A Modimo O na Le Leina?

Dikarabo tse di tlwaelegileng:

▪ “Leina la gagwe ke Morena.”

▪ “Ga a na leina.”

Jesu o ne a reng?

▪ “Ka jalo, lo rapele ka tsela eno: ‘Rraarona yo o kwa magodimong, a leina la gago le itshepisiwe.’” (Mathaio 6:9) Jesu o ne a dumela gore Modimo o na le leina.

▪ “Ke ba itsisitse leina la gago e bile ke tla dira gore le itsiwe, gore lorato lo o nthatileng ka lone lo tle lo nne mo go bone le nna ke le seoposengwe le bone.” (Johane 17:26) Jesu o ne a dira gore leina la Modimo le itsiwe.

▪ “Ga lo kitla lo mpona ka gope go fitlha lo re, ‘Go sego yo o tlang mo leineng la ga Jehofa.’” (Luke 13:35; Pesalema 118:26) Jesu o ne a dirisa leina la Modimo.

MODIMO ka boene o re bolelela leina la gagwe. Go kwadilwe a bua a re: “Ke nna Jehofa, leo ke lone leina la me.” * (Isaia 42:8, American Standard Version) Leina Jehofa le le itsegeng thata ka Seesemane, ke leina la Sehebera le Modimo a iphileng lone. O ka gakgamadiwa ke go itse gore leina leno la Sehebera le le sa tshwaneng le lepe le tlhagelela makgetlo a le dikete mo mekwalong ya bogologolo ya Baebele. Tota e bile, le tlhagelela gantsi go feta leina lepe fela le lengwe le le umakiwang mo Baebeleng.

Bangwe ba ka araba potso e e reng, “Leina la Modimo ke mang?” ka go re ke “Morena.” Mme tota, karabo eno ga e na tshedimosetso e e lekaneng fela jaaka motho a ne a ka araba potso e e reng, “Ke mang yo o fentseng ditlhopho?” ka go re, “ke ntlhopheng.” Dikarabo tseno ga di utlwale e re ka “Morena” le “ntlhopheng” e se maina.

Ke ka ntlha yang fa Modimo a re bolelela leina la gagwe? O dira jalo ka gonne o batla gore re mo itse botoka. Ka sekai, motho a ka bidiwa Motlotlegi, Mong, Ntate kgotsa Rremogolo, go ikaegile ka maemo. Direto tseno di senola sengwe ka ene. Mme leina la gagwe lone le re gopotsa sengwe le sengwe se re se itseng ka ene. Ka tsela e e tshwanang, direto tse di jaaka Morena, Mothatayotlhe, Rara le Mmopi di dira gore re akanye ka dilo tse di farologaneng tse Modimo a di dirileng. Mme ke leina la gagwe e bong Jehofa, le le re gopotsang sengwe le sengwe se re se itseng ka ene. Tota o ka itse Modimo jang o sa itse leina la gagwe?

Go botlhokwa gore re se ka ra itse leina leno fela mme gape re le dirise. Ka ntlha yang? Ka gonne Baebele ya re: “Mongwe le mongwe yo o bitsang leina la ga Jehofa o tla bolokwa.”—Baroma 10:13; Joele 2:32.

[Ntlha e e kwa tlase]

[Mafoko a a mo go tsebe 6]

Motho a ka bidiwa Motlotlegi, Mong, Ntate kgotsa Rremogolo, go ikaegile ka maemo. Mme leina la gagwe lone le re gopotsa sengwe le sengwe se re se itseng ka ene