Mosepele o Moleele—O Nna le Matswela a a Molemo

GO NA le pego e e tswang kwa Democratic Republic of Congo ya basadi ba babedi ba e leng bana ba motho ba ba neng ba tsaya mosepele o moleele ba ralala lefelo le le kgautlhantsweng ke ntwa ba ya kwa Kopanong ya Kgaolo ya “Nayang Modimo Kgalalelo” kwa Lisala. Kwantle ga go rutwa dilo tsa semoya le go kopana le Bakeresete mmogo le bone kwa kopanong, ba ne ba itumeletse gore ba tla kopana le baemedi ba ba tswang kwa ofising ya lekala ya Basupi ba ga Jehofa kwa Kinshasa. Ka ntlha ya ntwa ya selegae kwa nageng eo, ba ne ba na le lobaka lo loleele ba sa bone ope go tswa kwa lekaleng, mme ba ne ba batla go dirisa sebaka seno go kopana le bone.

Bana bano ba motho ba ne ba tsamaya ka mokoro ba tswa kwa legaeng la bone la Basankusu mme ba ya Lisala, sekgala sa dikilometara di ka nna 300 ba tsamaya mo sekgweng le mo dinokeng tse pedi. Ba tsere dibeke di le tharo go wetsa mosepele oo. E re ka boobabedi ba le mo tirelong ya nako e e tletseng, yo mongwe a diretse dingwaga di le 3 mme yo mongwe a diretse di le 19, ba ne ba dirisa mosepele oo wa bone go anamisa dikgang tse di molemo tsa Bogosi. Ba ne ba dirisa diura di ka nna 110 ba rerela batho ba ba neng ba kopana le bone mo tseleng, ba tsamaisa dipampitshana di le 200 le dimakasine di le 30.

Mo nokeng, ba ne ba tshwanelwa ke go tsamaisa mokoro wa bone fa gare ga dikubu le dikwena tse di fitlhelwang ka bontsi mo kgaolong eo. Ba ne ba ka se kgone go tsamaya mo nokeng bosigo—go ne go le kotsi go tsamaya ka mokoro fa go sena go fifala! Gape ba ne ba emisiwa ke masole mo mafelong a le mantsi.

Le fa mosepele ono o ne o le moleele e bile o lapisa, bana bano ba motho ba ne ba itumeletse maiteko a ba a dirileng a go o tsaya. Boobabedi ba ne ba anaanela thata e bile ba itumeletse go nna teng kwa kopanong kwa Lisala. Dipelo tsa bone di ne di phophoma ka boitumelo ka gonne ba anaanela boammaaruri tota mme ba ne ba kgothadiwa ke bakaulengwe le bokgaitsadi ba ba 7 000 ba ba neng ba le teng. Morago ga kopano eo fa ba boela morago, ba ne ba kopana le mathata a ba neng ba kopane le one fa ba ne ba ya, mme ba ne ba fitlhela ba malapa a bone ba sa ntse ba sireletsegile.