Ke Eng fa re Tshwanetse go Bontsha Tebogo?

“Raquel yo o rategang,

Ke go leboga fela thata ka ntlha ya go nkgothatsa. Tota le fa o ka tswa o sa itse, kgothatso ya gago le mafoko a gago a bopelonomi a nthusitse fela thata.”—Jennifer.

A O KILE wa amogela lekwalo la go go leboga le o neng o sa le lebelela? Fa go le jalo, ga go pelaelo gore mafoko a lone a ile a go itumedisa. Tota e bile, ke ga tlholego go batla go ratwa le go anaanelwa.—Mathaio 25:19-23.

Gantsi go bontsha tebogo go nonotsha kamano e e leng teng fa gare ga motho yo o abang le yo o amogelang. Gape, motho yo o bontshang kanaanelo o latela dikgato tsa ga Jesu Keresete, yo o neng a se ka a palelwa ke go lemoga ditiro tse di molemo tsa batho ba bangwe.—Mareko 14:3-9; Luke 21:1-4.

Ka maswabi, go setse go tlwaelegile gore batho ba se ka ba bontsha tebogo, e ka ne e le ka go bolelela ba bangwe gore ba a leboga kgotsa ka go ba kwalela. Baebele e ne ya tlhagisa gore mo “metlheng ya bofelo,” batho e tla nna “ba ba sa lebogeng.” (2 Timotheo 3:1, 2) Fa re se kelotlhoko, go palelwa ke go bontsha tebogo go go anameng mo lefatsheng gompieno go ka dira gore le rona re palelwe ke go bontsha tebogo.

Ke dikgato dife tse batsadi ba ka di tsayang go ruta bana ba bone kafa ba ka bontshang tebogo ka gone? Ke bomang ba re tshwanetseng go ba leboga? Mme ke ka ntlha yang fa re tshwanetse go leboga, tota le fa batho ba re tshelang le bone ba sa dire jalo?

Mo Lelapeng

Batsadi ba dira ka natla go tlamela bana ba bone. Le fa go ntse jalo, ka dinako tse dingwe batsadi ba ka nna le boikutlo jwa gore matsapa a bone ga a anaanelwe. Ke eng se ba ka se dirang go baakanya bothata jono? Go tlhokega dilo di le tharo.

(1) Sekao. Go tlhomela bana sekao se se molemo ke tsela e e nang le matswela ya go ba ruta. Fa Baebele e bua ka mmè mongwe yo o dirang ka natla wa kwa Iseraele wa bogologolo ya re: “Bana ba gagwe ba bua sentle ka ga gagwe.” Bana bano ba ithutile kae go bontsha tebogo? Karolo ya temana eno e re naya karabo. Ya re: “Monna wa gagwe le ene o a mmaka.” (Diane 31:28, New Century Version) Batsadi ba ba bontshanang tebogo mongwe go yo mongwe ba bontsha bana ba bone gore go bua jalo go itumedisa motho yo o lebogiwang, go tokafatsa dikamano tsa lelapa e bile go bontsha gore motho o godile.

Rre mongwe yo o bidiwang Stephen a re: “Ke lekile go tlhomela banake sekao ka go lebogela mogatsake dijo tsa maitseboa.” Matswela e ne ya nna eng? Stephen a re: “Bomorwadiake ba babedi ba lemogile seno, mme seno se ba thusitse gore le bone ba leboge.” Fa o nyetse kgotsa o nyetswe, a ka metlha o lebogela molekane wa gago ditiro tsa mo lelapeng tse di sa reng sepe tse a di dirang letsatsi le letsatsi ? A o leboga bana ba gago, le fa ba dirile se ba neng ba tshwanetse gore ba se dire?

(2) Thapiso. Maikutlo a a tlhotlheletsang motho go leboga a tshwana le dithunya. Di tlhoka go tlhokomelwa gore di kgone go gola sentle. Batsadi ba ka thusa bana ba bone jang go nna le moya wa  go leboga le go o bontsha? Kgosi e e botlhale e bong Solomone o ne a gatelela ntlha nngwe ya botlhokwa fa a ne a re: “Pelo ya mosiami e a tlhatlhanya gore e tle e arabe.”—Diane 15:28.

