Dipotso Tse di Tswang Kwa Babading

E re ka Kgosi ya Iseraele wa bogologolo e bong Solomone a ile a tlogela go ikanyega mo Modimong mo botsofeng jwa gagwe, a re ka konela ka gore ga a kitla a tsosiwa mo baswing?—1 Dikgosi 11:3-9.

Le fa gone Baebele e umaka maina a banna le basadi bangwe ba ba neng ba direla Modimo, ba re sa belaeleng gore ba tla tsosiwa, ga e bue ka tlhamalalo gore mongwe le mongwe wa bone yo o umakilweng moo o tla tsosiwa. (Bahebera 11:1-40) Le fa go ntse jalo, mo kgannyeng ya ga Solomone, re ka kgona go itse gore Modimo o ne a atlhola dilo jang fa re leba se se neng sa mo diragalela fa a ne a swa re se bapisa le se se neng sa diragalela batho ba bangwe ba ba ikanyegang fa ba ne ba swa.

Dikwalo di bua ka dilo tse pedi fela tse di ka diragalelang batho fa ba swa—ba nna mo boemong jwa go sa nne teng ka nakwana fela kana jwa go swela ruri. Batho ba ba atlholwang e le ba ba sa tshwaneleng go tsosiwa ba latlhelwa mo “Gehena,” kana mo “bodibeng jwa molelo.” (Mathaio 5:22; Mareko 9:47, 48; Tshenolo 20:14) Bangwe ba batho bano e tla nna banyalani ba ntlha, e bong Adame le Efa, mooki e bong Judase Isekariota le bangwe ba Modimo a ba atlhotseng ka loso, ba ba tshwanang le batho ba motlha wa ga Noa le baagi ba Sodoma le Gomora. * Fa batho ba ba tla newang tshiamelo ya go tsosiwa ba swa, ba ya kwa lebitleng le le tlwaelegileng la batho le le bidiwang Sheole kana Hadese. Fa Baebele e bua ka batho bao, ya re: “Lewatle la ntsha baswi ba ba mo go lone, le loso le Hadese tsa ntsha baswi ba ba mo go tsone, mme ba atlholwa mongwe le mongwe go ya ka ditiro tsa bone.”—Tshenolo 20:13.

Ka jalo, batho ba ba ikanyegang ba go buiwang ka bone mo go Bahebera kgaolo 11, ba mo Sheole kana Hadese, ba letetse go tsosiwa. Bangwe ba batho bano ke batlhanka ba ba ikanyegang ba Modimo, e bong Aborahame, Moshe le Dafide. Jaanong ela tlhoko gore Baebele ya re go ne go tla diregang ka bone fa ba swa. Jehofa o ne a bolelela Aborahame a re: “Fa e le wena, o tla ya kwa go borragomogologolwane ka kagiso; o tla fitlhwa o tsofetse thata.” (Genesise 15:15) Jehofa o ne a raya Moshe a re: “Bona! O lala le borragomogologolwane.” (Duteronome 31:16) Fa Baebele e bua ka rraagwe Solomone, e bong Dafide, ya re: “Dafide a lala le borraagwemogologolwane mme a fitlhwa mo Motseng wa ga Dafide.” (1 Dikgosi 2:10) Ka jalo, mafoko a a reng “a lala le borraagwemogologolwane” ke tsela e nngwe ya go re motho o ile Sheole.

Go ne ga diregang ka Solomone fa a ne a swa? Baebele e araba jaana: “Malatsi a Solomone a neng a busitse Iseraele yotlhe mo Jerusalema ka one e ne e le dingwaga di le masome a manè. Go tswa foo Solomone a lala le borraagwemogologolwane, mme a fitlhwa mo Motseng wa ga Dafide rraagwe.” (1 Dikgosi 11:42, 43) Ka jalo, go a utlwala gore re konele ka gore Solomone o kwa Sheole kana Hadese, koo a tla tsosiwang gone.

Go konela ka tsela eno go ka raya gore batho ba Dikwalo di reng ‘ba ne ba lala le borraabonemogologolwane’ go ka direga gore ba tsosiwe. Tota e bile, go buiwa jalo le ka dikgosi tse dintsi tse di neng tsa tlhatlhama Solomone, le fa gone di ne di sa ikanyege. Seno se a utlwala e re ka “go tlile go nna le tsogo ya ba ba siameng mmogo le ba ba sa siamang.” (Ditiro 24:15) Mme gone ke fela fa “botlhe ba ba mo mabitleng a kgakologelo” ba tsosiwa moo re tla itseng gore ke bomang ba ba tsositsweng. (Johane 5:28, 29) Ka jalo, go na le gore re konele ka tlhamalalo gore batho ba ba rileng ba bogologolo ba tlile go tsosiwa, a re lete, re tshepa gore Jehofa o tla dira tshwetso e e siameng.

[Ntlha e e kwa tlase]