“Letsatsi le Legolo la ga Jehofa le Gaufi”

“Letsatsi le legolo la ga Jehofa le gaufi. Le gaufi e bile le itlhaganela thata.”—SEFANIA 1:14.

1, 2. (a) Bakeresete ba emetse letsatsi lefe le le kgethegileng? (b) Re tshwanetse go ipotsa dipotso dife, mme ka ntlha yang?

MORWEETSANA yo o itumetseng o emetse letsatsi la gagwe la lenyalo ka tlhoafalo e kgolo. Mmè yo o moimana o emetse ka pelo e tshweu nako ya fa a tla bo a tshola ngwana. Mmereki yo o lapileng o swegaswega gore malatsi a gagwe a boikhutso a tla leng. Batho bano botlhe ba tshwana ka eng? Botlhe ba emetse letsatsi le le kgethegileng—letsatsi le le tla amang matshelo a bone. Ba amegile maikutlo tota, mme e le ka ditsela tse di farologaneng thata. Letsatsi le ba le emetseng le tla ba la goroga, mme fa le goroga ba solofela gore ba tla bo ba le ipaakanyeditse.

² Bakeresete ba boammaaruri gompieno le bone ba emetse go tla ga letsatsi lengwe le le kgethegileng. Ke “letsatsi la ga Jehofa” le legolo. (Isaia 13:9; Joele 2:1; 2 Petere 3:12) ‘Letsatsi leno la ga Jehofa’ le le tlang ke eng, mme go tla ga lone go tla ama batho jang? Mo godimo ga moo, re ka tlhomamisa jang gore re tla bo re ipaakantse fa le goroga? Go botlhokwa gore re batle dikarabo tsa dipotso tseno gone jaanong ka gonne bosupi bo bontsha gore mafoko a a latelang a Baebele a boammaaruri: “Letsatsi le legolo la ga Jehofa le gaufi. Le gaufi e bile le itlhaganela thata.”—Sefania 1:14.

“Letsatsi le Legolo la ga Jehofa”

3. “Letsatsi le legolo la ga Jehofa” ke eng?

³ “Letsatsi le legolo la ga Jehofa” ke eng? Mo Dikwalong, polelwana e e reng “letsatsi la ga Jehofa” e dirisiwa go kaya dinako tse di kgethegileng tsa fa Jehofa a ne a diragatsa katlholo mo babeng ba gagwe a bo a galaletsa leina la gagwe le legolo. Batho ba ba sa ikanyegeng ba Juda le Jerusalema mmogo le banni ba ba gatelelang ba Babelona le Egepeto botlhe ba ne ba lebana le ‘malatsi a ga Jehofa’ fa a ne a diragatsa dikatlholo tsa gagwe mo go bone. (Isaia 2:1, 10-12; 13:1-6; Jeremia 46:7-10) Le fa go ntse jalo, “letsatsi la ga Jehofa” le legolo go a gaisa otlhe le sa ntse le le kwa pele. Ke “letsatsi” la fa katlholo ya ga Jehofa e tla bo e diragadiwa mo bathong ba ba mo sentseng leina. Le tla simolola ka go senngwa ga “Babelona o Mogolo,” mmuso wa lefatshe lotlhe wa bodumedi jwa maaka, mme le felele ka go senngwa ga tsamaiso yotlhe e e boikepo ya dilo ka ntwa ya Haramagedona.—Tshenolo 16:14, 16; 17:5, 15-17; 19:11-21.

4. Ke ka ntlha yang fa bontsi jwa batho ba tshwanetse ba boifa letsatsi la ga Jehofa le le ntseng le atamela ka bofefo?

⁴ Le fa ba ka tswa ba lemoga seno kgotsa nnyaa, bontsi jwa batho ba tshwanetse ba boifa letsatsi leno le le ntseng le atamela ka bofefo. Ka ntlha yang? Jehofa o araba jaana a dirisa moporofeti Sefania: “Letsatsi leo ke letsatsi la tšhakgalo, letsatsi la matshwenyego le la tlalelo e e mahehe, letsatsi la matsubutsubu le la kgakgabalo, letsatsi la lefifi le la letobo, letsatsi la maru le letobo le lentshontsho.” A bo seo se boifisa jang ne! Gape moporofeti a re: “Ke tla baka go tshwenyega thata mo bathong . . . ka gonne ba leofetse Jehofa.”—Sefania 1:15, 17.

