“Tšhaka ya ga Jehofa Le ya Ga Gidione!”

BA BANTSI jaaka tsie e e jang masimo gore go sale go se na sepe. Eno ke nako ya fa baatlhodi ba busa mo Iseraele mme Baiseraele ba le mo tlalelong. Ka bonako fela fa peo e e jetsweng e simolola go tlhoga, mo dingwageng di le supa masomosomo a bapalami ba dikamela a Bamidiana, Baamaleke le Babotlhaba ba nna ba ntse ba tlhasela lefatshe la Baiseraele. Metlhape ya baba ba bone e gasame gotlhe fela e batla mafulo, mme e ja dimela tsotlhe fela tse ditala. Mme batho ba Iseraele bone ga ba na esele, poo kgotsa nku. Puso ya Bamidiana e ne e boifisa tota mo e leng gore Baiseraele ba ba humanegileng ba ne ba itirela mafelo a bobolokelo a a kafa tlase ga lefatshe mo dithabeng, mo dikgageng le mo mafelong a go leng thata go tsena mo go one.

Ke ka ntlha yang fa ba le mo tlalelong eo? Iseraele wa motlhanogi o obamela medimo ya maaka. Ka ntlha ya seo, Jehofa o ba tsentse mo diatleng tsa bagateledi. Fa bomorwa Iseraele ba sa tlhole ba kgona go itshoka, ba ikuela kwa go Jehofa gore a ba thuse. A o tla ba reetsa? Se se diragaletseng Iseraele se ka re ruta eng?—Baatlhodi 6:1-6.

A e Ne e Le Molemirui yo o Kelotlhoko Kgotsa ‘Seganka, se se Thata’?

Gantsi balemirui ba Baiseraele ba ne ba photha korong ka pholo le selei mo lefelong le le bulegileng, le le nang le pheswana gore e fefere mmoko e o ntshe mo dijong tsa ditlhaka. Go bonala go ka se kgonege gore balemirui ba phothe dijalo ka tsela e ba tlwaetseng go dira ka yone ka go bo baba ba batla go senya naga ya bone. Gidione o iphitlhela Bamidiana ka go phothela korong mo segatisetsong sa beine—se go bonalang e le tshekega e kgolo e e gabilweng mo lefikeng. (Baatlhodi 6:11) Mo tshekegeng eno, o kgona go photha dijo tsa ditlhaka di le dinnye fela ka nako, a dirisa thupa. Gidione o dira se a ka se kgonang mo maemong ano.

Akanya kafa Gidione a ileng a gakgamala ka gone fa moengele wa ga Jehofa a bonala kwa go ene mme a re: “Jehofa o na le wena, wena seganka, wena yo o thata.” (Baatlhodi 6:12) Gidione ga a ikutlwe e le seganka ka go bo a photha dijo tsa ditlhaka mo segatisetsong sa beine a iphitlhile. Le fa go ntse jalo, mafoko ao a bontsha gore Modimo o tshepa gore Gidione e ka nna moeteledipele wa seganka mo Iseraele. Le fa go le jalo, Gidione ka boene o tlhoka gore a tlhomamisediwe seo.

Fa Jehofa a laela Gidione go “boloka Iseraele mo seatleng sa Bamidiana,” o bolela jaana ka boikokobetso: “Intshwarele Jehofa. Ke tla boloka Iseraele ka eng? Bona! Sekete sa me ke sone se sebotlana thata mo go tsa Manase, mme ke nna yo mmotlana thata mo ntlong ya ga rre.” Gidione yo o kelotlhoko o kopa sesupo se se bontshang gore Modimo o tla bo a na le ene fa a tlhasela Midiana mme Jehofa o ikemiseditse go diragatsa se Gidione a se kopang go mo tlhomamisetsa seo. Ka jalo, Gidione o naya moeng wa gagwe wa moengele sephuthelwana sa dijo mme molelo o runya mo lefikeng o bo o laila tshupelo eo. Fa Jehofa a sena go dira gore Gidione a wele makgwafo, Gidione o aga sebeso mo lefelong leo.—Baatlhodi 6:12-24.

