“Khutlotharo e Phepole e Bolelang?”

MODIREDIPUSO mongwe yo o dirang mo lephateng la bosiamisi mo Repaboliking ya Korea kwa Seoul, o ne a kwala jaana: “Malatsi a le mmalwa a a fetileng, ke ne ka amogela khopi ya makasine wa Tora ya Tebelo mo go mongwe wa Basupi ba ga Jehofa.” O tswelela ka go re: “Fa ke ntse ke e bala, ke ne ka ithuta dintlha dingwe tse di malebana le go bogisiwa ga Basupi ba ga Jehofa ke Banasi le ke puso ya Bokomonisi. Mme gone ke na le potso. Setshwantsho se se mo khabareng se bontsha Basupi ba ga Jehofa ba apere dibaki tse di nang le khutlotharo e phepole e e lebileng kwa tlase mo molemeng wa dibaki tsa bone. Khutlotharo eno e phepole e bolelang?”

Basupi ba ga Jehofa ba ne ba gana go galaletsa Hitler kwa Jeremane e e neng e le kafa tlase ga puso ya Banasi, mme ba ne ba sa tseye letlhakore mo dikgannyeng tse di amanang le dipolotiki le sesole. Ka jalo, Banasi ba ne ba ba bogisa setlhogo, ba tsenya Basupi ba le 12 000 mo kgolegelong le mo dikampeng tsa pogisetso mme ba ba naya dikwebo tse di sa lekaneng. Basupi ba ka nna 2 000 ba ne ba swa mme makgolokgolo a bone a bolawa.

Jaanong khutlotharo e phepole e e neng e le mo diaparong tsa bone tsa kgolegelo e ne e bolelang? Buka ya Anatomy of the SS State e tlhalosa jaana: “Ditlhopha tse di farologaneng tsa magolegwa a a neng a le mo dikampeng [tsa Banasi] di ne di na le matshwao a a farologaneng a di neng di tlhaolwa ka one. Thulaganyo eno ya go rokelela matshwao a a farologaneng mo diaparong tsa magolegwa e ne ya simololwa pele ga ntwa, mme letshwao le ne le rokelelwa go ikaegilwe ka gore legolegwa le wela mo setlhopheng sefe: go ne go rokelelwa khutlotharo e khibidu mo diaparong tsa magolegwa a sepolotiki; e phepole mo go tsa Basupi ba ga Jehofa; e ntsho mo go ba ba neng ba tsewa ba le kotsi mo setšhabeng; e tala mo go ba e leng dikebekwa; e pinki mo diaparong tsa basodoma le e pududu mo go tsa ba ba tswang kwa dinageng di sele. Mo godimo ga khutlotharo ya mmala e bagolegwa ba Bajuda ba neng ba e tsenngwa, go ne go rokelelwa e nngwe gape e e serolwana mo godimo ga yone gore di lebege jaaka betšhe e e tshwanang le naledi.”

Mo bukeng ya gagwe ya Holocaust Politics, Porofesa John K. Roth o ne a kwala jaana: “Khutlotharo e phepole e sa ntse e ka lejwa e le selo se se sireletsang batho mo masetlapelong, e e re gopotsang molemo o batho ba tshwanetseng go o anaanela fela thata e bile ba tshwanetse go o bontsha.” Basupi ba ga Jehofa ba dirile bidio e e gapileng sekgele ya Jehovah’s Witnesses Stand Firm Against Nazi Assault. Ke ka ntlha yang fa o sa kope mongwe wa bone gore a go bontshe bidio eno?