5. Ke ka ntlha yang fa batho ba le dimilionemilione ba lebeletse letsatsi la ga Jehofa ka tlhoafalo?

⁵ Le fa go ntse jalo, ba bangwe ba le dimilionemilione ba lebeletse go tla ga letsatsi la ga Jehofa ka tlhoafalo. Ka ntlha yang? Ba itse gore ke nako ya poloko le go gololwa ga basiami, letsatsi la gore Jehofa ka boene a tlotlomadiwe le leina la gagwe le le galalelang le itshepisiwe. (Joele 3:16, 17; Sefania 3:12-17) Se se laolang gore a batho ba  boifa letsatsi leno kgotsa ba le letela ka tlhoafalo ke gore ba dira eng ka matshelo a bone gone jaanong. O ikutlwa jang ka go atamela ga letsatsi leo? A o le ipaakanyeditse? A lebaka la go bo letsatsi la ga Jehofa le atametse le ama tsela e o tshelang ka yone gone jaanong?

“Go Tla Tla Basotli ka go Sotla ga Bone”

6. Batho ba le bantsi ba leba “letsatsi la ga Jehofa” jang, mme ke ka ntlha yang fa Bakeresete ba boammaaruri ba sa gakgamadiwe ke seno?

⁶ Le fa eno e le kgang e e potlakileng, bontsi jwa banni ba lefatshe ga ba tshwenyege ka “letsatsi la ga Jehofa” le le ntseng le atamela. Ba tshega batho ba ba ba tlhagisang gore le gaufi e bile ba a ba sotla. Seo ga se gakgamatse Bakeresete ba boammaaruri. Ba gopola tlhagiso eno e e kwadilweng ke moaposetoloi Petere: “Lo itse seno, gore mo metlheng ya bofelo go tla tla basotli ka go sotla ga bone, ba tswelela go ya ka dikeletso tsa bone mme ba re: ‘Go kae go nna gone mono ga gagwe mo go solofeditsweng? Aitsane, go tswa letsatsing le borraaronamogologolwane ba neng ba robala mo losong ka lone, dilo tsotlhe di sa ntse di ntse jaaka go tswa kwa tshimologong ya popo.’”—2 Petere 3:3, 4.

7. Ke eng se se tla re thusang gore re nne re gopotse gore dinako di potlakile?

⁷ Ke eng se se tla re thusang gore re se ka ra akanya ka tsela eo ya go belaela mme re nne re gopotse gore dinako di potlakile? Petere o re bolelela jaana: “Ke [kurusa] bokgoni jwa lona jwa go akanya jo bo phepa e le go lo gakolola, gore lo gakologelwe mafoko a a neng a buiwa pelenyana ke baporofeti ba ba boitshepo le taolo ya Morena le Mmoloki ka baaposetoloi ba lona.” (2 Petere 3:1, 2) Fa re ela tlhoko ditlhagiso tsa baporofeti, re tla kgona go ‘kurusa bokgoni jwa rona jwa go akanya jo bo phepa.’ Gongwe re setse re utlwile dikgakololo tseno gantsintsi, mme go botlhokwa gore gone jaanong, go feta le fa e le leng pele, re tswelele re tsaya ditlhagiso tseno tsia.—Isaia 34:1-4; Luke 21:34-36.

