Ke ka Ntlha Yang fa o Tshwanetse go Bua Boammaaruri?

FA Manfred a na le dingwaga di le 18 o ne a thapisiwa go bereka mo ofising. * Khampani e a neng a e berekela e ne ya rulaganya gore ene le ba bangwe ba ba neng ba thapisediwa tiro ba ye kwa kholetšheng malatsi a le mabedi beke le beke. Letsatsi lengwe tlelase e ne ya tswa pele ga nako e e neng e beilwe. Go ya ka melao ya khampani eo, badiri ba ba thapisiwang ba ne ba tshwanetse go boela kwa tirong go fitlha ka nako ya go ya gae. Mme go na le moo, botlhe ba ne ba tsamaya ba ya go ijesa monate, kwa ntle ga ga Manfred, yo o neng a boela kwa tirong. Go ne ga direga gore mookamedi wa khampani yo o tlhokometseng batho ba ba thapisiwang a tle. Fa a bona Manfred o ne a mmotsa a re: “Ke ka ntlha yang fa o se kwa tlelaseng gompieno? Mme badiri ba bangwe ba ba thapisediwang tiro ba kae?” Manfred o ne a tla reng?

Boemo jo bo thata jo Manfred a leng mo go jone bo tlwaelegile. A ke a bue boammaaruri, kana a bue maaka gore a sireletse batho ba a tsenang sekolo le bone? Fa a ne a ka bua boammaaruri o ne a tla tsenya ba bangwe mo mathateng e bile go ne go tla dira gore ba se ka ba mo rata. A go siame gore a ka bua maaka mo maemong ano? Wena o ne o tla dirang? Re tla boa re bua ka Manfred, mma pele re sekaseke gore ke eng se se akarediwang fa re tsaya tshwetso ya gore a ke re bue boammaaruri kana nnyaa.

Boammaaruri le Maaka—Ga di Tsamaisane Gotlhelele

Kwa tshimologong ya batho, sengwe le sengwe se ne se theilwe mo boammaaruring. Go ne go sa tlhakatlhakanngwa dikgang, go ne go sa sokamisiwe boammaaruri. Jehofa, Mmopi, ke “Modimo wa boammaaruri.” Lefoko la gagwe ke boammaaruri; a ka se bue maaka e bile o kgala go bua maaka le baaki.—Pesalema 31:5; Johane 17:17; Tito 1:2.

Fa e le gore go ne go ntse jalo, maaka a tswa kae? Jesu Keresete o ne a ntsha karabo e e boammaaruri fa a ne a raya baganetsi ba bodumedi, ba ba neng ba batla go mmolaya a re: “Lo tswa mo go rraalona Diabolo, mme lo eletsa go dira dikeletso tsa ga rraalona. Ene yoo e ne e le mmolai fa a ne a simologa, mme o ne a se ka a itsetsepela mo boammaaruring, ka gonne boammaaruri ga bo yo mo go ene. Fa a bua maaka, o bua go ya ka tshekamelo ya gagwe, ka gonne ke moaki le ramaaka.” (Johane 8:44) Ee Jesu o ne a bua ka tiragalo  ya kwa tshimong ya Edene fa Satane a ne a tlhotlheletsa batho ba ntlha ba babedi gore ba se ka ba ikobela Modimo mme ba nne baleofi ba bo ba swe.—Genesise 3:1-5; Baroma 5:12.

Mafoko a ga Jesu a bontsha sentle gore Satane ke “ramaaka,” mosimolodi wa maaka. Le gompieno jaana Satane e ntse e le ene motho yo o rotloetsang maaka, tota e bile o ‘tsietsa lefatshe lotlhe le le nang le banni.’ Ke ene a ikarabelelang ka tshenyo e kgolo e maaka a e baketseng batho gompieno.—Tshenolo 12:9.

Go sa tsamaisane gotlhelele mo go leng teng magareng ga boammaaruri le maaka, mo go simolotsweng ke Satane Diabolo, go aname thata gompieno. Go ama batho botlhe mo setšhabeng. Tsela e motho a tshelang ka yone e mmaya mo letlhakoreng la boammaaruri kana la maaka. Batho ba ba mo letlhakoreng la Modimo ba tshela go ya ka boammaaruri jo bo fitlhelwang mo Lefokong la Modimo, Baebele. Ope fela yo o sa tsamayeng mo tseleng ya boammaaruri, o tla wela mo diatleng tsa ga Satane, a lemoga kana a sa lemoge, ka gonne “lefatshe lotlhe le namaletse mo maatleng a yo o boikepo.”—1 Johane 5:19; Mathaio 7:13, 14.

Ke Eng se se Bakang Tshekamelo ya go Bua Maaka?

