1. Jehofa o leba tiro jang, mme seo se dirile gore a direng?

JEHOFA ke modiri yo o itumelelang tiro ya gagwe. (Pes. 135:6; Joh. 5:17) O neile dibopiwa tsa gagwe tse di botlhale e leng batho tiro e e itumedisang le e e kgotsofatsang gore le bone ba itumelele se ba se dirang mme ba kgotsofalele dilo tse ba di fitlhelelang. Ka sekai, o ne a dira gore Morwawe wa leitibolo a nne le seabe mo tirong ya Gagwe ya go bopa. (Bala Bakolosa 1:15, 16.) Baebele ya re pele Jesu a tla mo lefatsheng, o ne a na le Modimo kwa legodimong e le “modiri yo o setswerere.”—Dia. 8:30.

2. Ke eng se se bontshang gore dibopiwa tsa semoya ga di bolo go nna le tiro ya botlhokwa e bile e kgotsofatsa?

² Mo Baebeleng go na le dikai tse di bontshang gore Jehofa ga a bolo go nna a abela bomorwawe ba semoya tiro. Fa Adame le Efa ba sena go leofa ba bo ba kobiwa mo legaeng la bone la Paradaise, Modimo o ne a “tlhoma ditšheruba kwa botlhaba jwa tshingwana ya Edene le bogale jo bo tsabakelang jwa tšhaka e e neng e itikolosa e sa kgaotse go disa tsela e e yang kwa setlhareng sa botshelo.” (Gen. 3:24) Mme Tshenolo 22:6 e bontsha gore Jehofa o ne a “romela moengele wa gagwe go bontsha batlhanka ba gagwe dilo tse di tla akofang di diragala.”

3. Fa Jesu a ne a le mo lefatsheng, o ne a latela sekao sa ga Rraagwe jang?

³ Fa Jesu a ne a le mo lefatsheng e le motho yo o itekanetseng, o ne a itumelela go dira tiro e Jehofa a neng a mo e abetse. Gape Jesu o ne a latela sekao sa ga Rraagwe ka go abela barutwa ba gagwe tiro ya botlhokwa. O ne a ba bolelela mafoko ano gore ba tlhoafalele go bona se ba ka se fitlhelelang: “Ammaaruri ammaaruri ke a lo raya, yo o dumelang mo go nna, yoo le ene o tla dira ditiro tse ke di dirang; mme o tla dira ditiro tse dikgolo go feta tseno, ka gonne ke a tsamaya ke ya kwa go Rara.” (Joh. 14:12) Go gatelela kafa ditiro tseno di potlakileng ka gone, Jesu o ne a tlhalosa jaana: “Re tshwanetse go dira ditiro tsa yo o nthomileng go sa ntse go le motshegare; bosigo bo e tla jo mo go jone go se nang motho ope yo o ka dirang.”—Joh. 9:4.

4-6. (a) Ke ka ntlha yang fa re leboga go bo Noa le Moshe ba ile ba diragatsa ditiro tse ba di abetsweng ke Jehofa? (b) Ditiro tsotlhe tse Modimo a di abetseng batho di tshwana ka eng?

⁴ Tota le pele ga motlha wa ga Jesu, batho ba ne ba abetswe go dira tiro e e kgotsofatsang. Le fa Adame le Efa ba sa ka ba dira se ba neng ba se abetswe, batho ba bangwe ba ne ba dira fela jaaka Modimo a ne a ba laetse. (Gen. 1:28) Noa o ne a neilwe ditaelo tse di maleba tse di neng di tlhalosa kafa a neng a tshwanetse go aga araka ka gone go boloka matshelo ka nako ya Morwalela o mogolo. O ne a dira fela jaaka Jehofa a ne a mo laetse. Re fano gompieno ka gonne o ne a nna kelotlhoko go dira dilo fela jaaka a ne a laetswe!—Gen. 6:14-16, 22; 2 Pet. 2:5.

⁵ Moshe o ne a newa ditaelo tse di maleba tsa go aga motlaagana le go rulaganya baperesiti mme o ne a dira fela jaaka a ne a laetswe. (Ekes. 39:32; 40:12-16) Tota le gompieno re solegelwa molemo ke go diragatsa ga gagwe kabelo eo ka boikanyegi. Jang? Moaposetoloi Paulo o ne a tlhalosa gore dikarolo tseo tsa Molao di ne di tshwantshetsa “dilo tse di molemo tse di tla tlang.”—Baheb. 9:1-5, 9; 10:1.