8. Ke ka ntlha yang fa batho ba le bantsi ba tlhokomologa dikgakololo tsa Baebele?

⁸ Ke ka ntlha yang fa bangwe ba tlhokomologa dikgakololo tseno? Petere o tswelela pele jaana: “Go ya ka keletso ya bone, ntlha eno ga ba kgone go e lemoga, gore go ne go na le magodimo go tswa bogologolong le lefatshe le eme le kitlane go tswa mo metsing e bile le le mo gare ga metsi ka lefoko la Modimo; mme lefatshe la nako eo le ne la senngwa ka dilo tseo fa le ne le rwalelelwa ka metsi.” (2 Petere 3:5, 6) Ee, go na le batho ba ba sa batleng gore letsatsi la ga Jehofa le tle. Ga ba batle matshelo a bone a kgorelediwa ke sepe. Ga ba batle go ikarabelela mo go Jehofa ka tsela ya bone ya go tshela ka bogagapa! Jaaka Petere a bolela, ba tshela “go ya ka dikeletso tsa bone.”

9. Batho ba ne ba na le boikutlo bofe mo metlheng ya ga Noa le ya ga Lote?

⁹ Ka ntlha ya “keletso ya bone,” basotli bano ba ka mpa ba itlhokomolosa gore Jehofa o ile a tsenelela mo dikgannyeng tsa batho mo nakong e e fetileng. Jesu Keresete mmogo le moaposetoloi Petere ba umaka ditiragalo tse di ntseng jalo di le pedi—‘metlha ya ga Noa’ le ‘metlha ya ga Lote.’ (Luke 17:26-30; 2 Petere 2:5-9) Pele ga Morwalela, batho ba ne ba sa tseye tlhagiso ya ga Noa tsia. Ka tsela e e tshwanang, pele metse ya Sodoma le Gomora e senngwa, Lote “o ne a bonala jaaka motho yo o dirang motlae” mo matlhong a bagwe ba gagwe.—Genesise 19:14.

10. Jehofa o ikutlwa jang ka batho ba ba sa tseyeng tsia?

¹⁰ Go ntse fela jalo le gompieno. Le fa go ntse jalo, ela tlhoko tsela e Jehofa a ikutlwang ka yone ka batho ba ba sa tseyeng tlhagiso tsia: “Ke tla ela  tlhoko batho ba ba itshekileng mo dintsheng tsa bone ba ba buang mo pelong ya bone ba re, ‘Jehofa ga a kitla a dira molemo, e bile ga a kitla a dira bosula.’ Mme khumo ya bone e tla thopiwa le matlo a bone a tla kgakgabadiwa. E bile ba tla aga matlo, mme ga ba kitla ba nna mo go one; le gone ba tla jala masimo a mofine, mme ga ba kitla ba nwa beine ya one.” (Sefania 1:12, 13) Batho ba ka tswelela pele ka ditiro tsa bone tse di tlwaelegileng tsa letsatsi le letsatsi, mme ga ba ne ba solegelwa molemo ka tsela epe e e nnelang ruri ke tiro ya bone e ba e dirang ka natla. Ka ntlha yang? Ka gonne letsatsi la ga Jehofa le tla goroga ka tshoganetso, mme dikhumo dipe tse ba ka tswang ba di kgobokantse di ka se ba boloke.—Sefania 1:18.

“Nna o e Lebeletse”

11. Re tshwanetse go nna re gopotse kgakololo efe?

¹¹ Re tshwanetse go farologana le lefatshe le le boikepo le le re dikologileng mme re nne re gopotse kgakololo eno e e kwadilweng ke moporofeti Habakuke: “Ponatshegelo e sa ntse e na le nako e e tlhomilweng, mme e ntse e itlhaganelela kwa bokhutlong, mme ga e kitla e bua maaka. Le fa e ka diega, nna o e lebeletse; gonne ruri e tla diragala. Ga e kitla e tla morago ga nako.” (Habakuke 2:3) Tota le fa letsatsi leo le ka lebega le diega, go ya kafa rona batho ba ba sa itekanelang re lebang dilo ka teng, re tshwanetse ra gopola gore Jehofa ga a bonya. Letsatsi la gagwe le tla tla ka nako tota, ka ura e batho ba sa e lebelelang.—Mareko 13:33; 2 Petere 3:9, 10.

