pelo e e botlhale.’