Se re Se Ithutang mo go Jesu

Ka Isagwe ya Batho

A Jesu o ne a solofetsa batho go tshela kwa legodimong?

Ee, o ne a dira jalo! Jesu ka boene o ne a tsosiwa mme a tlhatlogela kwa legodimong go ya go nna le Rraagwe. Mme pele a swa le go tsosiwa, o ne a bolelela baaposetoloi ba gagwe ba ba ikanyegang ba ba 11 jaana: “Mo ntlong ya ga Rre go na le manno a le mantsi. . . . Ke a tsamaya go ya go lo baakanyetsa lefelo.” (Johane 14:2) Le fa go ntse jalo ba ba yang kwa legodimong ba tla nna mmalwa. Jesu o ne a tlhalosa ntlha eno sentle fa a ne a raya barutwa ba gagwe a re: “Se boifeng, letsomanyane, ka gonne Rraalona o amogetse go lo naya bogosi.”—Luke 12:32.

“Letsomanyane” le tla dirang kwa legodimong?

Rara o batla gore setlhopha seno se sennye se nne karolo ya puso ya kwa legodimong le Jesu. Re itse seo jang? Morago ga gore Jesu a tsosiwe, o ne a senolela moaposetoloi Johane gore batho bangwe ba ba ikanyegang ba tla “busa lefatshe e le dikgosi.” (Tshenolo 1:1; 5:9, 10) Tseno ke dikgang tse di molemo. Sengwe sa dilo tse batho ba di tlhokang thata ke puso e e molemo. Puso eno ya ga Jesu e tla dirang? Jesu o ne a re: “Mo popong e ntšha, fa Morwa motho a nna mo setulong sa gagwe sa bogosi se se galalelang, lona ba lo ntshetseng morago le lona ka bolona lo tla nna mo ditulong tse di lesome le bobedi.” (Mathaio 19:28) Puso e e laolwang ke Jesu le balatedi ba gagwe e tla dira gore go nne le ‘popo e ntšha’ kgotsa go ntšhafadiwa go go tla dirang gore go nne le maemo a a siameng a  a tshwanang le a banyalani ba ntlha ba neng ba a itumelela mo lefatsheng pele ba leofa.

Jesu o ne a solofetsa batho ba bangwe botlhe eng?

Go farologana le Jesu yo o neng a bopetswe go tshela kwa legodimong, batho bone ba ne ba bopetswe gore ba tshele mo lefatsheng. (Pesalema 115:16) Ka jalo, Jesu o ne a re: “Lona lo tswa kwa mafelong a a kwa tlase; nna ke tswa kwa mafelong a a kwa godimo.” (Johane 8:23) Jesu o ne a bua ka isagwe e e itumedisang e e tla bonwang ke batho mo lefatsheng. Nako nngwe, o ne a re: “Go itumela ba ba bonolo, e re ka ba tla rua lefatshe.” (Mathaio 5:5) O ne a umaka pesalema e e tlhotlheleditsweng e e reng: “Ba ba pelonolo ba tla rua lefatshe, ruri ba tla nna le boitumelo jo bogolo mo letlotlong la kagiso. Basiami ba tla rua lefatshe, mme ba tla aga mo go lone ka bosakhutleng.”—Pesalema 37:11, 29.

Ka jalo ba “letsomanyane” ba ba yang kwa legodimong, ga se bone fela ba ba tla bonang botshelo jo bosakhutleng. Gape Jesu o ne a bua ka tsholofelo e batho ba bangwe ba neng ba tla nna le yone. O ne a re: “Modimo o ratile lefatshe mo go kalo mo a bileng a ntsha Morwawe yo o tsetsweng a le esi, gore mongwe le mongwe yo o dumelang mo go ene a se ka a senngwa mme a nne le botshelo jo bo sa khutleng.”—Johane 3:16.

Modimo o tla fedisa jang go boga ga batho?

Jesu o ne a bua ka go tlosiwa ga dilo tse pedi tse di bogisang batho fa a ne a re: “Jaanong lefatshe leno le a atlholwa; jaanong mmusi wa lefatshe leno o tla latlhelwa kwa ntle.” (Johane 12:31) Sa ntlha, batho ba ba sa siamang ba ba bakang pogo ba tla atlholwa le go fedisiwa. Sa bobedi, Satane o tla latlhelwa kwa ntle mme a ka se tlhole a tsietsa batho.

Go tweng ka batho ba pele ba neng ba tshela mme ba swa ba ise ba ithute ka Modimo le Keresete le go dumela mo go bone? Jesu o ne a raya modirabosula yo o neng a swa a bapile le ene a re: “O tla nna le nna mo Paradaiseng.” (Luke 23:43) Motho yoo, mmogo le dimilione tse dingwe tsa batho, o tla nna le tshono ya go ithuta ka Modimo fa Jesu a mo tsosetsa mo lefatsheng la paradaise. Ka nako eo o tla nna le tshono ya go nna gareng ga batho ba ba pelonolo le ba ba siameng ba ba tla bonang botshelo jo bo sa khutleng mo lefatsheng.—Ditiro 24:15.

Go bona tshedimosetso e e oketsegileng, bona kgaolo 3 le 7 ya buka ya Totatota Baebele e Ruta Eng? *

[Ntlha e e kwa tlase]

[Setshwantsho mo go tsebe 23]

“Basiami ba tla rua lefatshe, mme ba tla aga mo go lone ka bosakhutleng.”—Pesalema 37:29