12. Jesu o ne a tlhagisa ka eng, mme seno se farologana jang le ditiro tsa balatedi ba ba ikanyegang ba ga Jesu?

¹² Fa Jesu a ne a gatelela botlhokwa jwa gore re nne re lebeletse letsatsi la ga Jehofa, o ne a tlhagisa gore tota le bangwe ba balatedi ba gagwe ba ne ba tla lebala gore dinako di potlakile. O ne a bolelela pele jaana ka bone: “Fa go direga gore motlhanka yo o bosula yoo a itheye mo pelong a re, ‘Mong wa me o a diega,’ mme a simolola go itaya batlhankammogo le ene mme a ja a ba a nwa le matagwa a a padileng, mong wa motlhanka yoo o tla tla ka letsatsi le a sa le lebelelang le ka ura e a sa e itseng, mme o tla mo otlhaya ka bopeloethata jo bogolo thata.” (Mathaio 24:48-51) Go fapaana le seo, setlhopha sa motlhanka yo o boikanyego le yo o botlhale se tswelela ka boikanyegi se gopotse gore dinako di potlakile. Setlhopha sa motlhanka se ntse se lebeletse mme se bontshitse gore se ipaakantse. Jesu o se tlhomile gore se “okamele dilo tsa gagwe tsotlhe” tse di mono mo lefatsheng.—Mathaio 24:42-47.

Ba ne Ba Tlhoka go Gopola Gore Dinako di Potlakile

13. Jesu o ne a bontsha jang kafa go neng go tlhokega ka teng go gopola gore dinako di potlakile?

¹³ Bakeresete ba lekgolo la ntlha la dingwaga ba ne ba tshwanetse go nna ba gopotse gore dinako di potlakile. Ba ne ba tshwanetse go tsaya kgato ka potlako ba tshabela kwa Jerusalema fa ba bona motse oo o “dikologilwe ke masole a a thibeletseng.” (Luke 21:20, 21) Seo se diragetse ka ngwaga wa 66 C.E. Ela tlhoko kafa Jesu a ileng a gatelela ka teng gore Bakeresete nako eo ba ne ba tlhoka go gopola gore dinako di potlakile: “A monna yo o kwa godimo ga ntlo a se ka a fologa a ya go ntsha dithoto mo ntlong ya gagwe; mme a monna yo o kwa tshimong a se ka a boela kwa ntlong a ya go tsaya seaparo sa gagwe sa kafa ntle.” (Mathaio 24:17, 18) E re  ka hisitori e bontsha gore Jerusalema e ile ya tswelela pele e le teng ka dingwaga tse dingwe gape tse nnè, ke ka ntlha yang fa Bakeresete ba ne ba tshwanetse go latela mafoko a ga Jesu ka potlako jaana ka 66 C.E.?

14, 15. Ke ka ntlha yang fa go ne go le botlhokwa gore Bakeresete ba lekgolo la ntlha la dingwaga ba tseye kgato ka bonako fa ba bona Jerusalema e dikanyeditswe ke masole a a thibeletseng?

¹⁴ Le fa gone masole a Roma a sa ka a senya Jerusalema go fitlha ka 70 C.E., dingwaga tsa pele ga foo di ne di sa iketla le e seng! Dingwaga tseo di ne di tletse ka thubakanyo le tshololo ya madi. Rahisitori mongwe o tlhalosa seemo sa kwa Jerusalema sa nako eo a re e ne e le nako ya “ntwa ya selegae ya tshololo e e boifisang ya madi, e na le ditiro tsa bosetlhogo jo bogolo.” Go ne go bidiwa makawana gore a nonotshe tshireletso, a tseye dibetsa a bo a tsene mo bosoleng. A ne a katisediwa ntwa letsatsi le letsatsi. Ba ba neng ba sa rate dikgato tse di gagametseng thata ba ne ba tsewa e le baeki. Fa Bakeresete ba ka bo ba ile ba diega mo motseng, ba ka bo ba iphitlhetse ba le mo seemong se se kotsi fela thata.—Mathaio 26:52; Mareko 12:17.

