Babadi ba a Botsa

Ke ka Ntlha Yang fa Basupi ba ga Jehofa ba sa Dirise Ditshwantsho mo Kobamelong ya Bone?

Mo lefatsheng ka bophara, Bahindu, Babuda, Bakatoliki le maloko a Kereke ya Orthodox ba tsaya go dirisa medingwana, ditshwantsho kgotsa matshwao mangwe e le dilo tse di botlhokwa thata mo kobamelong ya bone. Mo dikarolong dingwe tsa Afrika, batho ba obamela dilo tse ba di betlileng ka logong kgotsa letlapa tse ba akanyang gore modimo kana moya wa gagwe o nna mo go tsone.

Basupi ba ga Jehofa bone ga ba dirise mofuta ope fela wa modingwana kgotsa matshwao mo kobamelong ya bone. Fa o etela mafelo a ba kopanelang mo go one, a a itsiweng e le Diholo Tsa Bogosi, o ka se fitlhele ditshwantsho tsa batho ba go tweng ke baitshepi le fa e le sefikantswe sa ga Jesu kgotsa sa ga Marea. * Ka ntlha yang? Ela tlhoko se Baebele e se buang ka kgang eno.

Modimo O ne A Batla Gore Baiseraele ba mo Obamele Jang?

Fa Jehofa Modimo a sena go golola Baiseraele kwa Egepeto, o ne a ba naya taelo e e utlwalang sentle ya kafa a neng a batla go obamelwa ka teng. Taelo ya bobedi ya se go tweng ke Melao e e Lesome e ne e re: “O se ka wa itirela setshwantsho se se setilweng kgotsa popego e e tshwanang le epe fela e e kwa magodimong kwa godimo kgotsa e e mo lefatsheng fa tlase kgotsa e e mo metsing kafa tlase ga lefatshe. O se ka wa di ikobela le fa e le go tlhotlhelediwa go di direla, ka gonne nna Jehofa Modimo wa gago ke Modimo yo o batlang boineelo jo bo feletseng.”—Ekesodo 20:4, 5.

Fa Modimo a ntse a naya Moshe melao eno, Baiseraele ba ne ba betla namane ya gouta, gongwe ba etsisa kobamelo ya Baegepeto ya diphologolo. Ga ba a ka ba bitsa setshwantsho seo ka leina la modimo wa Baegepeto. Go na le moo, ba ne ba se amaganya le go obamela Jehofa. (Ekesodo 32:5, 6) Jehofa o ne a tsibogela seno jang? Bogale jwa gagwe bo ne jwa tukela batho ba ba neng ba obamela setshwantsho se se betlilweng, mme Moshe o ne a se senya.—Ekesodo 32:9, 10, 19, 20.

Moragonyana, Jehofa Modimo o ne a tlhalosa taelo ya bobedi go ya pele. O ne a dirisa Moshe go gakolola Baiseraele gore ba ne ba sa tshwanela go itirela “setshwantsho se se setilweng, popego ya setshwantsho sepe, setshwano sa se setonanyana kgotsa se senamagadi, setshwantsho sa phologolo epe e e mo lefatsheng, setshwantsho sa nonyane epe e e nang le diphuka e e fofang mo magodimong, setshwantsho sa sepe se se tsamayang fa fatshe, setshwantsho sa tlhapi epe e e mo metsing kafa tlase ga lefatshe.” (Duteronome 4:15-18) Ga go pelaelo gore Baiseraele ba ne ba sa tshwanela go dirisa ditshwantsho tsa mofuta ope fela le tsa popego epe fela fa ba obamela Modimo.

Le fa go ntse jalo, moragonyana Baiseraele ba ne ba simolola go obamela medingwana. Jehofa o ne a ba kgalema ka go ba romelela baporofeti ba ba neng ba ba tlhagisa gore Jehofa o ne a tlile go ba otlhaela kobamelo ya bone ya medingwana. (Jeremia 19:3-5; Amose 2:8) Setšhaba sotlhe sa Iseraele se ne sa itlhokomolosa ditlhagiso tsa Modimo. Ka jalo, Jehofa o ne a letla Bababelona go senya Jerusalema le gore setšhaba seno se isiwe botshwaro, ka 607 B.C.E.—2 Ditiragalo 36:20, 21; Jeremia 25:11, 12.

 Bakeresete ba Lekgolo la Ntlha la Dingwaga Ba ne Ba Dumela Eng?

Fa batho ba e seng Bajuda ba ne ba fetoga go nna Bakeresete ka lekgolo la ntlha la dingwaga, ba ne ba se ka ba tswelela ba dirisa medingwana fa ba obamela Modimo. Ela tlhoko se Dimeterio, mothudi wa selefera yo o neng a dira medingwana e e betlilweng kwa Efeso, a neng a se bua ka thero ya ga moaposetoloi Paulo: “Banna, lo itse sentle gore re a tlhogonolofala mo kgwebong eno. Gape, lo a bona e bile lo utlwa kafa Paulo yono, e seng mo Efeso fela, mme mo e ka nnang mo kgaolong yotlhe ya Asia, a tlhotlheleditseng boidiidi jo bogolo go dumela a ba a dira gore ba nne le kgopolo e sele, a re medimo e e dirilweng ka diatla ga se yone.”—Ditiro 19:25, 26.

Mafoko a Paulo a a buileng a tlhomamisa boammaaruri jwa tatofatso e e builweng ke Dimeterio. Fa Paulo a ne a bua le Bagerika kwa Athena, o ne a re: “Ga re a tshwanela go ithaya re re Yo e Leng Modimo o tshwana le gouta kgotsa selefera kgotsa leje, gore o tshwana le selo se se betlilweng ka botswerere le ka leano la motho. Ke boammaaruri, Modimo o tlodisitse dinako tsa botlhokakitso jo bo ntseng jalo matlho, le fa go ntse jalo jaanong o bolelela batho gongwe le gongwe gore botlhe ba ikwatlhaye.” (Ditiro 17:29, 30) Fa Paulo a bua ka yone kgang eo, o ne a kwalela Bakeresete ba kwa Thesalonika mme a ba akgola ka mafoko a a reng: “[Lo ne] lwa retologela kwa Modimong ka gone lo tswa mo medingwaneng ya lona.”—1 Bathesalonika 1:9.

Paulo ga se ene fela yo o neng a tlhagisa Bakeresete gore ba se ka ba dirisa ditshwantsho mo kobamelong ya bone, moaposetoloi Johane le ene o ne a ba tlhagisa. Kwa bofelong jwa lekgolo la ntlha la dingwaga, Johane o ne a ba bolelela jaana a tlhomame: “Itiseng mo medingwaneng.”—1 Johane 5:21.

Basupi ba ga Jehofa ba ikobela taelo e e utlwalang sentle ya Modimo ya gore ba se ka ba dirisa ditshwantsho tsa mofuta ope fela fa ba mo obamela. Ba dumela se Jehofa Modimo a se buang fa a re: “Ke nna Jehofa. Ke lone leina la me; mme ga nkitla ke naya ope o sele kgalalelo ya me, le fa e le ditshwantsho tse di betlilweng pako ya me.”—Isaia 42:8.

[Ntlha e e kwa tlase]

[Mafoko a a mo go tsebe 31]

“Ke nna Jehofa. Ke lone leina la me; mme ga nkitla ke naya ope o sele kgalalelo ya me, le fa e le ditshwantsho tse di betlilweng pako ya me.”—Isaia 42:8