Lebaka la go bo “lefatshe lotlhe” le namaletse mo maatleng a ga Satane le tlhalosa gore ke ka ntlha yang fa batho ba bantsi ba bua maaka. Re ka nna ra botsa jaana, ‘Ke ka ntlha yang fa Satane, “ramaaka,” a buile maaka?’ Satane o ne a itse gore Jehofa ke Molaodimogolo yo o tshwanetseng wa sotlhe se a se bopileng, go akaretsa batho ba ntlha ba babedi. Le fa go ntse jalo, Satane o ne a ipatlela boemo jono jo bo kwa godimo jo bo tlhomologileng, jo e neng e se jwa gagwe. Ka gonne a ne a le pelotshetlha e bile a rata maemo, o ne a loga maano a go itseela boemo jwa ga Jehofa. Gore Satane a tle a kgone go dira jalo, o ne a dirisa maaka le tsietso.—1 Timotheo 3:6.

Ke eng se se diregang gompieno? A ga o dumele gore bopelotshetlha le go rata maemo e sa ntse e le tsone dilo tsa konokono tse di dirang gore batho ba bantsi ba bue maaka? Kgwebo ya bopelotshetlha, dipolotiki tse di nang le bonokwane, le bodumedi jwa maaka di tletse ka tsietso, maaka, le boferefere. Ka ntlha yang? A ga se ka gonne gantsi batho ba tlhotlhelediwa ke bopelotshetlha le go rata maemo gore ba gatele pele mo botshelong kana gore ba nne le dikhumo, maatla kana maemo a a sa ba lebaganang? Mmusi yo o botlhale, Kgosi Solomone wa Iseraele wa bogologolo, o ne a tlhagisa jaana: “Yo o potlakelang go nna le dikhumo ga a na go nna a se na molato.” (Diane 28:20) Mme moaposetoloi Paulo o ne a re: “Lorato lwa madi ke modi wa mefuta yotlhe ya dilo tse di utlwisang botlhoko.” (1 Timotheo 6:10) Go ntse fela jalo le ka keletso e e feteletseng ya go nna le maatla kana maemo.

Lebaka le lengwe le le dirang gore batho ba ake ke poifo—go boifa gore ditlamorago e tla nna eng kana gore batho ba bangwe ba tla akanyang fa go buiwa boammaaruri. Ke ga tlholego fela gore batho ba batle go ratwa kgotsa go amogelwa ke batho ba bangwe. Le fa go ntse jalo, go batla go ratwa ke batho go ka nna ga dira gore ba sokamise boammaaruri, le fa e le go le gonnye fela, gore ba tle ba bipe makoa, ba fitlhe dilo tse di sa rategeng kana fela gore ba tlhage ba le botoka fa pele ga batho. Go a tshwanela go bo Solomone a ne a kwala jaana: “Go boifa batho ke gone mo go bayang seru, mme yo o ikanyang Jehofa o tla sirelediwa.”—Diane 29:25.

Go Ikanyega mo Modimong wa Boammaaruri

Manfred o ne a reng fa mookamedi wa khampani a ne a batla gore a mo tlhalosetse se se diregileng? Manfred o ne a bua boammaaruri. O ne a re: “Morutabana o re ntshitse pele ga nako, mme nna ke ne ka tla tirong. Nka se buelele ba bangwe. Go ka nna botoka gore o ba ipoletse.”

Manfred o ne a ka itira letlhale ka go mo naya karabo e e seng boammaaruri, mme seo se ne se tla dira gore badirimmogo le ene ba mo rate. Mme o ne a na le mabaka a a utlwalang a go bua boammaaruri ka boikanyego. Manfred ke  Mosupi wa ga Jehofa. Boikanyego jwa gagwe bo dirile gore a nne le segakolodi se se se nang molato. Gape bo ne jwa dira gore mothapi wa gagwe a mo ikanye. Manfred o ne a romelwa kwa lefapheng la dibenyane, e le karolo ya thapiso ya gagwe, kwa e leng gore batho ba ba rutwang tiro ga ba ke ba dumelelwa go dira teng. Dingwaga di ka nna 15 morago ga moo fa Manfred a ne a tlhatlosiwa maemo gore a nne le maikarabelo mo khampaning eo, mookamedi ene yoo o ne a mo leletsa mogala a mo akgola a bo a mo gopotsa tiragalo eno ya go bua boammaaruri.

E re ka Jehofa e le Modimo wa boammaaruri, mongwe le mongwe yo o batlang go nna le kamano e e gaufi le ene o tshwanetse go ‘latlha maaka’ le go ‘bua boammaaruri.’ Motlhanka wa Modimo o tshwanetse go rata boammaaruri. Monna yo o botlhale o ne a re: “Mosupi yo o ikanyegang ke yo o se kitlang a bua maaka.” Mme gone, maaka ke eng?—Baefeso 4:25; Diane 14:5.

Maaka ke Eng?

Maaka otlhe ga a boammaaruri, mme ga se dilo tsotlhe tse di seng boammaaruri tse e leng maaka. Jang? Dikishinare nngwe e tlhalosa maaka e re ke “go bua sengwe se motho yo o se buang a itseng kana a dumelang gore ga se boammaaruri mme e le ka maikaelelo a go tsietsa.” Go bua maaka go akaretsa go ikaelela go aketsa motho yo mongwe ka boomo. Ka jalo, go sa bue boammaaruri o sa lemoge—jaaka go naya motho tshedimosetso e e seng yone kana dipalo tse e seng tsone ka phoso—ga go tshwane le go bua maaka.

