“Ka Ntlha ya Mosimane wa Dingwaga Tse Robongwe”

NAKO le nako fa Basupi ba ga Jehofa ba ne ba tla kwa legaeng la ga Wiesława, yo o nnang kwa borwa jwa Poland, o ne a ba leboga ka maitseo mme a gana go bua le bone. Letsatsi lengwe, Samuel yo o nang le dingwaga di le robongwe o ne a tla kwa ga Wiesława a tsamaya le mmaagwe. Mo lekgetlhong leno Wiesława o ne a swetsa ka gore a reetse mme a amogela makasine o o neng o bua ka lefatshe la paradaise.

Ka gonne Segopotso sa Loso lwa ga Jesu Keresete se ne se atamela, Samuel o ne a batla go laletsa Wiesława kwa tiragalong eo e e kgethegileng. Ka jalo, mosimanyana yono o ne a etela Wiesława gape a tsamaya le mmaagwe mme a tshotse pampitshana ya taletso. Ka gonne Wiesława a ne a bona gore mosimane yono o ne a apere sentle, le ene o ne a kopa go tswa ka lobakanyana a ya go apara sentle. Fa a boa, o ne a reetsa Samuel, a amogela taletso mme a botsa a re: “A ke tle ke le esi kana ke tle le monna wa me?” Go tswa foo o ne a re: “Le fa monna wa me a sa tle, nna ke tla tla. Ke tla tla ka ntlha ya gago Samuel.” Samuel o ne a itumela ka gonne ruri Wiesława o ne a tla.

Ka nako ya puo ya Segopotso, Samuel o ne a bapile le Wiesława mme a mmontsha ditemana tse di neng di balwa. Seno se ne sa kgatlha Wiesława tota. O ne a itumelela puo ya Segopotso mme o ne a ratile thata kgang ya gore dintlha tsa yone tse di thata di ne di beilwe ka tsela e e motlhofo. Gape o ne a itumeletse kamogelo e e lorato le bopelonomi jo phuthego e neng e bo mmontshitse. Fa e sa le go tloga ka nako eo, Wiesława o ne a kgatlhegela thata dilo tse di amanang le kobamelo ya Modimo mme a simolola go kopanela ka metlha le Basupi ba ga Jehofa. Bosheng jaana o ne a re: “Ke tlhabiwa ke ditlhong ka gore pele ke ne ke gana go lo reetsa fa lo tla kwa legaeng la me. Mme gone boammaaruri ke gore ke reeditse molaetsa wa lona fela ka ntlha ya mosimane wa dingwaga tse robongwe, ka ntlha ya ga Samuel.”

Jaaka Samuel wa kwa Poland, Basupi ba ga Jehofa ba le bantsi ba babotlana ba baka Modimo ka molomo, ka tsela e ba lebegang ka yone le ka boitshwaro jwa bone jo bontle. Fa e le gore o motho yo mosha ka dingwaga, le wena o ka itumelela go thusa batho ba ba dipelo di ikanyegang gore ba kgatlhegele dilo tse di molemo tsa semoya.