Jehofa o Tla ‘Dira Gore Tshiamiso e Dirwe’

“A Modimo ga a na go dira gore ba ba tlhophilweng ba gagwe ba ba goelang kwa go ene motshegare le bosigo ba direlwe tshiamiso?”—LUKE 18:7.

1. Ke bomang ba ba go kgothatsang, mme ka ntlha yang?

MO LEFATSHENG lotlhe, Basupi ba ga Jehofa ba itumelela go dirisana le bakaulengwe le bokgaitsadi ba bone ba Bakeresete ba ba nang le dingwaga tse dintsi ba direla Jehofa ka boikanyegi. A go na le bangwe ba batho bano ba ba rategang ba o ba itseng? Gongwe o gopola kgaitsadi mongwe yo o godileng yo o kolobeditsweng dingwaga tse dintsi tse di fetileng, mme a tla dipokanong kwa Holong ya Bogosi ka dinako tsotlhe. Kgotsa o ka akanya ka mokaulengwe mongwe yo o godileng yo o emang nokeng dithulaganyo tsa phuthego tsa bodiredi jwa tshimo beke le beke mme a na le dingwaga tse dintsi a ntse a dira jalo. Gone ke boammaaruri, ba le bantsi ba batho bano ba ba ikanyegang ba ne ba akanya gore gone jaanong Haramagedona e ka bo e setse e tlile ya ba ya feta. Le fa go ntse jalo, lebaka la go bo lefatshe leno le le se nang tshiamiso le sa ntse le le teng ga le a koafatsa tumelo ya bone mo ditsholofetsong tsa ga Jehofa le boikemisetso jwa bone jwa go ‘itshoka go ya bokhutlong.’ (Mathaio 24:13) Tumelo e kgolo e e bontshiwang ke batlhanka ba ba ikanyegang jalo ba ga Jehofa ruri e kgothatsa phuthego yotlhe.—Pesalema 147:11.

2. Ke seemo sefe se se re utlwisang botlhoko?

² Le fa go ntse jalo, ka dinako tse dingwe re ka nna ra bona sengwe se se farologaneng thata le seo. Basupi bangwe ba ne ba nna le seabe mo bodireding ka dingwagangwaga, mme fa nako e ntse e ya tumelo ya bone mo go Jehofa e ile ya koafala, mme ba ne ba tlogela go kopanela le phuthego ya Bokeresete. Go re utlwisa botlhoko gore bangwe ba re kileng ra bo re kopanela le bone ba tlogetse Jehofa, mme re eletsa thata go tswelela re thusa ‘nku nngwe le nngwe e latlhegileng’ gore e boele mo letsomaneng. (Pesalema 119:176; Baroma 15:1) Le fa go ntse jalo, diphelelo tseno tse di sa tshwaneng—ba bangwe ba tswelela ba na le tumelo e bile ba tlhagafetse fa ba bangwe ba felelwa ke tumelo ba bo ba tlogela phuthego—di baka dipotso. Ke eng se se dirang gore Basupi ba le bantsi ba tswelele ba na le tumelo mo ditsholofetsong tsa ga Jehofa mme ya ba bangwe yone e fela? Ke eng se motho a ka se dirang go tlhomamisa gore tumelo ya gagwe ya gore “letsatsi le legolo la ga Jehofa” le atametse e nna e nonofile? (Sefania 1:14) A re sekasekeng setshwantsho se se mo Efangeleng ya ga Luke.

