A Juda E ne Ya Nna e Kgakgabetse?

BAEBELE e ne ya bolela go sale pele gore naga ya bogosi jwa Juda e ne e tla kgakgabadiwa ke Bababelona e bile e ne e tla nna e kgakgabetse go fitlha batshwarwa ba Bajuda ba boa. (Jeremia 25:8-11) Lebaka le le utlwalang thata la go dumela gore boporofeti joo bo diragetse ke pego e e tlhotlheleditsweng ya hisitori e e kwadilweng dingwaga di ka nna 75 fa setlhopha sa ntlha sa batshwarwa ba sena go boela kwa nageng ya bone. Pego eo e bolela gore kgosi ya Babelona “ba ba falotseng tšhaka a ba isa botshwarwa kwa Babelona, mme ba nna batlhanka ba gagwe le ba bomorwawe go fitlha puso ya segosi ya Peresia e simolola go busa.” Mme go begwa jaana malebana le lefatshe: “Le ne la boloka sabata malatsi otlhe a le neng le kgakgabetse ka one.” (2 Ditiragalo 36:20, 21) A go na le bosupi jwa baithutamarope jo bo tshegetsang seno?

Mo lokwalopakeng lwa ga Ephraim Stern, porofesa wa thutamarope ya Palesetina kwa Hebrew University, a re: “Baasiria le Bababelona ba ne ba tlhasela dikarolo tse dikgolo tsa Iseraele wa bogologolo, mme bosupi jwa baithutamarope jwa morago ga ditlhaselo tseo tsa bone bo bua dilo tse pedi tse di sa tshwaneng gotlhelele.” A re: “Baasiria bone ba tlogetse bosupi jwa gore ba ne ba le teng kwa Palesetina, mme ga go na bosupi morago ga tlhaselo ya Babelona. . . . Ga re na bosupi jwa gore go kile ga bo go nniwa mo nageng eno go fitlha ka motlha wa Baperesia . . . Ga go na bosupi bope fela jwa gore naga eno e ne e na le batho. Mo nakong eo yotlhe, ga go na motse ope o o neng wa senngwa ke Bababelona o go neng ga nniwa gape mo go one.”

Porofesa Lawrence E. Stager wa kwa Harvard University le ene o dumalana le seo. A re, “Mo Filisitia yotlhe le mo Juda yotlhe morago ga moo” “mokgwa wa go senya lefatshe gotlhelele [wa kgosi ya Babelona] o ne wa dira gore naga e e kwa bophirima jwa Noka ya Joredane e kgakgabale fela.” Stager gape a re: “Rekoto ya thutamarope e simolola gape fa go setse go busa Kurose yo Mogolo, yo e leng Moperesia yo o neng a busa morago ga Bababelona . . . kwa Jerusalema le Juda kwa batshwarwa ba bantsi ba Bajuda ba neng boela kwa nageng ya bone.”

Eleruri, lefoko la ga Jehofa malebana le go kgakgabala ga Juda le ne la diragadiwa. Se Jehofa Modimo a se bolelang go sa le pele ka metlha se a diragala. (Isaia 55:10, 11) Re ka ikanya Jehofa mmogo le ditsholofetso tse di kwadilweng mo Lefokong la gagwe, e leng Baebele, ka botlalo.—2 Timotheo 3:16.