⁶ Nako le nako Modimo o naya batlhanka ba gagwe ditiro tse di farologaneng fa boikaelelo jwa gagwe bo ntse bo diragadiwa. Le fa go ntse jalo, tiro e ba e abelwang ga e bolo go nna e galaletsa Jehofa le go solegela molemo batho ba ba nang le tumelo. Ruri go ntse jalo le ka dilo tse Jesu a di dirileng, ka nako ya fa a ne a ise a tle mo lefatsheng le moragonyana fa a setse a le mo lefatsheng. (Joh. 4:34; 17:4) Ka tsela e e tshwanang, tiro e re e abetsweng gompieno e galaletsa Jehofa. (Math. 5:16; bala 1 Bakorintha 15:58.) Ke ka ntlha yang fa go ntse jalo?

7, 8. (a) Tlhalosa tiro e Bakeresete gompieno ba nang le tshiamelo ya go e dira. (b) Re tshwanetse go tsibogela kaelo ya ga Jehofa jang?

⁷ O tla dumela gore go a itumedisa go bo Jehofa a neile batho ba ba sa itekanelang tlotla ya go nna badirimmogo le ene. (1 Bakor. 3:9) Ba ba nang le seabe mo tirong ya go aga Diholo Tsa Dikopano, Diholo Tsa Bogosi le dikago tsa makala ba dira tiro ya go aga dikago e e tshwanang le e Noa le Moshe ba neng ba abetswe go e dira. Le fa o ka tswa o na le seabe mo tirong ya go ntšhafatsa Holo ya Bogosi ya mo lefelong la lona kgotsa ya go aga ntlokgolo ya rona ya lefatshe lotlhe kwa Warwick, New York, anaanela tshiamelo e o nang le yone ya go direla ka tsela eno. (Bona setshwantsho sa motaki se se kwa tshimologong ya setlhogo seno.) Ke tirelo e e boitshepo. Le fa go ntse jalo, gantsi Bakeresete ba lalediwa go nna le seabe mo thulaganyong ya go aga ya semoya. Le yone e diretswe go galaletsa Jehofa le go solegela batho ba ba kutlo molemo. (Dit. 13:47-49) Phuthego ya Modimo e re naya kaelo e e tshwanetseng ya kafa tiro eno e ka dirwang sentle ka teng. Seno se ka raya gore ka dinako tse dingwe re ka nna ra abelwa tiro e ntšha.

⁸ Batlhanka ba ba ikanyegang ba ga Jehofa ga ba bolo go ikemisetsa go ikobela kaelo e ba e newang malebana le dilo tse di direlwang puso ya Modimo. (Bala Bahebera 13:7, 17.) Kwa tshimologong re ka nna ra bo re sa tlhaloganye  ka botlalo mabaka a go bo re tshwanetse go dira tiro ya rona ka tsela e e rileng. Le fa go ntse jalo, re itse sentle melemo ya go dirisana le Jehofa fa a dira diphetogo dipe fela tse a bonang di tshwanetse go dirwa.

9. Bagolwane ba tlhomela phuthego sekao sefe malebana le tiro?

⁹ Tsela e bagolwane ba etelelang pele ka yone mo phuthegong e bontsha gore ba eletsa thata go dira thato ya ga Jehofa. (2 Bakor. 1:24; 1 Bathes. 5:12, 13) Ba bontsha moya wa go iketleeletsa go dira ka natla le go tsamaisana le maemo a a ntseng a fetoga. Ba tlhoafalela go tsamaisana le ditsela tse disha tse tiro ya go rera ka Bogosi jo bo tlhomilweng jwa Modimo e dirwang ka tsone. Le fa kwa tshimologong bangwe ba bone ba ka tswa ba ne ba okaoka go rulaganya tiro ya go neela bosupi ka mogala, go rera kwa maemakepeng kgotsa go rera phatlalatsa, go ise go ye kae ba ne ba bona diphelelo tse di molemo tsa go dira jalo. Ka sekai, babulatsela ba le banè kwa Jeremane ba ne ba swetsa ka gore ba dire tshimo ya kgwebo e e neng e sa tlhole e dirwa. Michael a re: “Go ne go setse go fetile dingwaga di le mmalwa re sa dire mofuta ono wa tirelo, ka jalo re ne re tshogile. Jehofa o tshwanetse a bo a ile a itse seo, ka gonne o ne a dira gore re itumelele tirelo ya tshimo thata mo mosong oo. Ruri re ne ra itumelela go bo re ile ra latela kaelo ya Tirelo ya Rona ya Bogosi le go ikaega ka Jehofa gore o tla re ema nokeng!” A o iketleeleditse go leka mekgwa e mesha ya go neela bosupi e e simololwang mo tshimong ya lona?