Tlhagiso Mo go Ba ba Leng Teng “Fa Morwa Motho a Goroga”

3. Ke mang yo o ka solegelwang molemo thata ke setshwantsho sa motlholagadi le moatlhodi, mme ka ntlha yang?

³ Mo go Luke kgaolo 18, go na le setshwantsho sa ga Jesu sa motlholagadi le moatlhodi. Se tshwana le se re tlotlileng ka sone mo setlhogong se se fetileng sa motho yo o neng a na le moeng a bo a kopa a sa kgaotse. (Luke 11:5-13) Le fa go ntse jalo, mafoko a a dikologileng ditemana tsa Baebele tse di buang ka setshwantsho sa motlholagadi le moatlhodi a bontsha gore se dira segolobogolo mo bathong ba ba leng teng “fa Morwa motho a goroga” a na le maatla a Bogosi, e leng nako e e simologileng ka 1914.—Luke 18:8. *

4. Jesu o ne a tlotla ka eng pele a anela setshwantsho se se mo go Luke kgaolo 18?

⁴ Pele Jesu a anela setshwantsho seo, o ne a bolela gore bosupi jwa go nna gone ga gagwe  a le mo maatleng a Bogosi bo ne bo tla bonala gongwe le gongwe “jaaka logadima” fa “lo phatsima go tswa karolong e nngwe kafa tlase ga legodimo go ya karolong e nngwe kafa tlase ga legodimo.” (Luke 17:24; 21:10, 29-33) Le fa go ntse jalo, bontsi jwa batho ba ba tshelang ‘mo motlheng wa bokhutlo’ ba ne ba ka se tseye tsia bosupi joo jo bo bonalang sentle. (Daniele 12:4) Ka ntlha yang? Ka lone lebaka le le dirileng gore batho ba motlha wa ga Noa le wa ga Lote ba tlhokomologe ditlhagiso tsa ga Jehofa. Bogologolo mo metlheng eo, batho ‘ba ne ba a ja, ba a nwa, ba reka, ba rekisa, ba jala, ba aga go fitlha ka letsatsi le ba neng ba senngwa ka lone.’ (Luke 17:26-29) Ba ne ba swa ka gonne ba ne ba tshwaregile thata ka ditiro tseo tse di tlwaelegileng mo ba neng ba tlhokomologa thato ya Modimo. (Mathaio 24:39) Gompieno, bontsi jwa batho le bone ba tshwaregile thata mo ditirong tsa letsatsi le letsatsi mo ba sa boneng bosupi jwa gore lefatshe leno le le bosula le tloga le fela.—Luke 17:30.

5. (a) Jesu o ne a tlhagisa bomang, mme ka ntlha yang? (b) Ke eng se se dirileng gore bangwe ba felelwe ke tumelo?

⁵ Go bonala sentle gore Jesu o ne a amegile ka gore balatedi ba gagwe le bone ba ne ba ka itewa tsebe ke lefatshe la ga Satane mo ba neng ba ka “boela kwa dilong tse di kwa morago.” (Luke 17:22, 31) Mme Bakeresete bangwe ba diragaletswe ke sone seo. Ba ne ba ntse ba letile ka dingwaga di le dintsi gore Jehofa a fedise lefatshe leno le le boikepo. Le fa go ntse jalo, fa Haramagedona e sa tle ka nako e ba neng ba lebeletse ka yone, ba ne ba kgobega marapo. Tumelo ya bone ya gore letsatsi la katlholo ya ga Jehofa le atametse e ne ya fela. Ba ne ba goga dinao mo bodireding mme ka iketlo ba tshwarega ka dilo tse e seng tsa sepe tsa botshelo mo ba ileng ba se ka ba salelwa ke nako e ntsi ya go dira dilo tsa semoya. (Luke 8:11, 13, 14) Fa nako e ntse e ya, ba ne ba “boela kwa dilong tse di kwa morago”—a bo go utlwisa botlhoko jang!

Re Tlhoka go “Rapela ka Metlha”

6-8. (a) Bolela setshwantsho sa motlholagadi le moatlhodi. (b) Jesu o ne a tlhalosa setshwantsho seo jang?

⁶ Re ka dira eng go tlhomamisa gore tumelo ya rona e e nonofileng ya gore ditsholofetso tsa ga Jehofa di tla diragadiwa ga e koafale? (Bahebera 3:14) Jesu o ne a araba potso eo fela fa a sena go tlhagisa barutwa gore ba se ka ba boela kwa lefatsheng le le boikepo la ga Satane.

