A Modimo o Amega ka Nna?

Dikarabo tse di tlwaelegileng:

▪ “Modimo o mogolo thata gore a ka akanya ka mathata a me.”

▪ “Ga ke akanye gore o amega ka nna.”

Jesu o ne a reng?

▪ “Dithaga di le tlhano di rekisiwa ka madi a tshipi a le mabedi a tlhwatlhwa e e kwa tlase, ga ke re? Le fa go ntse jalo ga go e le nngwe ya tsone e e lebalwang fa pele ga Modimo. Mme le e leng meriri ya ditlhogo tsa lona e badilwe yotlhe. Se boifeng; lo botlhokwa go feta dithaga di le dintsi.” (Luke 12:6, 7) Ga go pelaelo gore Jesu o ne a ruta gore Modimo o amega ka rona.

▪ “Lo se ka le ka motlha lwa tlhobaela mme lwa re, ‘Re tla ja eng?’ kgotsa, ‘Re tla nwa eng?’ kgotsa, ‘Re tla apara eng?’ Gonne dilo tseno tsotlhe ke dilo tse ditšhaba di di gwalalelang. Gonne Rraalona wa selegodimo o a itse gore lo tlhoka dilo tseno tsotlhe.” (Mathaio 6:31, 32) Jesu o ne a tlhomamisegile gore Modimo o itse dilo tse re di tlhokang.

BAEBELE e bua ka tlhamalalo gore Modimo o amega ka rona. (Pesalema 55:22; 1 Petere 5:7) Fa e le gore go ntse jalo, ke ka ntlha yang fa re boga thata jaana gompieno? Fa e le gore Modimo o lorato e bile o na le maatla a magolo, ke eng fa a sa dire sengwe go fedisa pogo?

Karabo ya dipotso tseno e akaretsa ntlha nngwe e batho ba le bantsi ba sa e itseng—Satane Diabolo ke mmusi wa lefatshe leno le le boikepo. Fa Satane a raela Jesu o ne a re o tla mo naya magosi otlhe a lefatshe, ka go mo raya a re: “Ke tla go naya taolo eno yotlhe le kgalalelo ya yone, ka gonne e neilwe nna, mme ke e naya ope fela yo ke eletsang go e mo naya.”—Luke 4:5-7.

Ke mang yo o dirileng gore Satane a nne mmusi wa lefatshe? Fa batsadi ba rona ba ntlha e bong Adame le Efa ba ne ba ikobela Satane mme ba tlola molao wa Modimo, tota ba ne ba tlhopha gore Satane e nne mmusi wa bone. Go tloga ka nako ya fa ba ne ba tsuologa, ka bopelotelele Jehofa Modimo o ne a letla nako gore e fete go bontsha gore bolaodi jwa ga Satane bo paletswe gotlhelele. Jehofa ga a pateletse batho gore ba mo direle, go na le moo, o re neile tshono ya gore re boele kwa go ene.—Baroma 5:10.

E re ka Modimo a amega ka rona, o dirile thulaganyo ya gore Jesu a re golole mo go laolweng ke Satane. Mo isagweng, Jesu o tla ‘nyeletsa ene yo o nang le dithata tsa go baka loso, ke gore, Diabolo.’ (Bahebera 2:14) Ka go dira jalo, o tla “senya ditiro tsa ga Diabolo.”—1 Johane 3:8.

Paradaise e tla tsosolosiwa mo lefatsheng. Ka nako eo, Modimo “o tla phimola dikeledi tsotlhe mo matlhong a [batho], mme loso lo tla bo lo seyo, le fa e le khutsafalo le fa e le selelo le fa e le botlhoko di tla bo di sa tlhole di le gone. Dilo tsa pele di [tla bo di] fetile.”—Tshenolo 21:4, 5. *

[Ntlha e e kwa tlase]

[Mafoko a a mo go tsebe 8]

Paradaise e tla tsosolosiwa mo lefatsheng