Jehofa o ‘Naya Ba ba Mo Kopang Moya o o Boitshepo’

“Fa lona, le mororo lo le boikepo, lo itse kafa lo ka nayang bana ba lona dimpho tse di molemo ka gone, a bo Rara yo o kwa legodimong bogolo jang a tla naya moya o o boitshepo ba ba mo kopang!”—LUKE 11:13.

1. Ke leng mo re tlhokang thuso ya moya o o boitshepo thata teng?

‘NKA se kgone ke le esi. Nka itshokela teko eno ka thuso ya moya o o boitshepo fela!’ A o kile wa bua mafoko a a jaaka ano a a tswang mo pelong? Bakeresete ba le bantsi ba kile ba a bua. Gongwe o ne wa bua jalo o sena go utlwa gore o tsenwe ke bolwetse bongwe jo bo masisi. Kgotsa e ne e le ka nako ya fa o sena go swelwa ke molekane wa gago wa lenyalo. Gongwe e ne e le ka nako ya fa boitumelo jwa gago bo ne bo tseelwa sebaka ke go ngomoga pelo mo gogolo. Ka dinako tse di botlhoko tsa botshelo jwa gago, o ka tswa o ne o utlwa gore o kgona fela ka gonne moya o o boitshepo wa ga Jehofa o go naya “maatla a a fetang a a tlwaelegileng.”—2 Bakorintha 4:7-9; Pesalema 40:1, 2.

2. (a) Bakeresete ba boammaaruri ba lebana le dikgwetlho dife? (b) Re tla sekaseka dipotso dife mo setlhogong seno?

² Bakeresete ba boammaaruri ba tshwanelwa ke go itshokela kgatelelo e e ntseng e oketsega le kganetso ya lefatshe la gompieno le le bosula. (1 Johane 5:19) Mo godimo ga moo, balatedi ba ga Keresete ba tlhaselwa ke Satane Diabolo ka boene, yo o lwantshang batho ba ba “bolokang ditaolo tsa Modimo e bile ba na le tiro ya go naya bosupi ka Jesu.” (Tshenolo 12:12, 17) Ka jalo, ga go gakgamatse go bo re tlhoka thuso ya moya wa Modimo gone jaanong go feta le fa e le leng pele. Re ka dira eng go tlhomamisa gore re tswelela pele re amogela moya wa Modimo o o boitshepo ka bontsi? Mme ke ka ntlha yang fa re ka tlhomamisa gore Jehofa o iketleeditse tota go re naya maatla a re a tlhokang fa re lebane le teko? Dikarabo tsa dipotso tseno re ka di bona mo ditshwantshong tsa ga Jesu tse pedi.

Rapela o sa Kgaotse

3, 4. Jesu o ne a bolela setshwantsho sefe, mme o ne a se amanya jang le thapelo?

³ Mongwe wa barutwa ba ga Jesu o kile a kopa jaana: “Morena, re rute kafa re ka rapelang ka gone.” (Luke 11:1) Jesu o ne a araba ka go bolelela barutwa ba gagwe ditshwantsho tse pedi tse di tsamaisanang. Sa ntlha ke sa motho yo o nang le moeng, mme sa bobedi ke sa rre yo o reetsang morwawe. A re sekasekeng sengwe le sengwe sa ditshwantsho tseno tse pedi.