⁷ Luke o bega gore Jesu o ne “a ba bolelela setshwantsho malebana le gore ba tlhoka go rapela ka metlha le gore ba se ka ba lesa.” Jesu o ne a re: “Mo motseng mongwe go ne go na le moatlhodi mongwe yo o neng a sa boife Modimo e bile a sa tlotle motho. Mme go ne go na le motlholagadi mongwe mo motseng oo mme a nna a ya kwa go ene, a re, ‘Tlhokomela gore ke bone tshiamiso mo go mmaba wa me kwa molaong.’ Ebu, go fetile sebaka a ntse a sa batle, mme morago ga moo a ithaya a re, ‘Le mororo ke sa boife Modimo kgotsa ke sa tlotle motho, le fa go ntse jalo, ka ntlha ya go tshwenngwa ke motlholagadi yono a sa kgaotse, ke tla tlhokomela gore a bone tshiamiso, gore a tle a se ka a nna a tla mme a ntitaaka go feta selekanyo.’”

 ⁸ Fa Jesu a sena go anela setshwantsho, o ne a se tlhalosa jaana: “Utlwang se moatlhodi, le mororo a sa siama, a neng a se bua! Eleruri, a Modimo ga a na go dira gore ba ba tlhophilweng ba gagwe ba ba goelang kwa go ene motshegare le bosigo ba direlwe tshiamiso, le mororo a itshwere ka bopelotelele malebana le bone? Ke a lo bolelela, O tla dira gore ba direlwe tshiamiso ka bofefo. Le fa go ntse jalo, fa Morwa motho a goroga, a tota o tla fitlhela tumelo mo lefatsheng?”—Luke 18:1-8.

“Tlhokomela Gore ke Bone Tshiamiso”

9. Go gatelelwa kgang efe mo setshwantshong sa motlholagadi le moatlhodi?

⁹ Kgang ya konokono ya setshwantsho seno e bonala sentle. E umakwa ke batho ba babedi ba ba mo setshwantshong seno le ke Jesu. Motlholagadi o ne a ikopela jaana: “Tlhokomela gore ke bone tshiamiso.” Moatlhodi o ne a re: “Ke tla tlhokomela gore a bone tshiamiso.” Jesu o ne a botsa a re: “A Modimo ga a na go dira gore . . . ba direlwe tshiamiso?” Mme Jesu o ne a bolela jaana kaga Jehofa: “O tla dira gore ba direlwe tshiamiso ka bofefo.” (Luke 18:3, 5, 7, 8) Ke leng segolobogolo Modimo a tla ‘dirang gore tshiamiso e dirwe’?

10. (a) Tshiamiso e ne ya diragadiwa leng mo lekgolong la ntlha la dingwaga? (b) Batlhanka ba Modimo gompieno ba tla direlwa tshiamiso leng le gone jang?

¹⁰ Mo lekgolong la ntlha la dingwaga, “malatsi a go diragatsa tshiamiso” (kgotsa, “metlha ya pusoloso,” Kingdom Interlinear) a ne a goroga fa Jerusalema e ne e senngwa le tempele ya yone ka 70 C.E. (Luke 21:22) Mo bathong ba Modimo gompieno, tshiamiso e tla dirwa ka “letsatsi le legolo la ga Jehofa.” (Sefania 1:14; Mathaio 24:21) Ka nako eo, Jehofa o tla ‘duela ka pitlagano ba ba pitlaganyang’ batho ba gagwe “jaaka [Jesu Keresete] a tlisa pusoloso mo go ba ba sa itseng Modimo le ba ba sa reetseng dikgang tse di molemo kaga Morena wa rona Jesu.”—2 Bathesalonika 1:6-8; Baroma 12:19.

