Kalogo ya Bo123 ya Gileade

Dialogane Tsa Gileade di Rotloediwa go “Simolola go Epa”

KA Matlhatso, September 8, 2007, batho ba le 6 352 ba ba tswang mo dinageng tse 41 ba ne ba le gone mo kalogong ya setlhopha sa bo123 sa Sekolo sa Baebele sa Watchtower sa Gileade. Ka 10:00 a.m., modulasetulo wa thulaganyo e bong Anthony Morris wa Setlhopha se se Laolang, o ne a amogela bareetsi. Morago ga mafoko mangwe a a simololang, o ne a rola sebui sa ntlha e bong Gary Breaux wa Komiti ya Lekala la United States.

Mokaulengwe Breaux o ne a tlhomamisetsa baithuti gore batho ba ba dirang thato ya ga Jehofa ba bantle mo matlhong a Gagwe, go sa kgathalesege ditebego tsa bone. (Jer. 13:11) O ne a rotloetsa dialogane gore di nne di le dintle jalo. Morago ga foo, Gerrit Lösch wa Setlhopha se se Laolang o ne a gatelela gore go a tshwanela go solofela tuelo fa re direla Jehofa. (Baheb. 11:6) Le fa go ntse jalo, re tshwanetse go tlhotlhelediwa ke lorato lo e seng lwa boithati.

Go tswa foo, molebedi wa Lephata la Dikolo Tsa Puso ya Modimo e bong William Samuelson, o ne a rotloetsa dialogane go ikanyega le go nitama mo kabelong e e tlotlegang ya go itsise ka Kgosi e e busang le go bontsha seriti sa bone ka boitshwaro jwa bone jo bo molemo. * Sam Roberson, yo e leng mothusa molebedi wa Lephata la Dikolo Tsa Puso ya Modimo, o ne a kgothaletsa dialogane gore ka metlha di batle se se molemo mo bathong ba bangwe. Ka jalo dialogane di tla kgona go ‘rata bakaulengwe botlhe.’—1 Pet. 2:17.

Morago ga dipolelo tseo tse di amang maikutlo, motlhatlheledi wa Gileade e bong Mark Noumair o ne a botsolotsa bangwe ba e leng dialogane ba ba neng ba bolela maitemogelo a ba nnileng le one mo tshimong fa ba ntse ba le mo sekolong sa Gileade. Ba ne ba dira gore bareetsi ba bone gore tota ba rata bodiredi e bile ba rata go thusa ba bangwe. Go tswa foo, Kent Fischer, yo o dirang mo Ofising ya Bethele kwa Patterson, o ne a botsolotsa maloko a Dikomiti tsa Makala a dinaga tse tharo tse di nang le barongwa. Mafoko a bakaulengwe ba ba molemo bano a ne a tlhomamisetsa bareetsi, ba ba akaretsang batsadi ba bantsi ba dialogane, gore barongwa ba basha ba tlhokomelwa sentle mo dikabelong tsa bone. Morago ga foo Izak Marais yo o dirang mo Lephateng le le Thusang Baranodi o ne a botsolotsa batho ba ba nang le nako e telele e le barongwa, ba maitemogelo a bone a neng a dira gore dialogane di latswe boipelo jo bo larileng kwa pele.

Polelo ya konokono ya thulaganyo, e e neng ya neelwa ke Geoffrey Jackson wa Setlhopha se se Laolang, e ne e na le setlhogo se se reng: “Morago ga Dilo Tsotlhe Tse lo di Utlwileng—Lo Tlile go Dirang?” Mokaulengwe Jackson, yo e neng e le morongwa ka dingwaga tse di ka nnang 25 kwa South Pacific, o ne a tlotla ka konelo ya Thero ya kwa Thabeng. Mo therong eo, Jesu o ne a bua ka banna ba babedi ba ba neng ba aga matlo, yo mongwe a le botlhale mme yo mongwe e le seeleele.  Sebui se ne sa bontsha gore matlo ano a mabedi a ka tswa a ne a agilwe mo lefelong le le tshwanang. Le fa go ntse jalo, monna yo o seeleele o ne a aga fela fa godimo, mo motlhabeng, fa monna yo o botlhale ene a ne a epa go fitlha a bona motheo wa lefika o a ka agang mo go one. Fa go ne go tla sefefo se segolo, ntlo e e agilweng mo lefikeng e ne ya ema, fa e e agilweng mo motlhabeng yone e ne ya gosomana.—Math. 7:24-27; Luke 6:48.