¹⁵ Re tshwanetse ra lemoga gore Jesu o ne a re “ba ba kwa Judea,” e seng Jerusalema fela, ba ne ba tshwanetse ba simolola go tshaba. Seno se ne se le botlhokwa ka gonne dikgwedi di sekae fela morago ga gore masole a Roma a tswe mo Jerusalema, a ne a boa gape a simolola ditiro tsa one tsa ntwa. Sa ntlha, Galalea e ne ya fenngwa ka 67 C.E., go tswa foo Judea e ne ya fenngwa gotlhelele ngwaga o o latelang. Seno se ne sa felela ka bomadimabe jo bogolo go ralala motse. Gape go ne ga ketefalela pele gore Mojuda ope a kgone go sia mo Jerusalema ka boyone. Dikgoro tsa motse di ne di disiwa, mme motho ope yo o neng a leka go sia o ne a tsewa a ya kafa letlhakoreng la Baroma.

16. Bakeresete ba lekgolo la ntlha la dingwaga ba ne ba tshwanetse go nna le boikutlo bofe gore ba falole nako eo ya mathata?

¹⁶ Re ntse re gopotse dintlha tseno tsotlhe, re ka tlhaloganya gore ke ka ntlha yang fa Jesu a ne a gatelela kafa seemo se neng se potlakile ka teng. Bakeresete ba ne ba tshwanetse go iketleetsa go itima dilo dingwe, ba sa itetle go itewa tsebe ke dithoto. Ba ne ba tshwanetse ba iketleetsa go ‘kgaogana le dilo tsa bone tsotlhe’ gore ba ikobele tlhagiso ya ga Jesu. (Luke 14:33) Ba ba neng ba reetsa tlhagiso mme ba tshabela kwa ntlheng e nngwe ya Joredane ka bonako ba ne ba bolokwa.

Go Nna re Gopotse Gore Dinako di Potlakile

17. Ke ka ntlha yang fa re tshwanetse go nna re gopotse gore dinako di potlakile?

¹⁷ Dipolelelopele tsa Baebele di bontsha sentle gore re tshela kwa bokhutlong jwa metlha ya bofelo. Re tshwanetse go nna re gopotse gore dinako di potlakile go feta le fa e le leng pele. Ka nako  ya fa go le kagiso, lesole ga le tlhobaele le go ikutlwa le le mo kotsing jaaka fa go na le ntwa. Le fa go ntse jalo, fa seo se dira gore a ikutlwe a sa tlhoke go nna a ntshitse matlho dinameng mme ka tshoganetso a bo a bilediwa ntweng, a ka tsamaya a sa ipaakanya mme a swela kwa ntweng. Go ntse jalo le ka ntwa ya rona ya semoya. Fa ka iketlo re tlogela go tsaya dinako e le tse di potlakileng, re ka nna ra bo re sa ipaakanyetsa go thiba ditlhaselo tse di re tlelang mme re ka nna ra tshoganyediwa fa letsatsi la ga Jehofa le setse le goroga. (Luke 21:36; 1 Bathesalonika 5:4) Fa go na le bape ba ba ‘katetseng ka morago mo go saleng Jehofa morago,’ jaanong ke nako ya gore ba simolole gape ba mmatle.—Sefania 1:3-6; 2 Bathesalonika 1:8, 9.

18, 19. Ke eng se se tla re thusang gore re nne re lebeletse “go nna gone ga letsatsi la ga Jehofa”?

