Go Kwala—Botlhokwa Jwa Gone Kwa Iseraele wa Bogologolo

A O KILE wa bala dikarolo dingwe tsa leboko la Iliad kgotsa la Odyssey, a e leng maboko a mabedi a maemo a a kwa godimo a kwa Gerika wa bogologolo? Go akanngwa gore maboko ao a tlhamilwe mo lekgolong la borobongwe kgotsa la borobedi la dingwaga B.C.E. Maboko ano a farologana jang le Baebele, e e neng ya simolola go kwalwa makgolo a mantsi a dingwaga pele ga moo? Bolumo ya The Jewish Bible and the Christian Bible e bolela jaana: “Baebele e umaka go kwala le dilo tse di kwadilweng makgetlho a ka nna 429. Eno ke ntlha ya botlhokwa fa o gopola gore Iliad e umaka go kwala gangwe fela mme Odyssey yone ga e go umake le fa e le gangwe.”

The Oxford Encyclopedia of Archaeology in the Near East e tlhalosa jaana: “Go lebega gore kwa Iseraele wa bogologolo, go kwala e ne e le karolo ya botlhokwa ya kobamelo.” Ka sekai, kgolagano ya Molao e ne ya kwalwa mme moragonyana ya balwa phatlalatsa ka metlha fa pele ga batho botlhe, banna, basadi le bana. Gape batho ba ne ba e bala le go e ithuta ba le ditlhopha kgotsa motho ka bongwe. Motlhatlheledi yo mogolo wa Yunibesithi ya Liverpool e bong Alan Millard o konela jaana a sena go tlhatlhoba dikarolo dingwe tsa Molao: “Kafa go bonalang ka teng, bakwadi ba ne ba tsaya gore batho ba mefuta yotlhe ba itse go bala le go kwala.”—Duteronome 31:9-13; Joshua 1:8; Nehemia 8:13-15; Pesalema 1:2.

Moaposetoloi Paulo o tlhalosa kafa Bakeresete ba tshwanetseng go leba dikwalo tse di boitshepo ka teng: “Dilo tsotlhe tse di neng tsa kwalwa go sa le pele di ne tsa kwalelwa go re laya, gore ka boitshoko jwa rona le ka kgomotso ya Dikwalo re nne le tsholofelo.” A wena o bontsha gore o anaanela Baebele ka go e bala ka metlha?—Baroma 15:4.