Batsadi, a lo ka thapisa bana ba lona go akanya ka matsapa a motho yo o ba nayang mpho a a tsereng le bopelotshweu jwa gagwe? Go tlhatlhanya ka dilo tseno go tla dira gore bana ba nne le kanaanelo e kgolo fela jaaka mmu o o molemo o dira gore dithunya di gole sentle. Maria, yo o godisitseng bana ba le bararo, a re: “Go tlhokega nako gore o nne le bana ba gago le go ba tlhalosetsa gore ke matsapa afe a motho a a tsayang fa a go naya mpho—gore motho yoo o ne a akanya ka ene le gore o ne a batla go mmontsha gore o mo rata go le kana kang. Mme ke akanya gore go dira jalo go botlhokwa.” Go tlotla le bana jalo go ba thusa go ithuta e seng fela se ba tshwanetseng go se bua fa ba leboga, mme gape le lebaka la go bo ba tshwanetse go se bua.

Batsadi ba ba botlhale ba thusa bana ba bone go tila go nna le maikutlo a gore ba tshwanetse go newa dilo tsotlhe tse di molemo. * Tlhagiso e e mo go Diane 29:21 e e malebana le go dirisana le batlhanka e dira ka tsela e e tshwanang le mo baneng: “Fa motho a tlekeetsa motlhanka wa gagwe go simolola mo bosheng go ya pele, moragonyana mo botshelong jwa gagwe o tla nna yo o sa lebogeng.”—Diane 29:21.

Bana ba bannye ba ka thusiwa jang go bontsha tebogo? Mmè wa bana ba bararo e bong Linda a re, “Nna le monna wa me re kopa bana ba rona gore ba dire setshwantsho kgotsa ba kwale maina a bone mo karateng ya go leboga.” Ke boammaaruri gore setshwantsho se ka tswa se se sentle go le kalo le mokwalo o sa balege sentle, mme se bana ba se ithutang mo go direng seno se botlhokwa thata.

(3) Boitshoko. Rotlhe re tshotswe re na le tshekamelo ya go nna pelotshetlha, mme seno se ka nna sa dira gore go nne thata go bontsha tebogo. (Genesise 8:21; Mathaio 15:19) Le fa go ntse jalo, Baebele e kgothaletsa batlhanka ba Modimo jaana: “Lo dirwe basha mo maatleng a a tlhotlheletsang mogopolo wa lona, le gore lo apare botho jo bosha jo bo neng jwa bopiwa go ya ka go rata ga Modimo.”—Baefeso 4:23, 24.

Le fa go ntse jalo, batsadi ba ba nang le maitemogelo ba a itse gore ga go motlhofo go thusa bana go ‘apara botho jo bosha.’ Stephen, yo o umakilweng fa godimo, a re, “Go ne go bonala go tsaya lobaka lo loleele go ruta bomorwadiarona go leboga ntle le go ba gakolola gore ba dire jalo.” Mme Stephen le mosadi wa gagwe ga ba a ka ba ineela. Stephen o tswelela ka gore, “ka ntlha ya boitshoko jwa rona, kgabagare bomorwadiarona ba ne ba ithuta go bontsha tebogo. Jaanong re motlotlo fa re ba bona ba dira jalo le mo bathong ba bangwe.”

Go Tweng ka Ditsala le Baagelani?

Fa re lebala go lebogela se re se diretsweng, tota seo ga se reye gore ga re na kanaanelo, mme ke fela gore re lebetse. A tota go botlhokwa gore re se ka ra nna fela le boikutlo jwa go anaanela mme gape re bo bontshe ka go leboga? Go araba potso eo, akanya ka tiragalo nngwe e e kaga Jesu le balepero bangwe.

Fa Jesu a ne a ya kwa Jerusalema, o ne a kopana le banna ba le lesome ba ba neng ba na le bolwetse jwa lepero. Baebele ya re: “Ba tlhatlosa mantswe a bone ba re: ‘Jesu, Morutisi, re utlwele botlhoko!’ E rile a ba bona a ba raya a re: ‘Tsamayang mme lo ipontshe baperesiti.’ Ya re ba tsamaya ba ntlafadiwa. Mongwe wa bone, e rile a bona gore o ne a fodisitswe, a boa, a galaletsa Modimo ka lentswe le le kwa godimo. Mme a wela ka sefatlhego fa dinaong tsa ga Jesu, a mo leboga; mo godimo ga moo, e ne e le Mosamarea.”—Luke 17:11-16.

A Jesu o ne a itlhokomolosa kgang ya gore balepero ba bangwe ba ne ba sa mo leboga? Pego eo e tswelela jaana: “Fa Jesu a fetola a re: ‘Go ne ga ntlafadiwa ba ba lesome, ga ke re? Jaanong ba bangwe ba le robongwe ba kae? A go ne ga se ka ga bonwa bape ba ba neng ba boa ba tla go naya Modimo kgalalelo fa e se monna yono wa tšhaba e sele?’”—Luke 17:17, 18.

