A o A Gakologelwa?

A o ile wa solegelwa molemo ke go bala ditlhogo tsa dimakasine tsa Tora ya Tebelo tsa bosheng? Bona gore a o ka kgona go araba dipotso tse di latelang:

• Ke ka ntlha yang fa go tletse bosula jo bontsi jaana gompieno?

Lengwe la mabaka a a dirang gore batho ba dire dilo tse di bosula ke gore ba na le tshekamelo ya go dira bosula. (Genesise 8:21) Le lengwe ke gore batho ba le bantsi ga ba na kitso e e boammaaruri ya gore thato ya Modimo ke eng. Mo godimo ga moo, mosimolodi wa bosula e bong Satane o nnetse go itshunya nko mo mererong ya batho.—1/1, tsebe 4-6.

• Lefoko le le molemo ka nako e e tshwanetseng le ka nna le matswela afe a a molemo? (Diane 12:25)

Le ka dira gore yo o le reeditseng a itshepe a bo a kgothale, e bile le ka dira gore a ikutlwe a ratwa ke ba bangwe. Gape, fa re ntse re senka ditshono tsa go akgola ba bangwe seno se re thusa go bona dinonofo tse di molemo mo go bone.—1/1, tsebe 16-17.

• Go ne go tsentswe eng mo teng ga letlole la kgolagano?

Go ne go tsentswe dikwalelo tse pedi tsa maje a go neng go kwadilwe Molao mo go one le mana. Fa Kora a sena go tsuologa, thobane ya ga Arone e ne ya tsenngwa mo teng ga letlole gore e nne bosupi kgatlhanong le kokomana eo. (Bahebera 9:4) Go ka direga gore thobane eno le mana di ne tsa ntshiwa mo Letloleng leno pele ga tempele ya ga Solomone e kgakolwa.—1/15, tsebe 31.

• Ke ka ntlha yang fa Bajuda ba motlha wa ga Nehemia ba ne ba tshwanetse go tlisa dikgong mo tempeleng?

Molao wa ga Moshe o ne o sa laele gore go dirwe tshupelo ka dikgong. Mme mo motlheng wa ga Nehemia, go ne go tlhokega gore go nne go tlisiwe dikgong gore go fisiwe ditlhabelo mo motlaaganeng.—2/1, tsebe 11.

• Dikapetla tsa Lekwalo la ga Muratori ke eng?

Ke karolo ya mokwalo wa Selatine. Kwa tshimologong, lekwalo leno le ne le kwadilwe ka Segerika mo e ka nnang kwa bokhutlong jwa lekgolo la bobedi la dingwaga C.E. Lekwalo leno le na le lenaane la bogologolo thata la dibuka tsa Dikwalo Tsa Bokeresete Tsa Segerika tse di amogelwang jaaka tse di boammaaruri, mmogo le dikakgelo dingwe ka dibuka tseno le bakwadi ba tsone.—2/15, ditsebe 13-14.

• Ke ka ntlha yang fa Kgosigadi ya Peresia e bong Fasheti a ne a nnela go gana go tla kwa kgosing? (Esethere 1:10-12)

Baebele ga e tlhalose lebaka. Bakanoki bangwe ba re o ne a gana go tla ka gonne a ne a sa batle go tla go itlontlolola fa pele ga baeng ba ba tlhapetsweng ba kgosi. Kgotsa gongwe kgosigadi eno ya maratagolejwa e ne e sa ikobele kgosi mme ka go dira jalo, a tlhomela basadi ba bangwe ba ba nyetsweng sekao se se maswe mo Pusong e Kgolo ya Peresia.—3/1, tsebe 9.

• Thekololo e re golola jang?

Setlhabelo sa ga Jesu se ka re golola mo boleong jo re bo ruileng gape se ka re golola mo boleong jo bo re bakelang loso. (Baroma 6:23) Setlhabelo seno se golola Bakeresete ba boammaaruri mo go nneng le segakolodi se se molato. Mme fa re dumela mo thekololong eno, re ka se ka ra tlhola re boifa malebana le boemo jwa rona fa pele ga Modimo. (1 Johane 2:1)—3/15, tsebe 8.

• Re ka ithuta eng mo go se Molao o neng o se iletsa gore motho a se ka a bedisa potsane ka mashi a mmaayone? (Ekesodo 23:19)

Go e bedisa jalo e ka tswa e ne e le ngwao ya boheitane e e neng e latelwa go dira gore pula ene. (Lefitiko 20:23) Modimo o ne a dira gore potsane e newe mashi a mmaayone gore a e otle le go e thusa go gola. Go bedisa potsane ka mashi ao go ne go tla bo go bontsha lenyatso mo kamanong e Modimo a e tlhomileng fa gare ga potsane le mmaayone. Molao o o neng o iletsa seno o bontsha gore Modimo o kutlwelobotlhoko.—4/1, tsebe 31.