Jesu o ne a tlhalosa gore monna yo o seeleele o ne a tshwana le batho ba ba neng ba mo reetsa fela mme ba sa dirise mafoko a gagwe. Monna yo o botlhale o ne a tshwana le batho ba ba neng ba reetsa mafoko a ga Jesu ba bo ba a dirisa. Mokaulengwe Jackson o ne a raya dialogane a re: “Fa lo tsaya se lo se ithutileng mo Baebeleng lo bo lo se dirisa mo tirong ya lona ya borongwa, lo tla tshwana le monna yo o botlhale.” Ka jalo fa a konela o ne a rotloetsa dialogane go “simolola go epa” mo dikabelong tsa bone tsa borongwa.

Kwa bofelong, dialogane di ne tsa newa didipoloma le dikabelo tsa tsone, mme Mokaulengwe Morris o ne a naya kgakololo e e konelang. O ne a rotloetsa dialogane go sala Jesu morago ka metlha le gore le ka motlha ba se ka ba tlogela go ikaega ka Jehofa gore a ba neye nonofo. Go tswa foo thulaganyo ya kalogo e ne ya tla kwa bokhutlong.

[Ntlha e e kwa tlase]

[Lebokoso mo go tsebe 31]

DIPALOPALO MALEBANA LE SETLHOPHA

Palo ya dinaga tse ba tswang kwa go tsone:10

Palo ya dinaga tse ba abetsweng go ya kwa go tsone: 24

Palo ya baithuti: 56

Palogare ya dingwaga tsa bone: 33,5

Palogare ya dingwaga tsa bone ba le mo boammaaruring: 17,9

Palogare ya dingwaga tsa bone ba le mo bodireding jwa nako e e tletseng: 13,8

[Setshwantsho mo go tsebe 32]

Setlhopha sa bo123 sa Dialogane Tsa Sekolo sa Baebele sa Watchtower sa Gileade

Mo lenaaneng le le fa tlase, mela e balwa go tloga kwa pele go ya kwa morago, mme maina a tlhomagantswe go tloga kafa molemeng go ya kafa mojeng wa mola mongwe le mongwe.

(1) Esparza, E; Papaya, S.; Bilal, A.; Suárez, M.; Evers, E.; Dimichino, K. (2) Rosa, M.; Fujii, R.; Ratey, O.; Leveton, J.; Van Leemputten, M. (3) Boscaino, A.; Beck, K.; Budanov, H.; Braz, C.; Peltz, K.; Siaw, A. (4) Leveton, S.; Santikko, H.; Conte, S.; Wilson, J.; Rylatt, J.; Pierce, S.; Fujii, K. (5) Rosa, D.; Boscaino, M.; Austin, V.; Rodiel, P.; Bilal, P.; Dimichino, P. (6) Ratey, B.; Czyzyk, D.; Clarke, C.; Riedel, A.; Esparza, F.; Siaw, P.; Van Leemputten, T. (7) Rodiel, J.; Evers, J.; Green, J.; Czyzyk, J.; Santikko, M.; Rylatt, M. (8) Peltz, L.; Austin, D.; Riedel, T.; Beck, M.; Pierce, W.; Conte, S.; Green, S. (9) Suárez, J.; Clarke, J.; Papaya, S.; Budanov, M.; Wilson, R.; Braz, R.