10. Bosheng jaana go dirilwe diphetogo dife mo phuthegong?

¹⁰ Ka dinako tse dingwe, go nna le diphetogo tse di tlhokang go dirwa mo phuthegong. Bosheng jaana, diofisi tsa makala di le dintsi di ne tsa kopanngwa le tse dingwe. Le fa seo se kaya gore bakaulengwe le bokgaitsadi ba ba direlang kwa makaleng ano ba dire diphetogo dingwe, go ise go ye kae botlhe ba ba amiwang ke seno ba ile ba lemoga melemo ya diphetogo tseo. (Mor. 7:8) A bo badiri bao ba ba dirang ka go rata ba itumelela jang ne go nna le seabe mo hisitoring e e ntseng e tswelela pele ya batho ba ga Jehofa!

11-13. Ke dikgwetlho dife tse bangwe ba ileng ba lebana le tsone ka ntlha ya diphetogo tse phuthego e di dirang?

¹¹ Re ka ithuta dithuto tsa botlhokwa thata mo go ba ba neng ba amega ka tlhamalalo fa go ne go kopanngwa makala. Bangwe ba bone ba ne ba feditse dingwagangwaga ba direla ka nako e e tletseng mo magaeng a Bethele a kwa dinageng tsa bone. Banyalani bangwe ba ba neng ba direla kwa legaeng le lennye la Bethele kwa Central America ba ne ba kopiwa gore ba ye go direla kwa legaeng la Bethele la Mexico le le neng le feta le ba tswang kwa go lone go menagane ga 30. Rogelio a re: “Go ne go le boima tota go tlogela ba masika le ditsala.” Mokaulengwe mongwe yo le ene a neng a kopiwa go fudugela kwa Mexico e bong Juan a re: “Go ntse jaaka e kete motho o tsholwa lekgetlo la bobedi; o tshwanetse go nna le ditsala tse disha. O tlhoka go tlwaela dingwao tse disha le ditsela tse dingwe tsa go akanya.”

¹² Maloko a magae mangwe a Bethele a dinaga tsa Yuropa a a neng a kopiwa go fudugela kwa ofising ya lekala e e kwa Jeremane le one a ne a lebana le dikgwetlho. Ope fela yo o itumelelang go leba dithaba tse dintlentle a ka tlhaloganya kafa go neng go le thata ka teng mo go ba ba fudugileng go tswa kwa Switzerland gore ba tlogele dithaba tse dikgolo tse dintle tsa koo. Mme kwa tshimologong ba ba tswang kwa Austria ba ne ba tlhologelelwa botshelo jo bo iketlileng jo ba neng ba bo tshela koo.

¹³ Ba ba fudugelang kwa nageng e nngwe, ba ne ba tshwanetse go tlwaela go nna mo lefelong le lesha, go bereka le bakaulengwe le bokgaitsadi ba ba neng ba sa ba itse, gongwe le go tshwanelwa ke go ithuta tiro e ntšha. Ba ne ba tshwanetse go tlwaela phuthego e ntšha le go rera mo tshimong e ntšha, gongwe le go rera ka puo e sele. Go dira diphetogo tse di ntseng jalo go ka nna boima. Le fa go ntse jalo, maloko a le mantsi a Bethele a amogetse kgwetlho eo. Ke ka ntlha yang fa ba dirile jalo?

14, 15. (a) Batho ba le bantsi ba bontshitse jang gore ba anaanela tshiamelo ya go dira le Jehofa go sa kgathalesege gore ba dira tiro efe? (b) Ke ka tsela efe ba leng sekao se se molemo mo go rona rotlhe?

 ¹⁴ Grethel a re: “Ke ne ka dumela go fuduga ka gonne eo e ne e le tsela e ke bontshang Jehofa ka yone gore ke a mo rata go sa kgathalesege gore ke mo nageng efe, mo kagong efe kgotsa gore ke na le tshiamelo efe.” Dayska a re: “Fa ke gopola gore taletso eno e ne e tswa kwa go Jehofa, ke ne ka e amogela ka boitumelo.” André le Gabriela ba dumalana le seo mme ba re: “Re ne re bona eno e le tshono e nngwe ya go direla Jehofa ka go beela dilo tse re di kgatlhegelang kwa thoko. Re ne ra ipolelela go re, ‘Fa o lebane le diphetogo tse Jehofa a di tlisang, go botoka go tsamaisana le tsone go na le go itirela dikgoreletsi.’”

