“Ga ba Ka ba Ineela”

JESU KERESETE o ne a raya barutwa ba gagwe a re: “Go itumela lona fa batho ba lo kgoba ba bo ba lo bogisa e bile ba bua ka lona selo le fa e ka nna sepe fela se se boikepo ka ntlha ya me, e bile ba aka.” (Mathaio 5:11) Basupi ba ga Jehofa gompieno ba itumetse ka gonne, go dumalana le dithuto tsa ga Keresete le sekao sa gagwe, ga ba “karolo ya lefatshe” mme ba itlhaotse gotlhelele mo go tsa bopolotiki, ba ikanyega mo Modimong mo dilong tsotlhe.—Johane 17:14; Mathaio 4:8-10.

Moithutabodumedi wa Lutere e bile e le moranodi wa Baebele, Toomas Paul, o ne a kwala jaana mo bukeng ya gagwe ya Kirik keset küla (Kereke ga e Itse mo e Emeng Teng) mabapi le go sa ineele ga Basupi ba ga Jehofa mo pusong ya maloba ya Soviet Union, go akaretsa le kwa Estonia: “Ke batho ba le mmalwa thata ba ba utlwileng se se diragetseng ka makuku a April 1, 1951. Go ne go rulagantswe letsholo la go koba Basupi ba ga Jehofa le batho botlhe ba ba ikopanyang le bone—go ne ga tshwarwa batho ba le 279 mme ba fudusediwa kwa Siberia . . . Ba ne ba newa sebaka sa gore ba saene foromo ya go itatola tumelo ya bone gore ba tle ba se ka ba fudusiwa kana ba tsenngwa mo kgolegelong. . . . Fa ba kopana le ba ba tshwerweng pele ga foo, go ne go tlhatlhetswe ba le 353 mo kgolegelong, go akaretsa batho ba ka nna 171 ba ba neng ba kopanela fela le diphuthego tsa bone. Ga ba ka ba ineela—tota le fa ba le kwa Siberia. . . . Ga se maloko a mantsi a Kereke [ya Lutere kwa Estonia] a a neng a na le tumelo e e tshwanang le ya Basupi ba ga Jehofa.”

Basupi ba ga Jehofa mo lefatsheng lotlhe ba ikanya Modimo gore o tla ba thusa gore ba nne ba ikanyega e bile ba mo ikobela le fa ba bogisiwa. Ba itumedisiwa ke go itse gore ba tla bona tuelo e kgolo ka ntlha ya go ikanyega ga bone.—Mathaio 5:12.