11. Tshiamiso e tla tla “ka bofefo” ka tsela efe?

¹¹ Mme re tshwanetse ra tlhaloganya jang mafoko a ga Jesu a a re tlhomamisetsang gore Jehofa o tla dira gore tshiamiso e dirwe “ka bofefo”? Lefoko la Modimo le bontsha gore “le mororo [Jehofa] a itshwere ka bopelotelele,” o tla diragatsa tshiamiso ka bonako fa nako e tshwanela. (Luke 18:7, 8; 2 Petere 3:9, 10) Mo motlheng wa ga Noa, fa Morwalela o tla, baikepi ba ne ba senngwa ka bofefo. Ka tsela e e tshwanang, mo motlheng wa ga Lote molelo o ne wa fologa kwa legodimong wa laila baikepi. Jesu o ne a re: “Go tla nna ka yone tsela eo mo letsatsing leo fa Morwa motho ruri a tla bo a senolwa.” (Luke 17:27-30) Le fano baikepi ba tla diragalelwa ke “tshenyego ya tshoganyetso.” (1 Bathesalonika 5:2, 3) Ee ruri, re ka tlhomamisega ka botlalo gore Jehofa ga a ne a letla lefatshe la ga Satane le tswelela pele le le teng ka lobaka lo lo fetang lo lo tlhokegang gore go diragadiwe tshiamiso.

‘O Tla Dira Gore ba Direlwe Tshiamiso’

12, 13. (a) Setshwantsho sa ga Jesu sa motlholagadi le moatlhodi se re ruta thuto efe? (b) Ke ka ntlha yang fa re ka tlhomamisa gore Jehofa o tla utlwa dithapelo tsa rona mme a dire gore tshiamiso e diragadiwe?

¹² Setshwantsho sa ga Jesu sa motlholagadi le moatlhodi se gatelela dintlha tse dingwe gape tsa botlhokwa tsa boammaaruri. Fa Jesu a tlhalosa setshwantsho seo o ne a re: “Utlwang se moatlhodi, le mororo a sa siama, a neng a se bua! Eleruri, a Modimo ga a na go dira gore ba ba tlhophilweng ba gagwe . . . ba direlwe tshiamiso?” Gone Jesu o ne a sa tshwantshe Jehofa le moatlhodi jaaka e kete Modimo o ne a ka tshwara badumedi ka tsela e e ntseng jalo. Go na le moo, Jesu o ne a ruta balatedi ba gagwe thuto kaga Jehofa ka go bontsha pharologanyo fa gare ga moatlhodi yoo le Modimo. Dingwe tsa ditsela tse ba farologanang ka tsone ke dife?

¹³ Moatlhodi yo o mo setshwantshong sa ga Jesu o ne ‘a sa siama,’ mme “Modimo ke Moatlhodi yo o siameng.” (Pesalema 7:11; 33:5) Moatlhodi o ne a sa amege ka gope ka motlholagadi, mme Jehofa o kgatlhegela motho mongwe le mongwe. (2 Ditiragalo 6:29, 30) Moatlhodi o ne a sa iketleeletsa go thusa motlholagadi, mme Jehofa o a batla—ee, o iketleeditse—go thusa batho ba ba mo direlang. (Isaia 30:18, 19) Re ithuta eng? Fa moatlhodi yo o sa siamang a ile a reetsa dikopo tsa motlholagadi mme a mo naya tshiamiso, ruri Jehofa o tla utlwa dithapelo tsa batho  ba gagwe mme a dire gore ba direlwe tshiamiso!—Diane 15:29.

14. Ke ka ntlha yang fa re sa tshwanela go felelwa ke tumelo malebana le go tla ga letsatsi la Modimo la katlholo?

¹⁴ Ka jalo, ba ba felelwang ke tumelo malebana le go tla ga letsatsi la Modimo la katlholo ba dira phoso e e masisi. Ka ntlha yang? Ka gonne fa ba felelwa ke tumelo e e nonofileng ya gore “letsatsi le legolo la ga Jehofa” le gaufi, tota ba bontsha go belaela gore a Jehofa a ka ikanngwa gore a diragatse ditsholofetso tsa gagwe ka boikanyegi. Mme ga go ope yo o nang le tshwanelo ya go belaela boikanyegi jwa Modimo. (Jobe 9:12) Potso e e botlhokwa ke gore, A rona re tla tswelela re ikanyega? Mme ke yone kgang e Jesu a neng a e tsosa kwa bofelong jwa setshwantsho sa motlholagadi le moatlhodi.

