Go Tla ga ga Keresete—A re Tshwanetse go go Boifa?

KE ENG se o se akanyang fa go buiwa ka go tla ga ga Jesu Keresete? A o go tsaya e le tiragalo e e tla tlisetsang batho katlholo, bohutsana le kotlhao? Kana a o lebeletse gore go tla fedisa mathata otlhe a rona? A re tshwanetse go boifa go tla ga ga Keresete? Kana re tshwanetse go go letela ka tlhologelo?

Baebele e bua jaana mabapi le go tla ga ga Keresete: “Bona! O tla a le mo marung, mme leitlho lengwe le lengwe le tla mmona, . . . mme ditso tsotlhe tsa lefatshe di tla ititaya di hutsafetse ka ntlha ya gagwe.” (Tshenolo 1:7) Go tla mo go buiwang ka gone fano ke nako ya fa Jesu a tla bo a bonala mo isagweng go tla go duela batho ba ba siameng le go otlhaya ba ba bosula.

Go na le gore moaposetoloi Johane a boife go tla ga ga Keresete, o ne a go tlhologeletswe. Fa Johane a sena go amogela tshenolo ya go tla ga ga Jesu le se go tla se kayang mo lefatsheng, o ne a rapela jaana ka tlhoafalo: “Tla, Morena Jesu.” (Tshenolo 22:20) Mme ke eng fa “ditso tsotlhe tsa lefatshe di . . . ititaya di hutsafetse ka ntlha ya gagwe”? “Leitlho lengwe le lengwe” le tla mmona ka tsela efe? Ke eng se go tla ga ga Keresete go tla se dirang? Go nna le tumelo mo go gone go tla re thusa jang gone jaanong? Setlhogo se se latelang se tla araba dipotso tseno.