Balepero ba bangwe ba le robonngwe ba ne ba se boikepo. Pelenyana, ba ne ba bontshitse phatlalatsa gore ba dumela mo go Jesu mme ba ikobela  ditaelo tsa gagwe ka go rata, tse di neng di akaretsa gore ba ye kwa Jerusalema go ya go iponatsa kwa baperesiting. Le fa go ntse jalo, le fa ba ne ba anaanela se Jesu a neng a se ba diretse ka bopelonomi, ba ne ba palelwa ke go ya go mo leboga. Keresete o ne a swabisiwa ke tsela e ba neng ba itshwara ka yone. Go tweng ka rona? Fa mongwe a re tshwara sentle, a re itlhaganelela go mo raya re re re a leboga mme fa go tshwanela, re bontshe seo ka go mo kwalela lekwalo?

Baebele ya re “lorato ga lo itshware ka tsela e e sa tshwanelang kgotsa ga lo pelotshetlha.” (1 Bakorintha 13:5, Today’s English Version) Ka jalo, go bontsha kanaanelo go tswa pelong ga go bontshe fela gore o na le mekgwa e e molemo mme gape go bontsha lorato. Jaaka tiragalo e e kaga balepero e re ruta, batho ba ba batlang go itumedisa Keresete ba tshwanetse go bontsha batho botlhe lorato le kanaanelo, go sa kgathalesege gore ke ba lotso lofe, mmala ofe kgotsa bodumedi bofe.

Ipotse jaana, ‘Ke leng la bofelo fa ke ne ke leboga moagelani, modirimmogo, moithutikanna, modiri wa kwa bookelong, modiri wa mo lebenkeleng kgotsa mongwe yo o neng a nthusa?’ Ke ka ntlha yang fa o sa dire rekoto ya letsatsi le le lengwe kgotsa a le mabedi, o kwale makgetlo a o ileng wa leboga kgotsa a o ileng wa kwala lekwalo la go leboga ka one? Rekoto eo e ka go thusa go bona mo o tlhokang go tokafatsa gone mo go bontsheng tebogo.

Gone mme, mongwe yo re tlhokang go mo leboga thata ke Jehofa Modimo. Ke ene Monei wa “mpho nngwe le nngwe e e molemo le neo nngwe le nngwe e e itekanetseng.” (Jakobe 1:17) Ke leng la bofelo fa o ne o leboga Modimo go tswa pelong ka ntlha ya dilo tse di rileng tse a ileng a go direla tsone?—1 Bathesalonika 5:17, 18.

Ke ka Ntlha Yang fa o Tshwanetse go Bontsha Tebogo le fa Batho ba Bangwe Bone ba sa Dire Jalo?

Batho ba bangwe ba ka nna ba se ka ba re leboga fa re ba direla sengwe. Ka jalo, ke ka ntlha yang fa re tshwanetse go leboga fa batho ba bangwe bone ba sa dire jalo? Akanya ka lebaka le le lengwe fela.

Fa re direla batho bano ba ba sa lebogeng selo se se molemo, re tla bo re etsa Mmopi wa rona yo o pelontle, Jehofa Modimo. Lebaka la go bo batho ba le bantsi ba sa anaanele lorato lo Jehofa a ba bontshang lone, ga le mo thibele gore a ba direle se se molemo. (Baroma 5:8; 1 Johane 4:9, 10) O ‘tlhabisetsa batho ba ba boikepo le ba ba molemo letsatsi la gagwe e bile o nesetsa batho ba ba siameng le ba ba sa siamang pula.’ Fa re leka go leboga batho ba bangwe le fa re tshela le batho ba ba sa lebogeng, re tla itshupa re le ‘bana ba ga Rraarona yo o kwa magodimong.’—Mathaio 5:45.

[Ntlha e e kwa tlase]

[Mafoko a a mo go tsebe 15]

Dira rekoto ya letsatsi le le lengwe kgotsa a le mabedi o kwale makgetlo a o ileng wa leboga kgotsa a o ileng wa kwala lekwalo la go leboga

[Setshwantsho mo go tsebe 15]

Tlhomela bana ba gago sekao sa go bontsha tebogo

[Setshwantsho mo go tsebe 15]

Tota le bana ba bannye ba ka thapisiwa go bontsha tebogo