“Mosupi yo o ikanyegang mo loaping”

BABOKI le bakwadi ba dipina ga ba bolo go baka ngwedi ka ntlha ya bontle jwa yone. Ka sekai, pina e e tlhotlheleditsweng ke Modimo e bua ka mosadi yo “montle jaaka ngwedi yo o tletseng.” (Sefela sa Difela 6:10) Mme mopesalema o bitsa ngwedi ka tsela ya go boka a re ke “mosupi yo o ikanyegang mo loaping.” (Pesalema 89:37) Polelwana eno e kaya eng fa e bua ka ngwedi?

Ka metlha ngwedi o dikologa lefatshe malatsi mangwe le mangwe a le 27,3. Ka jalo, fa go twe ngwedi o a ikanyega go ka tswa go tewa go dikologa ga one ka metlha o sa tlodise. Le fa go ntse jalo, mopesalema o ka tswa a ne a kaya sengwe se segolo go feta seo. O ne a bitsa ngwedi a re ke “mosupi yo o ikanyegang” mo pineng ya boporofeti e e kaga Bogosi jo Jesu a neng a ruta balatedi ba gagwe gore ba bo rapelele.—Mathaio 6:9, 10.

Dingwaga di feta 3 000 tse di fetileng, Jehofa Modimo o ne a dira kgolagano ya Bogosi le Kgosi Dafide wa Iseraele wa bogologolo. (2 Samuele 7:12-16) Boikaelelo jwa kgolagano eo e ne e le go beela Jesu Keresete, yo e leng moruaboswa wa ga Dafide, motheo o o kafa molaong wa go busa ka bosakhutleng. (Isaia 9:7; Luke 1:32, 33) Fa mopesalema a ne a opela ka setulo sa bogosi sa “losika” lwa ga Dafide, o ne a re: “Se tla tlhomamisiwa ka thata jaaka ngwedi ka bosakhutleng, le jaaka mosupi yo o ikanyegang mo loaping.”—Pesalema 89:36, 37.

‘Lesedi le le laolang bosigo’—ngwedi—le re gopotsa gore puso ya ga Keresete e tlile go nnela ruri. (Genesise 1:16) Daniele 7:14 e bua jaana ka Bogosi jwa ga Keresete: “Bobusi jwa gagwe ke bobusi jo bo nnang ka bosakhutleng jo bo se kitlang bo feta, mme bogosi jwa gagwe ke jo bo se kitlang bo senngwa.” Ngwedi ke mosupi yo o re gakololang ka Bogosi joo le masego a bo tla a tlisetsang batho.

[Motswedi wa Setshwantsho mo go tsebe 32]

Moon: NASA photo