¹⁵ Ka ntlha ya go kopanngwa ga makala, maloko mangwe a Bethele a abelwa go ya go nna babulatsela. Seo se ile sa diragalela maloko a le mmalwa a Bethele fa lekala la Denmark, la Norway le la Sweden a ne a kopanngwa go nna ofisi ya lekala ya Scandinavia. Bangwe ba bone e ne e le Florian le Anja ba ba neng ba re: “Re leba kabelo ya rona e le kgwetlho e e itumedisang. Re itumelela go dirisiwa ke Jehofa go sa kgathalesege gore re direla re le kwa kae. Re ka bua go tswa pelong gore re segofaditswe tota!” Le fa bontsi jwa rona re ka nna ra se ka ra tshwanelwa ke go dira diphetogo tse di ntseng jalo, a re ka iketleetsa fela jaaka bakaulengwe le bokgaitsadi ba ba neng ba baya dilo tse di direlwang Bogosi kwa pele? (Isa. 6:8) Ka metlha Jehofa o segofatsa batho ba ba anaanelang tshiamelo ya go dira le ene, le fa ba ka tswa ba dira kae.

16. (a) Bagalatia 6:4 ya re re direng? (b) Tshiamelo e e di gaisang tsotlhe e motho ope fela a ka nnang le yone ke efe?

¹⁶ Batho ba ba sa itekanelang ba rata go ipapisa le ba bangwe mme Lefoko la Modimo le re bolelela gore re tlhome mogopolo mo go se rona re kgonang go se dira. (Bala Bagalatia 6:4.) Bontsi jwa rona ga re na ditshiamelo dipe mo phuthegong. E bile gape, ga se rotlhe ba re ka kgonang go nna babulatsela kgotsa barongwa kgotsa go direla kwa Bethele. Eleruri tseno ke ditshiamelo tse di molemo! Mme le ka motlha ga re a tshwanela go lebala gore tshiamelo e kgolo go gaisa tsotlhe tse motho a ka  nnang le tsone ke e rotlhe re nang le yone. Ke ya go nna modirimmogo le Jehofa mo bodireding jwa Bokeresete. Eno ke tshiamelo e re tshwanetseng go e anaanela thata!

17. Re ka lebelela eng fa fela lefatshe la ga Satane le sa ntse le le gone, mme ke eng fa re sa tshwanela go kgobega marapo go sa tlhokege?

¹⁷ Fa fela lefatshe la ga Satane le sa ntse le le gone, re ka nna ra se ka ra kgona go direla Jehofa ka tsela e re ka ratang ka yone. Re ka tswa re sa kgone go fetola maikarabelo a rona a lelapa, botsogo jwa rona kgotsa maemo a mangwe a botshelo. Mme seo ga se a tshwanela go re kgoba marapo go sa tlhokege. Le ka motlha o se ka wa inyatsa wa akanya gore o ka se kgone go nna modirimmogo le Modimo ka go naya bosupi ka leina la gagwe le go dirisa tshono epe fela go itsise batho ka Bogosi jwa gagwe. Sa botlhokwa le go feta ke gore o dira mmogo le ene ka selekanyo se o se kgonang le gore o rapelela gore a segofatse bakaulengwe ba gago ba ba kgonang go dira go feta se wena o kgonang go se dira. Se lebale, mongwe le mongwe yo o galaletsang leina la ga Jehofa o botlhokwa thata mo matlhong a gagwe!

18. Ke eng se re tshwanetseng go iketleeletsa go se beela kwa thoko mme ka ntlha yang?

¹⁸ Le fa re na le makoa e bile re sa itekanela, Jehofa o itumelela go re dira badirimmogo le ene. Ruri re anaanela tshiamelo e re nang le yone ya go dira le Modimo wa rona mo metlheng eno ya bofelo! Ka jalo, re tshwanetse go iketleeletsa go beela kwa thoko dilo tse dintsi tse re di kgatlhegelang ka gonne re itse gore mo lefatsheng la ga Jehofa le lesha, o tla dira gore re nne le “botshelo jwa mmatota”—botshelo jo bo sa khutleng mo maemong a a itumedisang a kagiso.—1 Tim. 6:18, 19.

19. Jehofa o re solofeditse eng mo isagweng?

¹⁹ Fa re ntse re le gaufiufi le lefatshe le lesha, akanya ka se Moshe a neng a se bolelela Baiseraele pele fela ga ba tsena mo Lefatsheng le le Solofeditsweng: “Jehofa Modimo wa gago o tla dira gore o nne le mo gontsi thata mo tirong nngwe le nngwe ya seatla ya gago.” (Dute. 30:9) Morago ga Haramagedona, ba ba ntseng ba dira ka natla e le badirimmogo le Modimo ba tla rua lefatshe le a le ba solofeditseng. Go tswa foo, re tla tlhoma mogopolo mo tirong e ntšha e re tla bong re e abetswe—ya go dira lefatshe paradaise e ntle!