Maitseo a Mantle a Tlhagisa Matswela a a Molemo

MO SETLHAKETLHAKENG sengwe se sennye se se gaufi le lotshitshi lo lo kafa borwa jwa Japane, mmè mongwe le bana ba gagwe ba bararo ba babotlana ba ne ba simolola go ithuta Baebele le Basupi ba ga Jehofa. Fa baagelani ba mmè yono ba ba nnang mo lefelong leno le le kwa thoko la batho ba ba ratang setso thata ba bona seno, ba ne ba simolola go mo tlodisa matlho gongwe le gongwe kwa ba neng ba mmona gone. O bolela jaana: “Se se neng se nkutlwisa botlhoko thata go feta go intlodisa matlho ga bone e ne e le gore ba ne ba se botsalano mo monneng wa me le mo baneng ba me.” Le fa go ntse jalo, o ne a raya bana ba gagwe a re: “Re tshwanetse go tswelela re dumedisa baagelani ba rona ka ntlha ya ga Jehofa.”—Mathaio 5:47, 48.

Fa ba le kwa lapeng o ne a ruta bana ba gagwe gore ba nne maitseo le fa batho ba ne ba ba itlhokomolosa. Fa ba ntse ba le mo sejanageng mo maetong a bone a ka metlha a go ya go leba metswedi ya lefelo la bone ya metsi a a fisang, bana bano ba ne ba ithuta tsela e ba neng ba tlile go dumedisa batho ka yone. Fa ba tsena mo kagong eo, ka metlha bana bano ba ne ba dumedisetsa kwa godimo ka boitumelo ba re “Konnichiwa!”—“Dumelang!” Ba lelapa leno ba ne ba tswelela ka bopelotelele ba ntse ba dumedisa batho botlhe ba ba neng ba kopana le bone le fa gone baagelani bano ba bone ba ne ba ba itlhokomolosa. Mme gone batho ba bangwe ba ne ba lemoga tsela e bana bano ba neng ba le maitseo ka yone.

Kgabagare baagelani ba ba farologaneng ba ne ba simolola go ba araba ka go re, “Konnichiwa.” Kwa bofelong jwa dingwaga di le pedi, mo e ka nnang batho botlhe ba mo toropong eo ba ne ba araba fa ba lelapa leno ba ba dumedisa. Baagelani bano ka bobone ba ne ba setse ba dumedisana e bile ba le ditsala go feta pele. Mothusa ratoropo o ne a batla go tlotla bana bano ka ntlha ya seabe sa bone mo go tliseng phetogo eno. Mme mmaabone o ne a mo tlhomamisetsa gore ba ne ba dira fela se Bakeresete ba tshwanetseng go se dira. Moragonyana mo kgaisanong ya go neela dipuo e e neng e dirwa mo setlhaketlhakeng sotlhe mongwe wa barwa ba mmè yono o ne a bua kafa mmaabone a neng a thapisa lelapa la bone ka gone gore ba dumedise batho ba bangwe ka maitseo go sa kgathalesege tsela e batho bao ba itshwarang ka yone. Puo eo ya gagwe e ne ya bona maemo a ntlha mme ya gatisiwa mo lokwalodikgannyeng lwa toropo. Gompieno lelapa leno le itumetse thata gore go latela melaometheo ya Bokeresete go ne ga dira gore ba nne le matswela ano a a molemo. Go bua le ba bangwe ka mafoko a a molemo go nna motlhofo fa batho ba le botsalano.