⁴ Jesu o ne a re: “Ke mang wa lona yo e tla reng a na le tsala a tla yang kwa go yone bosigogare a ba a e raya a re, ‘Tsala, nkadime dinkgwe di le tharo, ka gonne tsala ya me e sa tswa go tla mo go nna e le mo loetong mme ga ke na sepe go se baya fa pele ga yone’? Mme yole yo o kafa teng fa a fetola a re, ‘Tlogela go ntshwenya. Setswalo se setse se lotletswe, le bana ba me ba babotlana ba na le nna mo bolaong; nka se tsoge ka go naya sepe.’ Ke a lo bolelela, Le mororo a sa tle go tsoga le go mo naya sepe ka ntlha ya go bo e le tsala ya gagwe, eleruri ka ntlha ya go mo emelela ka bopelokgale ga gagwe o tla nanoga a ba a mo naya dilo le fa e le dife tse a di tlhokang.” Go tswa foo Jesu o ne a tlhalosa kafa setshwantsho seno se amanang ka teng le go rapela, a re: “Jalo ke lo raya ke re, Nnang lo kope, mme lo tla newa; nnang lo senke, mme lo tla bona; nnang lo kokote, mme lo tla bulelwa. Gonne mongwe le mongwe yo o kopang o a amogela, le mongwe le mongwe yo o senkang o a  bona, le mongwe le mongwe yo o kokotang o tla bulelwa.”—Luke 11:5-10.

5. Setshwantsho sa monna yo o kopang a sa kgaotse se re ruta eng ka boikutlo jo re tshwanetseng go nna le jone fa re rapela?

⁵ Setshwantsho seno se se utlwalang sentle sa motho yo o kopang a sa kgaotse se bontsha boikutlo jo re tshwanetseng ra rapela re na le jone. Ela tlhoko gore Jesu a re monna yono o newa se a se tlhokang “ka ntlha ya go mo emelela ka bopelokgale ga gagwe.” (Luke 11:8) Polelwana e e reng “emelela ka bopelokgale” e tlhaga gangwe fela mo Baebeleng. E ranotswe go tswa mo lefokong la Segerika le fa le tlhalosiwa ka tlhamalalo le kayang “go se nne le ditlhong.” Gantsi go se nne le ditlhong ga se nonofo e e rategang. Le fa go ntse jalo, fa go se nne le ditlhong kgotsa go emelela sengwe go dirwa ka lebaka le le utlwalang, e ka nna nonofo e e rategang. Go ntse jalo ka motho yo o nang le moeng yo o tlhalosiwang mo setshwantshong. Ga a tlhabiwe ke ditlhong ka gope go kopa se a se tlhokang a sa kgaotse. E re ka Jesu a re motho yono yo o nang le moeng ke sekao mo go rona, le rona re tshwanetse go rapela re sa kgaotse. Jehofa o batla gore re ‘nne re kope, re nne re senke, re nne re kokote.’ Mme ene o tla “naya moya o o boitshepo ba ba mo kopang.”

6. Mo motlheng wa ga Jesu, mokgwa wa go amogela baeng o ne o lejwa jang?

⁶ Jesu ga a re bontshe fela kafa re tshwanetseng go rapela ka teng—re mo emelela ka bopelokgale—mme o re bontsha le lebaka la go bo re tshwanetse go rapela jalo. E le gore re tlhaloganye thuto eo sentle, re tshwanetse go sekaseka kafa batho ba ba neng ba reeditse setshwantsho sa ga Jesu sa motho yo o nang le moeng yo o neng a kopa a sa kgaotse ba neng ba tsaya ka teng mokgwa wa go tshola baeng. Ditemana di le mmalwa mo Dikwalong di bontsha gore mo metlheng ya Baebele, go tlhokomela baeng e ne e le mokgwa o o neng o tsewa o le botlhokwa, bogolo jang ke batlhanka ba Modimo. (Genesise 18:2-5; Bahebera 13:2) Go se amogele baeng go ne go tlhabisa ditlhong. (Luke 7:36-38, 44-46) Jaanong a re sekasekeng polelo ya ga Jesu gape.

7. Ke ka ntlha yang fa motho yo o nang le moeng mo setshwantshong sa ga Jesu a sa tlhabiwe ke ditlhong go tsosa tsala ya gagwe?