Gape re tshwanetse go akanyetsa kgang ya gore a motho yo o batlang tshedimosetso e e rileng o tshwanetse go e newa ka botlalo. Ka sekai, a re re Manfred o ne a bodiwa dipotso tseo ke mookamedi wa khampani e sele. A o ne a tla ikutlwa a patelesega go mmolelela sengwe le sengwe? Nnyaa. Ka gonne mookamedi yoo a se na tshwanelo ya go newa tshedimosetso eo, Manfred o ne a tla bo a sa patelesege go e mo naya. Mme gone, le mo boemong jono go ne go tla bo go le phoso gore a bue maaka.

Jesu Keresete o tlhomile sekao sefe mo kgannyeng eno? Nako nngwe, Jesu o ne a bua le batho bangwe ba e neng e se barutwa ba gagwe ba ba neng ba batla go itse ka metsamao ya gagwe. Ba ne ba mo raya ba re: “Tswaa mono o fete o ye kwa Judea.” Jesu o ne a araba jang? “Lona tlhatlogelang kwa moletlong [kwa Jerusalema]; nna ga ke ise ke tlhatlogele kwa moletlong ono, ka gonne nako ya me e e tshwanetseng ga e ise e tle ka botlalo.” Moragonyana fela ga foo, Jesu o ne a ya Jerusalema a ya moletlong. Ke ka ntlha yang fa a ne a ba araba jaaka a ba arabile? Go ne go sa tlhokege gore ba itse metsamao ya gagwe ka botlalo. Ka jalo, le fa Jesu a sa bua maaka, o ba neile karabo e e sa felelang gore ba se ka ba kgona go mo gobatsa kana go gobatsa balatedi ba gagwe. Seno e ne e se maaka ka gonne moaposetoloi Petere o ne a kwala jaana ka Keresete: “Ga a ka a dira boleo bope, le gone ga go a ka ga fitlhelwa tsietso mo molomong wa gagwe.”—1 Petere 2:22.

Petere ene o ne a dirang? Mo bosigong jo Jesu a tshwerweng ka jone, a Petere ga a ka a bua maaka  gararo le go itatola Jesu? Ee, Petere o ne a ineela go boifa batho mme a bua maaka. Mme ka bonako fela o ne a “lela mo go botlhoko” mme a ikwatlhaya mme a itshwarelwa boleo joo. Gape o ne a ithuta sengwe mo phosong e a neng a e dirile. Malatsi moragonyana, o ne a bua phatlalatsa ka Jesu mme a gana go emisa go bua ka ene fa a ne a tshosediwa ke balaodi ba Bajuda kwa Jerusalema. Bokoa jwa ga Petere jwa nakwana le go boa gape a siamisa dilo ka bonako go tshwanetse ga re kgothatsa rotlhe, ba go ka nnang motlhofo gore re fekeediwe ke go nna bokoa ka nakwana mme re dire phoso ka go bua kana ka ditiro.—Mathaio 26:69-75; Ditiro 4:18-20; 5:27-32; Jakobe 3:2.

Boammaaruri bo Tla Nnela Ruri

Diane 12:19 ya re: “Pounama ya boammaaruri ke yone e e tla tlhomamisiwang ka thata ka bosaengkae, mme loleme lwa maaka lo tla nna teng ka nakwana fela.” Boammaaruri bo nnela ruri. Mme dikamano tse batho ba nnang le tsone di a tlhomama e bile di a kgotsofatsa fa batho ba ikemiseditse go bua boammaaruri le go dira dilo go ya ka jone. Go nna boammaaruri go tlisa maduo ka bonako. Mangwe a maduo ano ke go nna le segakolodi se se phepa, leina le le molemo, dikamano tse di molemo mo lenyalong, mo ditsaleng, le mo kgwebong tota.

Mme maaka one a felela a senogile. Leleme le le maaka le ka aketsa batho ka nakwana, mme maaka ga a nnele ruri. Gape, Jehofa, Modimo wa boammaaruri, o beetse maaka le batho ba ba a buang nako e e seng kalo. Baebele e solofetsa gore Jesu o tla fedisa tlhotlheletso ya ga Satane Diabolo, ramaaka, yo o tsietsang lefatshe lotlhe le le nang le banni. Go ise go ye kae, Jehofa o tla fedisa maaka otlhe le baaki.—Tshenolo 21:8.

Go tla nna monate jang fa la bofelo “pounama ya boammaaruri” e tlhomamisiwa ka bosaengkae!

[Ntlha e e kwa tlase]

[Mafoko a a mo go tsebe 5]

Bopelotshetlha le go rata maemo ke dilo tse di dirang gore batho ba bue maaka

[Mafoko a a mo go tsebe 6]

Maaka otlhe ga a boammaaruri, mme ga se dilo tsotlhe tse di seng boammaaruri tse e leng maaka

[Setshwantsho mo go tsebe 6]

Ke eng se re se ithutang mo kgannyeng ya gore Petere a itatole Keresete?

[Setshwantsho mo go tsebe 7]

Go bua boammaaruri go felela ka gore motho a nne le dikamano tse di tlhomameng le tse di kgotsofatsang le ba bangwe