1, 2. Jehofa o re rutile jang gore re mo rate?

KGAKAKGOLO ga ke na mebala, mebala e dikgakaneng, ke gore, bana ba dira se rraabone a se dirang. Fa rre a rata bana ba gagwe, o ba ruta go rata. Ga go ope yo o kileng a re rata go gaisa Rraarona Jehofa. Ka jalo, re ithuta go rata ka gonne “a re ratile pele.”—1 Johane 4:19.

² Jehofa o ile a re bontsha jang gore o “re ratile pele”? Baebele ya re: “Fa re ne re sa ntse re le baleofi, Keresete o ne a re swela.” (Baroma 5:8) Rraarona yo o re ratang e bong Jehofa, o ile a ntsha Morwawe e le thekololo go re golola mo dikgoleng tsa boleo le loso. Mpho eno e e botlhokwatlhokwa e ile ya dira gore re kgone go atamalana le Jehofa le go mmontsha gore re a mo rata. Jehofa o re tlhometse sekao sa go intsha setlhabelo. O ile a re ruta gore re tshwanetse go rata le go aba ka bopelotshweu.—1 Johane 4:10.

3, 4. Re bontsha jang gore re rata Modimo?

³ Lorato ke nonofo ya konokono ya ga Jehofa. Ka jalo, re kgona go tlhaloganya lebaka la go bo Jesu a ne a re taelo eno ke yone ya botlhokwa fela thata: “O rate Jehofa Modimo wa gago ka pelo yotlhe ya gago le ka moya otlhe wa gago le ka  mogopolo otlhe wa gago le ka nonofo yotlhe ya gago.” (Mareko 12:30) Jehofa o batla gore re mo rate “ka pelo yotlhe.” Jehofa a ka utlwa botlhoko tota fa re rata mongwe kgotsa sengwe go gaisa ene. Go rata Jehofa ga se kgang ya maikutlo fela ka gonne Jehofa o lebeletse gore re mo rate ka “mogopolo otlhe” le ka “nonofo yotlhe” ya rona. Seno se raya gore go rata Jehofa go akaretsa se re se akanyang le se re se dirang.—Bala Mika 6:8.

⁴ Ka jalo, re tshwanetse go rata Jehofa ka sotlhe se re leng sone le sotlhe se re nang le sone. Re mmontsha gore re mo rata go tswa pelong fa re dirisa matshelo a rona go dira thato ya gagwe. Mo setlhogong se se fetileng, re ile ra tlotla ka ditsela di le nnè tse Jehofa a ileng a re bontsha ka tsone gore o a re rata. A re boneng kafa re ka ratang Jehofa go feta ka gone le go mmontsha gore re a mo rata.

5. Fa re akanya ka dilo tsotlhe tse Jehofa a re diretseng tsone, re tlhotlheletsega go dira eng?

⁵ Fa motho a go naya mpho, ga go pelaelo gore o tla mo leboga. Mme o tla dirisa mpho e a go neileng yone ka gonne o e tsaya e le botlhokwa. Jakobe a re: “Mpho nngwe le nngwe e e molemo le neo nngwe le nngwe e e itekanetseng e tswa kwa godimo, gonne e fologa e tswa kwa go Rara wa masedi a selegodimo, mme mo go ene ga go na go fetofetoga ga go menoga ga moriti.” (Jakobe 1:17) Re leboga Jehofa tota go bo a ile a re naya sengwe le sengwe se re se tlhokang gore re kgone go tshela le go itumela. Re a lemoga gore o re rata fela thata mme le rona re batla go mmontsha gore re a mo rata. A ke tsela e o ikutlwang ka yone?

6. Baiseraele ba ne ba tshwanetse go dira eng fa ba batla gore Jehofa a tswelele a ba segofatsa?

⁶ Jehofa o ne a naya Baiseraele dimpho di le dintsi tota tse di molemo. O ne a ba kaela ka dingwaga di le dintsintsi a dirisa melao ya gagwe le go ba naya sengwe le sengwe se ba neng ba se tlhoka. (Duteronome 4:7, 8) Mme ba ne ba tshwanetse go ikobela melao eo go bontsha gore ba leboga Jehofa. Ka sekai, fa ba ntshetsa Jehofa ditlhabelo, ba ne ba tshwanetse go mo naya ‘mabutswapele a a gaisang otlhe’ a lefatshe la bone. (Ekesodo 23:19) Ba ne ba itse gore Jehofa o tla tswelela a ba segofatsa fa fela ba mo ikobela e bile ba mo naya mabutswapele a sengwe le sengwe sa bone.—Bala Duteronome 8:7-11.