⁷ Motho yo o tlhalosiwang mo setshwantshong seno o tlelwa ke moeng mo gare ga bosigo. O ikutlwa a tshwanetse go naya moeng dijo mme ga a na “sepe go se baya fa pele ga [gagwe].” Ene o tsaya seno e le kgang e e tshwanetseng ya baakanngwa ka potlako! O tshwanetse go lala a bone senkgwe, le fa go ka nna jang. Ka jalo o ya kwa tsaleng ya gagwe a bo a mo tsosa a sa tlhabiwe ke ditlhong. O tlhaeletsa a re: “Tsala, nkadime dinkgwe di le tharo.” O nna a kopa jalo a sa kgaotse go fitlha a newa se a se tlhokang. Jaanong ke gone a ka kgonang go tshola moeng wa gagwe sentle, a na le senkgwe.

Fa go Tlhokwa mo Gontsi, go Kopiwa mo Gontsi

8. Ke eng se se tla re tlhotlheletsang go rapelela moya o o boitshepo re sa kgaotse?

⁸ Setshwantsho seno se bontsha eng malebana le lebaka la go bo re rapela re sa kgaotse? Monna  yo o mo setshwantshong o ne a nna a kopa senkgwe ka gonne a akanya gore go botlhokwa fela thata gore a nne le senkgwe seo gore a tle a kgone go tshola moeng wa gagwe sentle. (Isaia 58:5-7) Fa a se na senkgwe, o ne a ka se kgone go mo tlamela. Ka tsela e e tshwanang, e re ka re lemoga gore go nna le moya wa Modimo go botlhokwa thata mo go direng bodiredi jwa rona re le Bakeresete ba boammaaruri, re nna re rapela Modimo re mo kopa gore a re fe moya oo. (Sekarea 4:6) Fa re se na one re tla palelwa. (Mathaio 26:41) A o bona tshwetso e e botlhokwa e re ka e dirang ka go sekaseka setshwantsho seno? Fa re tsaya moya wa Modimo e le sengwe se re se tlhokang ka potlako, re tla o kopa re sa kgaotse.

9, 10. (a) Tshwantsha gore ke ka ntlha yang fa re tshwanetse go rapela re sa kgaotse fa re kopa moya wa Modimo. (b) Re tshwanetse go ipotsa potso efe, mme ka ntlha yang?

⁹ A re tliseng setshwantsho seno mo motlheng wa rona. A re re mongwe mo gae o tsogelwa ke bolwetse mo gare ga bosigo. A o ne o tla tsosa ngaka o kopa thuso? O ne o ka se dire jalo fa molwetse a sa gatelelwa. Mme fa e le gore o ema pelo, o ne o ka se tlhabiwe ke ditlhong go bitsa ngaka. Ka ntlha yang? Ka gonne o lebane le seemo sa tshoganyetso. O lemoga gore o tlhoka thuso ka potlako. Fa o sa kope thuso, molwetse a ka nna a swa. Ka tsela e e tshwanang, re ka re Bakeresete ba boammaaruri ba lebane le seemo se se tswelelang pele sa tshoganetso. Aitsane, Satane o tsamayatsamaya jaaka “tau e e kurutlang,” a leka go re kometsa. (1 Petere 5:8) Re tlhoka thuso ya moya wa Modimo fela thata gore re nne re thantse semoyeng. Go se kope thuso ya Modimo go ka felela ka gore re swe semoyeng. Ka gone, re kopa moya o o boitshepo wa Modimo ka bopelokgale re sa kgaotse. (Baefeso 3:14-16) Fa re dira jalo ke gone fela re ka nnang re na le maatla a re a tlhokang ‘go itshoka go ya bokhutlong.’—Mathaio 10:22; 24:13.

¹⁰ Ka jalo go botlhokwa gore ka dinako tse dingwe re eme re ipotse, ‘A ruri ke rapela ke sa kgaotse?’ Gakologelwa gore fa re lemoga ka botlalo gore re tlhoka thuso ya Modimo, ruri dithapelo tsa rona tsa go rapelela moya o o boitshepo di ka se kgaotse.