¹⁸ Ke gone ka moo moaposetoloi Petere a re gakololang gore re nne re gopotse “go nna gone ga letsatsi la ga Jehofa”! Re ka dira seo jang? Tsela e nngwe ke ka go tshwarega “mo ditirong tse di boitshepo tsa boitshwaro le ditiro tsa boineelo jwa bomodimo.” (2 Petere 3:11, 12) Go nna re tshwaregile mo ditirong tse di ntseng jalo go tla re thusa go lebelela pele ka tlhoafalo nako ya go tla ga “letsatsi la ga Jehofa.” Lefoko la Segerika le le ranotsweng go twe ‘go akanya thata ka’ fa le tlhalosiwa ka tlhamalalo le kaya “go itlhaganedisa.” Tota re ka se ka ra itlhaganedisa nako e e saletseng ya go tla ga letsatsi la ga Jehofa. Le fa go ntse jalo, fa re ntse re letetse letsatsi leo, nako e tla lebega e feta ka bonako thata fa re nna re tshwaregile mo tirelong ya Modimo.—1 Bakorintha 15:58.

¹⁹ Go tlhatlhanya ka Lefoko la Modimo le go akanya ka dikgakololo tse di mo go lone le gone go tla re thusa go dira seo—‘go tlhologelelwa go tla ga’ letsatsi leo, ee, go “rata go akofisa” letsatsi leo. (2 Petere 3:12, Baebele e e Boitshepo; Baebele ya Tswana Central) Dingwe tsa dikgakololo tseno ke dipolelelopele tse dintsi tse di bolelelang pele e seng ka go tla ga letsatsi la ga Jehofa fela mme le ka masego a mantsi a a tla tlelang batho ba ba ‘nnang ba lebeletse Jehofa.’—Sefania 3:8.

20. Ke kgakololo efe e re tshwanetseng go e tsaya tsia?

²⁰ Jaanong ke yone nako ya gore rotlhe re tseye tsia kgothatso eno e re e neilweng go dirisiwa moporofeti Sefania: “Pele bogale jo bo tukang jwa ga Jehofa bo tla mo go lona, pele letsatsi la bogale jwa ga Jehofa le tla mo go lona, batlang Jehofa, lona lotlhe ba ba pelonolo ba lefatshe, ba lo dirileng tshwetso ya Gagwe ya boatlhodi. Batlang tshiamo, batlang bopelonolo. Gongwe lo ka nna lwa sujwa mo letsatsing la bogale jwa ga Jehofa.”—Sefania 2:2, 3.

21. Batho ba Modimo ba tla bo ba iketleeleditse go dira eng ka 2007?

²¹ A bo go tshwanela jang he gore temana ya ngwaga e e tlhophetsweng ngwaga wa 2007 e bo e re: “Letsatsi le legolo la ga Jehofa le gaufi.” Batho ba Modimo ba tlhatswegile pelo gore “le gaufi e bile le itlhaganela thata.” (Sefania 1:14) “Ga [le] kitla [le] tla morago ga nako.” (Habakuke 2:3) Ka jalo fa re ntse re emetse letsatsi leo, e kete re ka nna re ntshitse matlho dinameng mo metlheng e re tshelang mo go yone, re lemoga gore go setse go le gaufi gore boporofeti jono bo diragale!

A o Ka Araba?

• “Letsatsi le legolo la ga Jehofa” ke eng?

• Ke ka ntlha yang fa batho ba le bantsi ba tlhokomologa gore dinako di potlakile?

• Ke ka ntlha yang fa Bakeresete ba lekgolo la ntlha la dingwaga ba ne ba tshwanelwa ke go dira dilo ba gopotse gore dinako di potlakile?

• Re ka dira jang gore re nne re gopotse gore dinako di potlakile?

[Dipotso Tsa Thuto]

[Mafoko a a mo go tsebe 19]

Temana ya ngwaga wa 2007 e tla bo e re: “Letsatsi le legolo la ga Jehofa le gaufi.”—Sefania 1:14.

[Ditshwantsho mo go tsebe 16, 17]

Fela jaaka mo motlheng wa ga Noa, basotli ba tla tshoganyediwa fa Jehofa a tsaya kgato

[Setshwantsho mo go tsebe 18]

Bakeresete ba ne ba tshwanelwa ke go tsaya kgato ka bonako fa ba bona Jerusalema e “dikologilwe ke masole a a thibeletseng”