Atamalana le Modimo

Rraagwe Basimane Ba ba Se Nang Rre

Ekesodo 22:22-24

“RRAAGWE basimane ba ba se nang rre . . . ke Modimo mo bonnong jwa gagwe jo bo boitshepo.” (Pesalema 68:5) Mafoko ano a a tlhotlheleditsweng a re ruta thuto e e amang pelo ka Jehofa Modimo—o batla go thusa batho ba ba tlhokang. Go amega ga gagwe ka bana ba ba tlhokafaletsweng ke motsadi go bonala sentle mo molaong o a neng a o neile Baiseraele. Mma re sekaseke go umakiwa ga ntlha mo Baebeleng ga mafoko a a reng “mosimane yo o se nang rre,” * a a mo go Ekesodo 22:22-24.

Modimo o tlhagisa jaana: “Lo se ka lwa bogisa . . . mosimane yo o se nang rre.” (Temana 22) Seno e ne e se fela go kopa batho go thusa bana ba ba neng ba boga ka gonne ba tlhokafaletswe ke motsadi; e ne e le taelo ya Modimo. Ngwana yo o neng a tlhokafaletswe ke rre o ne a se na motho yo o neng a tla mo sireletsa le go mo thusa ka dilo tse a di tlhokang, mme gape o ne a le mo kotsing ya go ka sotliwa ke batho ba bangwe. Ga go na ope yo o neng a tshwanetse go “bogisa” ngwana yono ka tsela epe fela. Mo dithanolong tse dingwe tsa Baebele, lefoko “bogisa” le ranotswe e le go “sotla” le go “tshwara motho yo mongwe ka tsela e e sa siamang e le gore o solegelwe molemo.” Go sotla ngwana yo o se nang rre e ne e le kgang e e masisi mo Modimong. Modimo o ne a leba go sotla gono go le masisi go le kana kang?

Molao oo o tswelela pele ka go re: “Ruri fa lo ka mmogisa, e tla re fa a lelela kwa go nna, ruri ke tla utlwa selelo sa gagwe.” (Temana 23) Mafoko a ntlhantlha a Sehebera a na le lefoko “lo” mo temaneng ya 22 le le mo bontsing mme mo temaneng ya 23 le le mo bongweng. Motho ka bongwe le setšhaba sotlhe ba ne ba tshwanetse go ikobela molao ono wa Modimo. Jehofa o ne a lebile; a sekegela tsebe basimane ba ba se nang rre, a nna a ipaakanyeditse go tsibogela dilelo tsa bone fa ba kopa thuso.—Pesalema 10:14; Diane 23:10, 11.

Ka jalo go ne go ka direga eng fa mongwe a ne a ka sotla mosimane yo o se nang rre, ka go dira jalo a dira gore a lelele kwa Modimong a kopa thuso? Jehofa a re: “Bogale jwa me bo tla tuka, ke tla lo bolaya ka tšhaka.” (Temana 24) Buka nngwe e e tlhalosang mafoko a Baebele ya re mafoko ano “ka tlhamalalo a re ‘mme nko ya me e tla tuka,’ e leng seane se se tlhalosang bogale jo bo boitshegang.” Ela tlhoko gore Jehofa ga a ka a tlogelela baatlhodi ba batho ba kwa Iseraele gore ba dirise molao ono. Modimo ka boene o ne a tla atlhola mongwe le mongwe yo o neng a sotla ngwana yo o sa kgoneng go itshireletsa.—Duteronome 10:17, 18.

Jehofa ga a fetoga. (Malaki 3:6) O utlwela botlhoko ngwana yo o se nang motsadi kgotsa batsadi. (Jakobe 1:27) Rre wa basimane ba ba se nang borre o tuka bogale ka tsela e e siameng fa bana ba ba se nang molato ba sotliwa. Ba ba sotlang ngwana yo o se nang rre ba ka se falole “bogale jo bo tukang jwa ga Jehofa.” (Sefania 2:2) Batho ba ba ntseng jalo ba ba boikepo ba tla lemoga gore “ke selo se se boifisang go wela mo diatleng tsa Modimo yo o tshelang.”—Bahebera 10:31.

[Ntlha e e kwa tlase]