“A Baale a Iphemele Kafa Molaong”

Bothata jo bogolo jwa Baiseraele ga se go gatelelwa ke Bamidiana. Ke go obamela Baale. Jehofa ke “Modimo yo o lefufa” mme ga go na ope yo o ka mo obamelang ka tsela e e amogelesegang fa a obamela medimo e mengwe. (Ekesodo 34:14) Ka jalo, Jehofa o laela Gidione gore a senye sebeso sa ga rraagwe se a se diretseng Baale le gore a robe kota e e boitshepo. E re ka Gidione a ne a boifa kafa rraagwe le batho ba bangwe ba neng ba tla itshwara ka gone fa a dira seno motshegare, o dira seno maitseboa a thusiwa ke batlhanka ba le lesome.

Go a utlwala go bo Gidione a ne a batla go dira dilo ka kelotlhoko ka gonne baobamedi ba ga Baale  ba mo lefelong la gaabo ba ne ba batla go mmolaya fa ba ne ba lemoga gore o tlontlolotse modimo wa bone. Le fa go ntse jalo, rraagwe Gidione, e bong Joashe o ne a ntsha mabaka a a ka se kang a ganediwa a bolelela batho gore fa Baale e ne e le Modimo, o ne a tla kgona go iphemela. Fa a rialo, Joashe o bitsa morwawe sentle a re ke Jerubale, e leng leina le bokao jwa lone e leng, “A Baale a Iphemele Kafa Molaong Kgatlhanong le Ene.”—Baatlhodi 6:25-32, mokwalo o o kwa tlase mo NW.

Ka dinako tsotlhe Modimo o segofatsa batlhanka ba gagwe fa ba emela kobamelo ya boammaaruri ka bopelokgale. Fa Bamidiana le ditšhaba tse ba neng ba ikgolagantse le tsone ba boa ba tlhasela naga ya Iseraele gape, “moya wa ga Jehofa wa aparela Gidione.” (Baatlhodi 6:34) Gidione a tlhotlhelediwa ke moya wa Modimo, kgotsa maatla a a dirang, o phutha masole go tswa mo setsong sa ga Manase, sa ga Ashera, sa ga Sebulone le sa ga Nafetali.—Baatlhodi 6:35.

Go Ipaakanyetsa Ntwa

Le fa Gidione jaanong a na le masole a le 32-000, o sa ntse a kopa Modimo gore a mo neye sesupo. Fa boboa jo bo beilweng mo seboaneng bo kolobediwa ke monyo mme lefatshe lone le sa koloba, seno se tla bo se supa gore Modimo o tla boloka Iseraele ka ene. Jehofa o dira kgakgamatso eno, mme Gidione o kopa sesupo sa bobedi sa gore go kolobe lefatshe mme boboa jone bo se ka jwa koloba, mme go direga fela jalo. A Gidione o kelotlhoko go feta selekanyo? Ga go bonale jalo, ka go bo Jehofa o araba kopo ya gagwe e le go mo tlhomamisetsa. (Baatlhodi 6:36-40) Ga re a lebelela gore go direge dikgakgamatso tse di ntseng jalo gompieno. Le fa go ntse jalo, Jehofa o re kaela ka Lefoko la gagwe le go re tlhomamisetsa dilo ka lone.

Jaanong Modimo o bolelela Gidione gore masole a gagwe a mantsi thata. Fa Baiseraele ba ne ba ka fenya baba ba bone ka masole a mantsi jalo, ba ne ba ka ikgantsha ba re ke bone ba ba ipolokileng. Mme Jehofa o tshwanetse go tlotlomadiwa ka ntlha ya phenyo e e tlileng go nna teng. Tharabololo ke eng? Gidione o tshwanetse go dirisa thulaganyo ya Molao wa ga Moshe ka go kopa ba ba boifang go ikgogela morago. Fa a dira jalo, banna ba gagwe ba le 22 000 ba ikgogela morago, go sala fela ba le 10 000.—Duteronome 20:8; Baatlhodi 7:2, 3.