“A Tota o Tla Fitlhela Tumelo Eno mo Lefatsheng?”

15. (a) Jesu o ne a botsa potso efe, mme ka ntlha yang? (b) Re tshwanetse ra ipotsa eng?

¹⁵ Jesu o ne a botsa potso e e dirang gore motho a akanye a re: “Fa Morwa motho a goroga, a tota o tla fitlhela tumelo eno mo lefatsheng?” (Luke 18:8, ntlha e e kwa tlase go NW) Polelwana e e reng “tumelo eno” e bontsha gore Jesu o ne a sa bue ka tumelo ka kakaretso fela mme o ne a bua ka tumelo ya mofuta o o rileng—tumelo e e jaaka e motlholagadi a neng a na le yone. Jesu ga a ka a araba potso e a e boditseng. O ne a e botsa gore barutwa ba gagwe ba akanye ka tumelo ya bone gore e ntse jang. A e ne e ntse e koafala ka iketlo, mo e leng gore ba ne ba le mo kotsing ya go boela kwa dilong tse ba neng ba di tlogetse kwa morago? Kgotsa a ba ne ba na le mofuta wa tumelo e e tshwanang le ya motlholagadi? Gompieno, le rona re tshwanetse go ipotsa gore, ‘“Morwa motho” o fitlhela tumelo e e ntseng jang mo pelong ya me?’

16. Motlholagadi o ne a na le tumelo e e ntseng jang?

¹⁶ E le gore re nne bangwe ba bao ba tla amogelang tshiamiso ya ga Jehofa, re tshwanetse go latela tsela e e tserweng ke motlholagadi yole. O ne a na le tumelo e e ntseng jang? O ne a bontsha tumelo ya gagwe ka go nna “a ya kwa [moatlhoding], a re, ‘Tlhokomela gore ke bone tshiamiso.’” Motlholagadi yoo o ile a nna a kopa tshiamiso a sa kgaotse mo mothong yo o sa siamang. Ka tsela e e tshwanang, batlhanka ba Modimo gompieno ba ka tlhomamisega gore ba tla newa tshiamiso ya ga Jehofa—le fa go ka tsaya lobaka lo loleele go feta kafa ba neng ba lebeletse ka teng. Gape ba bontsha gore ba ikanya ditsholofetso tsa Modimo ka go rapela ba sa kgaotse—ee, ka go ‘goela kwa go Jehofa motshegare le bosigo.’ (Luke 18:7) Ee ruri, fa Mokeresete a ne a ka tlogela go rapelela gore tshiamiso e dirwe, seo se ne se tla bontsha gore o feletswe ke tsholofelo ya gore Jehofa o tla tsaya kgato go namola batlhanka ba gagwe.

17. Ke mabaka afe a re nang le one a gore re nnele ruri mo thapelong mme re nne re na le tumelo ya gore letsatsi la ga Jehofa la katlholo ruri le tla tla?

¹⁷ Maemo a motlholagadi yoo a neng a le mo go one a re bontsha gore re na le mabaka a a oketsegileng a go rapela re sa kgaotse. Ela tlhoko dingwe tsa dipharologano fa gare ga seemo sa gagwe le sa rona. Motlholagadi o ne a nna a ya kwa moatlhoding le fa a ne a sa kgothadiwe ke ope go dira jalo, mme Lefoko la Modimo le re kgothatsa thata gore re ‘nnele ruri mo thapelong.’ (Baroma 12:12) Go ne go se na sepe se se tlhomamisetsang motlholagadi gore dikopo tsa gagwe di tla arabiwa, mme Jehofa o re tlhomamiseditse gore tshiamiso e tla dirwa. Jehofa o ne a bua jaana a dirisa moporofeti wa gagwe: “Le fa e ka diega, nna o e lebeletse; gonne ruri e tla diragala. Ga e kitla e tla morago ga nako.” (Habakuke 2:3; Pesalema  97:10) Motlholagadi o ne a se na mothusi yo o ka mmuelelang go nonotsha kopo ya gagwe. Mme rona re na le mothusi yo o maatla, Jesu, “yo a leng kafa seatleng sa moja sa Modimo, yo gape a re rapelelang.” (Baroma 8:34; Bahebera 7:25) Ka jalo, fa motlholagadi, le fa a ne a le mo seemong se se thata, a ile a nna a kopa moatlhodi ka tsholofelo ya gore tshiamiso e tla dirwa, a bo re tshwanetse ra nna re dumela thata gore letsatsi la ga Jehofa la katlholo ruri le tla tla!