7. Re ka dirisa jang ‘dilo tsa rona tse di tlhwatlhwakgolo’ go bontsha Jehofa gore re a mo rata?

⁷ Le rona re ka bontsha Jehofa gore re a mo rata ka go mo naya ‘dilo tsa rona tse di tlhwatlhwakgolo.’ (Diane 3:9) Re dira seno ka go dirisa dilo tse re nang le tsone go mo galaletsa. Ka sekai, re ka ntsha tšhelete kgotsa moneelo ope fela go tshegetsa tiro ya go rera e e dirwang mo phuthegong ya rona le mo lefatsheng lotlhe. Le fa re ka tswa re na le mo gontsi kgotsa re humanegile, rotlhe re ka kgona go dirisa dilo tse re nang le tsone go bontsha Jehofa gore re a mo rata. (2 Bakorintha 8:12) Mme go na le ditsela tse dingwe tse re ka bontshang Jehofa ka tsone gore re a mo rata.

8, 9. Ke tsela efe e nngwe e re bontshang Jehofa ka yone gore re a mo rata? Mike le ba lelapa la gagwe ba ne ba dira eng?

⁸ Jesu o ne a re ruta gore re tlhome mogopolo mo dilong tsa Bogosi go na le go tlhobaela ka dijo le diaparo. Rraarona o re  solofetsa gore o tla re naya dilo tse re di tlhokang. (Mathaio 6:31-33) Re tshepa Jehofa e bile re a itse gore ga se motlhanka wa mafoko a gagwe. Kana e bile, fa o rata motho, o a mo tshepa. Fa re ikanya Jehofa le go feta, re tla mo rata le go feta. (Pesalema 143:8) Ka jalo, re ka ipotsa go re: ‘A mekgele ya rona le tsela e re dirisang nako le maatla a rona ka yone, e bontsha gore ruri re rata Jehofa? A letsatsi le letsatsi re ikaega ka Jehofa gore a re tlhokomele?’

⁹ Mike le ba lelapa la gagwe ba ne ba ikanya Jehofa. Fa Mike a ne a le monnye, o ne a batla go ya go rera kwa nageng e sele. Tota le fa a sena go nyala a na le bana ba babedi, o ne a sa ntse a eletsa go dira jalo. Fa Mike le ba lelapa la gagwe ba bala ka bakaulengwe le bokgaitsadi ba ba rerang kwa mafelong a go tlhokegang baboledi kwa go one, ba ne ba swetsa ka gore ba rekise ntlo ya bone mme ba fudugele mo ntlong e nnye. Mike o ne a na le kgwebo ya go phepafatsa, ka jalo, o ne a fokotsa palo ya batho ba a neng a ba phepafaletsa mme a simolola go tsamaisa kgwebo ya gagwe a le kwa nageng e nngwe a dirisa Internet. Mike le ba lelapa la gagwe ba ne ba kgona go fudugela kwa nageng e nngwe mme ba itumelela bodiredi jwa bone fela thata. Mike a re: “Re bone gore mafoko a a mo go Mathaio 6:33 a boammaaruri tota.”

10. Fela jaaka Kgosi Dafide, ke ka ntlha yang fa re tshwanetse go akanya thata ka se re se ithutang ka Jehofa?

¹⁰ Kgosi Dafide o ne a kwala a re: “Magodimo a bolela kgalalelo ya Modimo; mme phuthologo e bolela tiro ya diatla tsa gagwe. Molao wa ga Jehofa o itekanetse, o rudisa moya. Kgakololo ya ga Jehofa e a ikanyega, e tlhalefisa yo o se nang maitemogelo.” Fa Dafide a akanya thata ka melao ya ga Jehofa e e botlhale le ka popo ya gagwe e ntle, o ne a atamalana le Jehofa mme a batla go mmontsha gore o a mo rata. Dafide o ne a opela a re: “A mafoko a molomo wa me le go tlhatlhanya ga pelo ya me di nne monate fa pele ga gago, wena Jehofa Lefika la me le Mogolodi wa me.”—Pesalema 19:1, 7, 14.

11. Re ka dirisa jang kitso e re nang le yone go bontsha Jehofa gore re a mo rata? (Bona setshwantsho se se simololang setlhogo.)

