Yone e Motlhofo, Mme Gone a e Boammaaruri?

KA SEPTEMBER 2005, Kereke ya Engelane e ne ya buelela go gololwa ga The 100-Minute Bible ka matlhagatlhaga. E re ka Baebele eno e ntšha e diretswe gore e balwe ka metsotso e le 100, karolo ya yone ya Dikwalo Tsa Sehebera e na le dikarolo tse di nang le ditsebe di le 17 tsa tsebe e le nngwe fela mme Dikwalo Tsa Segerika di na le dikarolo di le 33 tse nngwe le nngwe ya tsone e leng tsebe e le nngwe fela, mme go ya ka mokanoki mongwe, seo se dirile gore go se ka ga tsenngwa dikarolo tsotlhe “tse di lapisang tsa Baebele.” Ee yone e motlhofo go e bala, mme fela a e boammaaruri?

Baithuti ba ba tlhoafetseng ba Baebele ba tla lemoga gore mo Baebeleng eno ga go a tlogelwa fela leina la Modimo, e bong Jehofa, mme gape go na le dilo tse dingwe tse dintsi tse di sa bewang sentle mo go yone. (Pesalema 83:18) Ka sekai, karolo ya ntlha ya re Modimo “o bopile legodimo le lefatshe ka malatsi a le marataro.” Le fa go ntse jalo, Genesise 1:1 yone ya re: “Mo tshimologong Modimo o ne a bopa magodimo le lefatshe.” Go tswa foo pego ya ntlhantlha e tlhalosa ditiro tsa popo go akaretsa go bopiwa ga lefatshe mo go tsereng “malatsi” a le marataro, kana lobaka lwa nako. Go tswa foo Genesise 2:4 e tlhalosa nako yotlhe ya popo, e e bitsa ‘letsatsi le Jehofa Modimo a neng a dira lefatshe le legodimo ka lone.’

Go ya ka The 100-Minute Bible, Jobe, yo e neng e le monna yo o ikanyegang, o ne a tlhaselwa ke “mongwe wa batlhanka [ba Modimo], e bong Satane . . . yo tiro ya gagwe e neng e le go latofatsa batho.” A o kgona go bona gore seno ga se boammaaruri? Lefoko “Satane” le raya “Moganetsi.” Go na le gore Satane e nne motlhanka wa Modimo, tota ke mmaba yo mogolo wa gagwe e bile o itirile molatofatsi wa batho.—Tshenolo 12:7-10.

Go tweng ka karolo ya Dikwalo tsa Bokeresete Tsa Segerika ya The 100-Minute Bible? Mo setshwantshong sa dinku le dipodi, thanolo eno e ntšha ya re Jesu o amogela ba ba thusitseng “ope fela, le fa ba sa thusa go le kalo,” mme tota Jesu o rile o segofatsa ba ba direlang balatedi ba gagwe molemo—“bomorwarraagwe.” (Mathaio 25:40) Mo go Tshenolo gone babadi ba bolelelwa gore “Roma, Babelona o mogolo, o tla senngwa gotlhelele.” Le fa go ntse jalo, baithuti ba Baebele ba itse gore ga go na gope mo mekwalong ya ntlhantlha mo go tlhalosiwang teng gore “Babelona o Mogolo” ke mang.—Tshenolo 17:15–18:24.

Mo bathong ba ba batlang go itse Mmopi wa rona le go tlhaloganya maikaelelo a gagwe, ga go na sepe se se ka emisetsang Baebele e e feletseng. Ke boammaaruri gore go bala Baebele go tla tsaya nako e e fetang metsotso e le 100, mme go dira jalo go solegela molemo thata. (Johane 17:3) E kete o ka ikemisetsa go bala Baebele mme o solegelwe molemo thata.—2 Timotheo 3:16, 17.