Ke Eng Se se Re Tlhotlheletsang go Rapela ka Tsholofelo?

11. Jesu o ne a dirisa setshwantsho sa rre le morwa jang mo kgannyeng ya thapelo?

¹¹ Setshwantsho sa ga Jesu sa mong gae yo o kopang a sa kgaotse se bontsha boikutlo jwa motho yo o rapelang—modumedi. Setshwantsho se se latelang sone se bontsha boikutlo jwa yo o utlwang dithapelo—Jehofa Modimo. Jesu o ne a botsa a re: “Eleruri, go na le rrabana ofe mo go lona yo, fa morwawe a kopa tlhapi, gongwe a tla mo nayang noga mo boemong jwa tlhapi? Kgotsa fa gape a kopa lee, a tla mo nayang phepheng?” Go tswa foo Jesu o ne a bontsha kafa setshwantsho seno se dirang ka teng, a re: “Jalo, fa lona, le mororo lo le boikepo, lo itse kafa lo ka nayang bana ba lona dimpho tse di molemo ka gone, a bo Rara yo o kwa legodimong bogolo jang a tla naya moya o o boitshepo ba ba mo kopang!”—Luke 11:11-13.

12. Setshwantsho sa rre yo o utlwang kopo ya morwawe se bontsha jang kafa Jehofa a iketleeditseng ka teng go araba dithapelo tsa rona?

¹² Jesu o ne a dirisa sekai seno sa rre a araba  morwawe go senola kafa Jehofa a ikutlwang ka teng ka batho ba ba mo rapelang. (Luke 10:22) Sa ntlha, ela tlhoko pharologanyo. Jehofa ga a tshwane le monna wa setshwantsho sa ntlha yo o neng a etsaetsega fa a kopiwa thuso. O tshwana le motsadi yo o lorato yo o arabelang ngwana wa gagwe ka potlako fa a kopa sengwe. (Pesalema 50:15) Gape Jesu o senola kafa Jehofa a iketleeditseng go re thusa ka teng ka go bapisa rre wa motho le rre yo o kwa legodimong. A re fa rre wa motho, le fa a “le boikepo” ka ntlha ya boleo jo a bo ruileng, a naya morwawe mpho e e molemo, ruri re ka letela gore Rraarona yo o kwa legodimong, e re ka a le molemo, o tla naya lelapa la gagwe la baobamedi moya o o boitshepo!—Jakobe 1:17.

13. Ke eng se re ka tlhomamisegang ka sone fa re rapela Jehofa?

¹³ Re ithuta eng? Re ka nna le tsholofelo ya gore fa re kopa moya o o boitshepo mo go Rraarona yo o kwa legodimong, ruri a ka rata go re naya se re se kopang. (1 Johane 5:14) Fa re rapela Jehofa gangwe le gape, a ka se re: “Tlogela go ntshwenya. Setswalo se setse se lotletswe.” (Luke 11:7) Mo boemong jwa moo, Jesu o ne a re: “Nnang lo kope, mme lo tla newa; nnang lo senke, mme lo tla bona; nnang lo kokote, mme lo tla bulelwa.” (Luke 11:9, 10) Ee, Jehofa “o tla re araba mo letsatsing le re bitsang ka lone.”—Pesalema 20:9; 145:18.

14. (a) Ke kgopolo efe e e phoso e e tshwenyang batho bangwe ba ba lebanang le diteko? (b) Fa re lebane le diteko, ke ka ntlha yang fa re ka rapela Jehofa ka tsholofelo?