¹¹ Gone jaanong Jehofa o re ruta dilo di le dintsi ka ga gagwe, ka boikaelelo, popo le ka Lefoko la gagwe. Batho ba kgothaletsa ba bangwe gore ba ithute mme thutego e e kwa godimo e dira gore ba se ka ba tlhola ba rata Modimo. Jehofa ene ga a batle fela gore re nne le kitso gape o re thusa go nna botlhale. O batla gore re dirise se re se ithutang le go thusa ba bangwe. (Diane 4:5-7) Ka sekai, o batla gore re bolelela ba bangwe ka ‘kitso e e leng yone, ya boammaaruri’ le go ba thusa gore ba bolokwe. (1 Timotheo 2:4) Re bontsha Jehofa gore re a mo rata le gore re rata batho ba bangwe ka go ba ruta ka Bogosi Jwa Modimo le ka se bo tla se direlang batho.—Bala Pesalema 66:16, 17.

12. Kgaitsadi mongwe yo mmotlana o ne a reng ka mpho e e tswang kwa go Jehofa?

 ¹² Basha le bone ba ka akanya thata ka dilo tsotlhe tse Jehofa a di ba neileng le tse a ba rutileng tsone. Shannon o sa ntse a gopola kafa a neng a ikutlwa ka teng fa a ne a le kwa kopanong, ka nako ya fa a ne a na le dingwaga di le 11 mme monnawe ene a na le di le 10. Kwa Kopanong ya Kgaolo ya “Poifo ya Bomodimo,” basha botlhe, go akaretsa Shannon le monnawe, ba ne ba kopiwa gore ba nne mo lefelong lengwe le le kgethegileng. Shannon o ne a tshogile kwa tshimologong mme o ne a gakgamala fa basha botlhe ba ne ba newa buka ya Dipotso Tse Basha ba di Botsang—Dikarabo Tse di Nang le Tharabololo. Mpho eno e ntle e ne ya dira gore a ikutlwe jang ka Jehofa? A re: “Ke gone ke neng ka lemoga gore Jehofa o gone le gore o nthata mo go maswe. Re itumela tota go bo Modimo wa rona yo mogolo Jehofa a re naya dimpho tse dintle jaaka eno!”

13, 14. Re tshwanetse go tsiboga jang fa Jehofa a re kgalemela mme ka ntlha yang?

¹³ Baebele ya re: “Jehofa o kgalemela yo a mo ratang, fela jaaka rre a kgalemela morwawe yo a mo ipelelang.” (Diane 3:12) Fa re reetsa fa Jehofa a re kgalemela e bile re mo letla gore a re thapise, re tla itse go dira se se siameng e bile re tla nna le kagiso. Gone ke boammaaruri gore “ga go kotlhao epe e mo nakong eno  e bonalang e ipedisa, mme e a hutsafatsa.” (Bahebera 12:11) Mme gone, re tshwanetse go tsiboga jang fa Jehofa a re kgalemela? Le ka motlha ga re a tshwanela go itlhokomolosa kgakololo ya ga Jehofa kgotsa go tswelela re kgopisegile fa re kgalemelwa. Re rata Jehofa, ke gone ka moo re mo reetsang le go dira diphetogo fa go tlhokega.

¹⁴ Mo motlheng wa ga Malaki, Bajuda ba le bantsi ba ne ba sa reetse Jehofa. Ba ne ba sena sepe le gore a ditlhabelo tsa bone di ne di sa itumedise Jehofa kana jang. Ke ka moo Jehofa a neng a ba kgalemela a tiisitse. (Bala Malaki 1:12, 13.) Tota e bile, Jehofa o ne a ba kgalemela gangwe le gape mme ga ba a ka ba reetsa. O ne a ba raya a re: “Ke tla lo romelela phutso, ke tla hutsa masego a lona.” (Malaki 2:1, 2) Ke boammaaruri gore fa re nnela go gana go reetsa fa Jehofa a re gakolola kgotsa re akanya gore kgakololo ya gagwe ga e botlhokwa, o tla emisa go nna tsala ya rona.