Go ya ka pono ya Modimo, banna bao ba sa ntse ba le bantsi. Gidione o bolelelwa gore a ba folosetse kwa metsing. Rahisitori wa Mojuda e bong Josephus a re Modimo o ne a dira gore Gidione a ye le masole a gagwe kwa nokeng letsatsi le fisa. Go sa kgathalesege gore boemo jwa bosa e ne e le bofe, Gidione o ela tlhoko kafa banna bano ba nwang metsi ka teng. Ke ba le 300 fela ba ba neng ba nwa metsi ba a gelela ka seatla ba tla ba ntse ba leba gore mmaba ga a ba tlhasele. Ke ba le 300 fela ba ba ntshitseng matlho dinameng ba ba neng ba tla tsamaya le Gidione. (Baatlhodi 7:4-8) Akanya o le mo boemong jwa bone. E re ka baba ba lona ba le 135 000, eleruri o tshwanetse wa swetsa ka gore go fenya ga lona go tla tla fela ka maatla a ga Jehofa, e seng a lona!

Modimo o kopa Gidione go tsamaya le motlhokomedi wa gagwe go ya go tlhola bothibelelo jwa Bamidiana. Fa ba le koo, Gidione o utlwa monna mongwe a bolelela tsala ya gagwe toro mme tsala ya gagwe o e tlhalosa ka gore Modimo  o ikemiseditse go tsenya Bamidiana mo seatleng sa ga Gidione. Go utlwa seno go ne ga kgothatsa Gidione fela thata. O tlhomamisegile gore Jehofa o tla naya ene le banna ba gagwe ba le 300 phenyo kgatlhanong le Bamidiana.—Baatlhodi 7:9-15.

Go Rulaganyetsa Ntwa

Banna ba le 300 ba kgaoganngwa go nna ditlhopha tse tharo, setlhopha sengwe le sengwe se na le banna ba le 100. Monna mongwe le mongwe o newa lenaka le nkgo e kgolo e e lolea. Serumola se fitlhilwe mo teng ga nkgo eno. Taelo ya ntlha ya ga Gidione ke eno: ‘Lo ntebe mme lo dire fela jaaka ke dira. Fa ke letsa lonaka, le lona lo letse dinaka mme lo goe lo re “tšhaka ya ga Jehofa le ya ga Gidione!”’—Baatlhodi 7:16-18, 20.

Masole a le 300 a Baiseraele a kukunela gaufi le bothibelelo jwa baba ba bone. Nako e ne e ka nna ura ya bolesome bosigo—fela fa masole a mangwe a a neng a disitse a sena go tsamaya. Eno e bonala e le nako e e siameng ya go tlhasela, ka gonne go tla tsaya nako gore matlho a masole a a fetsang go goroga a a tlang go disa a tlwaele lefifi.

A bo Bamidiana ba welwa ke letshogo le le seng kana ka sepe jang ne! Ka tshoganyetso, go tsoga modumo fa dinkgo di le 300 di thubega, dinaka di le 300 di lela le banna ba le 300 ba goa. E re ka Bamidiana ba gakgamaditswe thata ke go utlwa ba goa ba re “Tšhaka ya ga Jehofa le ya ga Gidione!”, ba oketsa modumo oo ka go simolola ba goa le bone. Mo tlhakatlhakanong eo, ga ba kgone go bona sentle gore baba ba bone ke bafe. Banna ba le 300 ba eme fela mo lefelong la bone fa Modimo a dira gore baba ba bone ba dirise ditšhaka tsa bone ka bobone go bolaana. Masole a a mo bothibelelong a a falala, mme ga go na ope yo o falolang ka gonne morago ga moo masole ano a dira tiro e e boima ya go leleka masole a Bamidiana ba bo ba a bolaela ruri. Kgabagare, tiro e e tsereng lobaka lo loleele ya go bolaya masole ano e tla bokhutlong.—Baatlhodi 7:19-25; 8:10-12, 28.