¹⁴ Setshwantsho sa ga Jesu sa rre yo o amegang se gatelela gape gore bomolemo jwa ga Jehofa bo bogolo thata go feta bomolemo jo bo bontshiwang ke motsadi ope wa motho. Ka gone, ga go ope wa rona yo o tshwanetseng le ka motlha a akanya gore diteko tse re lebanang le tsone e ka tswa e le ditiro tsa Modimo a re bontsha gore re a mo kgopisa. Mmaba wa rona yo mogolo Satane, ke ene a batlang gore re ikutlwe jalo. (Jobe 4:1, 7, 8; Johane 8:44) Ga go lebaka lepe la Dikwalo la gore motho a nne le maikutlo a go inyatsa jalo. Jehofa ga a re leke ka “dilo tse di bosula.” (Jakobe 1:13) Ga a re neye teko e e jaaka noga kgotsa phepheng. Rrarona yo o kwa legodimong o naya ‘ba ba mo kopang dilo tse di molemo.’ (Mathaio 7:11; Luke 11:13) Ee, fa re ntse re anaanela bomolemo jwa ga Jehofa le go iketleetsa ga gagwe go re thusa, re tla tlhotlheletsega go rapela ka tsholofelo. Fa re ntse re dira jalo, le rona re tla kgona go bua mafoko a a jaaka a mopesalema yo o neng a kwala jaana: “Ruri Modimo o utlwile; o reeditse lentswe la thapelo ya me.”—Pesalema 10:17; 66:19.

Kafa Moya o o Boitshepo e Leng Mothusi wa Rona ka Teng

15. (a) Jesu o ne a solofetsa eng ka moya o o boitshepo? (b) Tsela nngwe e moya o o boitshepo o re thusang ka yone ke efe?

¹⁵ Pelenyana fela ga loso lwa ga Jesu, o ne a boeletsa kgothatso e a neng a e neile mo ditshwantshong tsa gagwe. O ne a bolelela baaposetoloi ba gagwe jaana a bua ka ga moya o o boitshepo: “Ke tla kopa Rara mme o tla lo naya  mothusi yo mongwe gore a nne le lona ka bosaengkae.” (Johane 14:16) Ka jalo Jesu o ne a solofetsa gore mothusi yono, kgotsa moya o o boitshepo, o ne o tla nna le balatedi ba gagwe mo dinakong tsa moragonyana, go akaretsa mo motlheng wa rona. Tsela nngwe ya botlhokwa e re bonang thuso eo ka yone ke efe gompieno? Moya o o boitshepo o re thusa go itshokela diteko tse di farologaneng. Jang? Moaposetoloi Paulo, yo o neng a lebane le diteko ka boene, o ne a tlhalosa mo lokwalong lo a lo kwaletseng Bakeresete ba kwa Korintha kafa moya wa Modimo o neng wa mo thusa ka teng. A re sekasekeng ka bokhutshwane gore o ne a kwala eng?

16. Seemo sa rona se ka tshwana jang le sa ga Paulo?

¹⁶ Sa ntlha, Paulo o ne a bolelela badumedi ka ene ka tlhamalalo gore o ne a na le “mutlwa mo nameng,” teko ya mofuta mongwe. Go tswa foo o ne a re: “Ke ne ka rapela Morena [Jehofa] gararo ka seno gore o tloge fa go nna.” (2 Bakorintha 12:7, 8) Le fa Paulo a ne a rapela Modimo gore a tlose botlhoko jwa gagwe, ga bo a ka jwa tloga. Gongwe le wena o lebane le seemo se se ntseng jalo gompieno. Fela jaaka Paulo, o ka tswa o ile wa rapela o sa kgaotse e bile o na le tsholofelo, o kopa Jehofa gore a tlose teko nngwe. Le fa go ntse jalo, le fa o ntse o kopa o sa kgaotse, bothata jono ga bo fele. A seo se raya gore Jehofa ga a arabe dithapelo tsa gago le gore moya wa gagwe ga o go thuse? Nnyaa le e seng! (Pesalema 10:1, 17) Ela tlhoko se moaposetoloi Paulo a neng a se bolela morago ga moo.