15. Re tshwanetse go tila go akanya jang?

¹⁵ Lefatshe leno la ga Satane le rotloetsa batho gore ba nne mabela le go nna bogagapa. Batho ba le bantsi ga ba batle go kgalemelwa le go bolelelwa gore ba dire eng. Ba bangwe ba reetsa fela ka gonne ba patelesega go dira jalo. Rona ga re a tshwanela go nna jalo. Baebele ya re re ‘tlogele go bopega jaaka tsamaiso eno ya dilo.’ Go na le moo, re tshwanetse go itse se Jehofa a se lebeletseng mo go rona le go dira dilo tse di mo itumedisang. (Baroma 12:2) Jehofa o dirisa phuthego ya gagwe go re gakolola ka nako e e tshwanetseng. Ka sekai, re nna re gakololwa kafa re tshwanetseng go itshwara ka gone fa re na le batho ba bong bo sele, kafa re ka tlhophang ditsala ka gone le kafa re ka dirang tshwetso ka gone malebana le boitlosobodutu. Fa re ikemiseditse go reetsa fa Jehofa a re kgalemela e bile re dira diphetogo tse di mo itumedisang, re bontsha gore re lebogela go bo a  re kaela le gore re mo rata ka pelo yotlhe.—Johane 14:31; Baroma 6:17.

16, 17. (a) Ke eng fa re tshwanetse go ipotsa gore Jehofa o akanya eng pele re dira tshwetso? (b) Baiseraele ba ne ba dira eng go na le go ikanya Jehofa?

¹⁶ Bana ba bannye ba ikaega ka batsadi ba bone gore ba ba thuse le go ba sireletsa. Tota le bagolo ba ka nna ba kopa batsadi ba bone gore ba ba thuse. Ba lemoga gore le fa ba kgona go itirela ditshwetso, batsadi ba bone ba ka ba naya kgakololo e e molemo. Rraarona Jehofa o re letla gore re itirele ditshwetso. Mme e re ka re mo ikanya e bile re mo rata, ka dinako tsotlhe re mo kopa gore a re thuse e bile re dira sotlhe se re ka se kgonang go itse gore o akanya eng ka kgang nngwe pele re dira tshwetso ka yone. Fa re ikaega ka Jehofa, o tla re naya moya wa gagwe o o boitshepo go re thusa gore re dire se se siameng.—Bafilipi 2:13.

¹⁷ Mo motlheng wa ga Samuele, Baiseraele ba ne ba fenngwa ke Bafilisitia. Go na le gore ba botse Jehofa gore ba dire eng, ba ne ba re: “A re itseeleng letlole la kgolagano ya ga Jehofa kwa Shilo, gore le tle mo gare ga rona mme le re boloke mo seatleng sa baba ba rona.” Go ne ga direga eng? “Polao ya nna kgolo thata, mo e leng gore mo Iseraele go ne ga wa banna ba le dikete di le masome a mararo ba ba tsamayang ka dinao. Mme letlole la Modimo ka bolone le ne la thopiwa.” (1 Samuele 4:2-4, 10, 11) Baiseraele ba ne ba akanya gore Jehofa o ne a tla ba thusa le go ba sireletsa ka gonne ba ne ba tshotse Letlole la gagwe. Mme gone, ga ba a ka ba kopa Jehofa gore a ba thuse kgotsa ba leka go itse gore o akanya eng. Go na le moo, ba ne ba dira se ba neng ba akanya gore se siame mme ba utlwa botlhoko thata.—Bala Diane 14:12.

18. Baebele ya reng malebana le go ikanya Jehofa?

¹⁸ Mopesalema yo o neng a rata Jehofa fela thata e bile a mo ikanya, o ne a kwala a re: “Leta Modimo, gonne ke sa ntse ke tla mmaka jaaka poloko ya me e kgolo. Modimo wa me, moya wa me o itlhobogile mo teng ga me. Ke gone ka moo ke go gakologelwang.” (Pesalema 42:5, 6) A le wena o ikutlwa jalo ka Jehofa? A o ikutlwa o atamalane le ene le go mo ikanya? Gongwe o ka nna wa tshwanelwa ke go ithuta go mo ikanya le go feta. Baebele ya re: “Ikanye Jehofa ka pelo ya gago yotlhe mme o se ka wa ikaega ka tlhaloganyo ya gago. Mo tseye tsia mo ditseleng tsotlhe tsa gago, mme o tla tlhamalatsa ditselana tsa gago.”—Diane 3:5, 6.

19. O tla dira eng go bontsha Jehofa gore o a mo rata?

¹⁹ Jehofa o re ratile pele e le go re bontsha gore re mo rate jang. A ka dinako tsotlhe re akanye ka se a re diretseng sone le kafa a re ratang thata ka gone. Mme a re mmontsheng gore re mo rata ka pelo, moya, mogopolo le maatla otlhe a rona.—Mareko 12:30.