Atamalana le Modimo

“Ke Itse Sentle Botlhoko Jo ba Bo Utlwang”

Ekesodo 3:1-10

“O BOITSHEPO, o boitshepo, o boitshepo Jehofa.” (Isaia 6:3) Mafoko ao a a tlhotlheleditsweng a bontsha gore Jehofa Modimo o phepa e bile o itshekile ka tsela e e ka se kang ya lekanngwa le epe. O ka ipotsa jaana, ‘A go nna boitshepo ga gagwe go dira gore a se atamelesege? A Modimo yo o boitshepo jalo a ka amega ka nna—moleofi le motho yo o sa itekanelang?’ Mma re sekaseke mafoko a a gomotsang a Modimo a neng a a bolelela Moshe a a begilweng mo go Ekesodo 3:1-10.

Letsatsi lengwe fa Moshe a ne a disitse dinku, o ne a bona sengwe se se sa tlwaelegang—setlhatshana sa mitlwa se tuka molelo mme “se sa she.” (Temana 2) E re ka a ne a batla go bona gore go diregang, o ne a atamela. Jehofa o ne a bua le Moshe go tswa mo gare ga molelo a dirisa moengele a re: “O se ka wa atamela fano. Rola bompaatšhane ba gago mo dinaong tsa gago, ka gonne lefelo le o emeng mo go lone ke mmu o o boitshepo.” (Temana 5) Akanya fela—mmu o ne wa nna boitshepo ka gonne setlhatshana se se neng se tuka se ne se tshwantshetsa go nna gone ga Modimo yo o boitshepo!

Modimo yo o boitshepo o ne a na le lebaka la go bua le Moshe. Modimo o ne a re: “Kwantle ga pelaelo ke bone pogisego ya batho ba me ba ba kwa Egepeto, e bile ke utlwile selelo sa bone ka ntlha ya bao ba ba gatelelang go dira; ka gonne ke itse sentle botlhoko jo ba bo utlwang.” (Temana 7) Modimo o ne a bona pogisego ya batho ba gagwe; e bile o ne a utlwa dikopo tsa bone. O ne a utlwisiwa botlhoko ke tlalelo ya bone. Ela tlhoko gore Modimo o ne a re: “Ke itse sentle botlhoko jo ba bo utlwang.” Fa buka nngwe e bua ka mafoko a a reng “ke itse sentle” ya re: “Mafoko ano a bontsha maikutlo, bopelonomi le kutlwelobotlhoko tse motho a nang le tsone.” Mafoko a Jehofa a neng a a bolelela Moshe a ne a bontsha gore ke Modimo yo o amegang le yo o lorato.

Modimo o ne a tla dira eng? O ne a sa ba lebe kgotsa go ba reetsa ka kutlwelobotlhoko fela. O ne a tlhotlheletsega go tsaya kgato. O ne a ikaelela go golola batho ba gagwe kwa Egepeto le go ba isa “kwa lefatsheng le le elang mashi le tswina ya dinotshe.” (Temana 8) Gore Jehofa a ba golole, o ne a laela Moshe a re: “O ntshe batho ba me . . . mo Egepeto.” (Temana 10) Moshe o ne a ikobela taelo eo mme a ntsha Baiseraele kwa Egepeto ka 1513 B.C.E.

Jehofa ga a fetoga. Gompieno baobamedi ba gagwe ba ka tlhomamisega gore o bona mathata a bone e bile o utlwa selelo sa bone fa ba kopa thuso. O itse sentle botlhoko jo ba bo utlwang. Le fa go ntse jalo, ga se fela gore Jehofa o utlwela batlhanka ba gagwe ba ba ineetseng botlhoko. Mme gape Modimo yo o pelonomi o tlhotlheletsega go ba thusa ‘ka gonne o a ba kgathalela.’—1 Petere 5:7.

Kutlwelobotlhoko ya Modimo e dira gore re nne le tsholofelo. Ka thuso ya gagwe, rona batho ba ba sa itekanelang re ka kgona go tshela ka ditekanyetso tsa gagwe tsa bophepa mme a bo a re amogela. (1 Petere 1:15, 16) Mosadi mongwe wa Mokeresete yo a neng a tshwenyegile thata mo maikutlong e bile a kgobegile marapo o ne a gomodiwa ke pego ya ga Moshe a le kwa setlhatshaneng. A re: “Fa Jehofa a kgona go dira gore mmu o nne boitshepo, ke nna le tsholofelo. Kgopolo eno e nthusitse fela thata.”

A o ka rata go ithuta mo go oketsegileng ka Modimo yo o boitshepo e bong Jehofa? O ka kgona go atamalana le ene ka gonne Jehofa ‘o itse popego ya rona sentle, o gakologelwa gore re lorole.’—Pesalema 103:14.