17. Jehofa o ne a araba dithapelo tsa ga Paulo jang?

¹⁷ Modimo o ne a araba dithapelo tsa ga Paulo ka go mo raya a re: “Bopelonomi jwa me jo bo sa go tshwanelang bo go lekane; gonne maatla a me a a bo a tletse mo bokoeng.” Paulo o ne a re: “Jalo, ke ka mpa ka ipelafatsa ka makoa a me ka go itumela thata, gore maatla a ga Keresete a tle a nnele ruri mo go nna jaaka mogope.” (2 Bakorintha 12:9; Pesalema 147:5) Ka jalo, Paulo o ne a bona gore ka Keresete, tshireletso e e maatla ya Modimo e ne e mo okame jaaka mogope. Gompieno, Jehofa o araba dithapelo tsa rona ka tsela e e tshwanang. O tsharolola tshireletso ya gagwe jaaka mogope mo godimo ga batlhanka ba gagwe.

18. Ke ka ntlha yang fa re kgona go itshokela diteko?

¹⁸ Gone ke boammaaruri gore mogope ga o kganele pula go na kgotsa phefo go foka, mme gone o sireletsa motho go se kae mo dilong tseo. Ka tsela e e tshwanang, tshireletso ya “maatla a ga Keresete” ga e thibele diteko kgotsa mathata go re wela. Le fa go ntse jalo, gone e re naya tshireletso ya semoya mo dilong tse di kotsi tsa lefatshe leno le mo ditlhaselong tsa mmusi wa lone, Satane. (Tshenolo 7:9, 15, 16) Ka jalo, tota le fa o lebane le teko e e sa ‘tlogeng fa go wena,’ o ka tlhomamisega gore Jehofa o itse bothata jo o mo go jone le gore o arabile “modumo wa selelo sa gago.” (Isaia 30:19; 2 Bakorintha 1:3, 4) Paulo o ne a kwala a re: “Modimo o a ikanyega, e bile ga a na go lo lesa lo raelwa go feta se lo ka se itshokelang, mme mmogo le thaelo gape o tla dira tsela ya go tswa gore lo kgone go e itshokela.”—1 Bakorintha 10:13; Bafilipi 4:6, 7.

19. O ikemiseditse go dira eng, mme ka ntlha yang?

¹⁹ Gone ke boammaaruri, ‘metlha ya bofelo’ ya lefatshe leno le le boikepo e re leng mo go yone gompieno e bonala ka “dinako tsa mathata tse go leng boima go lebana le tsone.” (2 Timotheo 3:1) Le fa go ntse jalo, batlhanka ba Modimo ba ka kgona go lebana le tsone. Jang? Ka thuso le tshireletso ya moya o o boitshepo wa Modimo, o Jehofa a o nayang ka go rata le ka bontsi a o naya botlhe ba ba o kopang mo go ene ba sa kgaotse e bile ba na le tsholofelo. Ka jalo, e kete re ka ikemisetsa gore re nne re rapelela moya o o boitshepo letsatsi le letsatsi.—Pesalema 34:6; 1 Johane 5:14, 15.

O ne O ka Araba Jang?

• Re tshwanetse go dira eng gore re bone moya o o boitshepo wa Modimo?

• Ke ka ntlha yang fa re ka tlhomamisega gore Jehofa o tla araba dithapelo tsa rona fa re kopa moya o o boitshepo?

• Moya o o boitshepo o re thusa jang go itshokela diteko?

[Dipotso Tsa Thuto]

[Setshwantsho mo go tsebe 21]

Setshwantsho sa ga Jesu sa motho yo o neng a na le moeng a bo a kopa a sa kgaotse se ka re ruta eng?

[Setshwantsho mo go tsebe 22]

A o rapelela moya o o boitshepo wa Modimo o sa kgaotse?

[Setshwantsho mo go tsebe 23]

Setshwantsho sa rre yo o lorato se re ruta eng kaga Jehofa?