Tota le morago ga phenyo eno, Gidione o sala a ntse a ikokobeditse. Fa Baeferaime, ba go bonalang ba ne ba tenwa ke go bo ba sa bidiwa go tla go lwa, ba leka go omana le ene, o ba araba ka bonolo. Karabo ya gagwe e e bonolo e faposa bogale jwa bone mme e ritibatsa moya wa bone.—Baatlhodi 8:1-3; Diane 15:1.

E re ka jaanong go le kagiso, Baiseraele ba kopa Gidione go nna kgosi ya bone. A bo e le teko jang ne mo go ene! Mme Gidione o gana go nna kgosi. Ga a ise a lebale gore ke mang yo o fentseng Bamidiana. O bolela jaana: “Nna ka bonna nka se lo buse, le fa e le morwaake a ka se lo buse. Jehofa ke ene a tla lo busang.”—Baatlhodi 8:23.

Le fa go ntse jalo, ka go bo Gidione a sa itekanela, ga a dire ditshwetso ka tsela e e botlhale ka dinako tsotlhe. Ka ntlha ya lebaka lengwe le le sa tlhalosiwang, o dira khiba ka dilo tse di gapilweng tsa ntwa mme a bo a dira gore mongwe le mongwe mo motseng wa gagwe a e bone. Pego ya re Baiseraele botlhe ba simolola go “akafala” le khiba eo. Ba e obamela mme e nna seru le mo go Gidione le ba ntlo ya gagwe. Le fa go ntse jalo, o ne a se ka a ineela gotlhelele mo go obameleng ditshwantsho ka go bo Dikwalo di mo tlhalosa e le monna wa tumelo mo go Jehofa.—Baatlhodi 8:27; Bahebera 11:32-34.

Se re Se Ithutang

Pego eno e e buang ka Gidione e a re tlhagisa le go re kgothatsa. E re tlhagisa gore fa Jehofa a ka tlosa moya wa gagwe le masego a gagwe mo go rona ka ntlha ya boitshwaro jwa rona jo bo sa siamang, boemo jwa rona jwa semoya bo tla nna jaaka jwa baagi ba ba humanegileng ba naga e e tlhasetsweng ke tsie. Re tshela mo dinakong tsa mathata mme ga re a tshwanela go lebala gore masego a ga Jehofa ‘ke one a a humisang mme ga a a oketse ka botlhoko.’ (Diane 10:22) Re itumelela masego a Modimo ka gonne re ‘mo direla ka pelo e e feletseng le ka moya o o itumetseng.’ E seng jalo, o tla re latlha.—1 Ditiragalo 28:9.

Pego eno e e buang ka Gidione e a re kgothatsa ka gonne e supa gore Jehofa a ka golola batho ba gagwe mo dikotsing dipe fela, tota le ka go dirisa ba ba lebegang ba le bokoa kgotsa ba ka se ka ba re thusa ka sepe. Pego ya gore Gidione le banna ba gagwe ba le 300 ba ne ba kgona go fenya Bamidiana ba le 135 000 ke sesupo sa maatla a magolo a Modimo. Re ka nna ra iphitlhela re le mo mathateng a magolo mme go ka bonala e kete baba ba rona ba re feta kgakala ka palo. Le fa go ntse jalo, pego ya Baebele e e buang ka Gidione e re kgothaletsa go ikanya Jehofa, yo o tla re segofatsang le go golola botlhe ba ba dumelang mo go Ene.