18. Thapelo e tla nonotsha tumelo ya rona jang e bo e re thuse gore re direlwe tshiamiso?

¹⁸ Setshwantsho sa motlholagadi se re ruta gore thapelo le tumelo di a tsamaisana tota le gore go nna re rapela re sa kgaotse go ka lwantsha tlhotlheletso epe e e neng e ka koafatsa tumelo ya rona. Gone ke boammaaruri gore seno ga se bolele gore dithapelo tse di direlwang go itshupa fela di ka thibela gore o se felelwe ke tumelo. (Mathaio 6:7, 8) Fa re tlhotlheletsega go rapela ka gonne re bona gore re ikaegile gotlhelele ka Modimo, thapelo e re atametsa gaufi le Modimo e bile e nonotsha tumelo ya rona. Mme e re ka re tlhoka tumelo gore re bolokwe, Jesu o ne a bona go tlhokega go kgothatsa barutwa ba gagwe gore ba ‘rapele ka metlha le gore ba se ka ba lesa’! (Luke 18:1; 2 Bathesalonika 3:13) Gone ke boammaaruri, go tla ga “letsatsi le legolo la ga Jehofa” ga go laolwe ke dithapelo tsa rona—go tla tla le fa re go rapelela kgotsa re sa go rapelele. Mme tumelo e re nang le yone le tsela e e siameng ya botshelo e re e latelang ka thapelo ke yone e tla laolang gore a re tla bontshiwa tshiamiso re bo re falole ntwa ya Modimo kgotsa nnyaa.

19. Re supa jang go dumela tota gore Modimo o tla ‘dira gore tshiamiso e dirwe’?

¹⁹ Jaaka fa re ka gopola, Jesu o ne a botsa jaana: “Fa Morwa motho a goroga, a tota o tla fitlhela tumelo eno mo lefatsheng?” Karabo ya potso eno ya reng? A bo re itumela jang ne gore batlhanka ba ba ikanyegang ba ga Jehofa ba le dimilione go dikologa lefatshe gompieno ba supa ka dithapelo tsa bone, bopelotelele jwa bone le boitshoko jwa bone gore ba na le yone tumelo eno! Ka jalo, potso ya ga Jesu e ka arabiwa ka ee. Le fa lefatshe la ga Satane gone jaanong le sa re direle tshiamiso, re dumela tota gore Modimo o tla “dira gore ba ba tlhophilweng ba gagwe . . . ba direlwe tshiamiso.”

[Ntlha e e kwa tlase]

A o A Gopola?

• Ke eng se se bakileng gore Bakeresete bangwe ba felelwe ke tumelo?

• Ke ka ntlha yang fa re ka nna le tumelo e e nonofileng ya gore letsatsi la ga Jehofa la katlholo le etla?

• Re na le mabaka afe a go nnela ruri mo thapelong?

• Go rapela re sa kgaotse go tla re thusa jang gore re se ka ra felelwa ke tumelo?

[Dipotso Tsa Thuto]

[Setshwantsho mo go tsebe 26]

Ke eng se se gatelelwang ke setshwantsho sa motlholagadi le moatlhodi?

[Ditshwantsho mo go tsebe 29]

Batho ba le dimilione gompieno ba dumela thata gore Modimo o tla ‘dira gore tshiamiso e dirwe’