GO NA le mongwe yo o batlang go go thibela gore o se ka wa itse leina la Modimo le go itumelela go nna le kamano e e gaufiufi le ene. Ke mang mmaba yono yo o boikepo? Baebele e tlhalosa jaana: ‘Modimo wa tsamaiso eno ya dilo o foufaditse megopolo ya ba ba sa dumeleng.’ Modimo wa lefatshe leno le le sa siamang ke Satane Diabolo. O batla gore o nne mo lefifing gore pelo ya gago e se ka ya bonesiwa ke “kitso e e galalelang ya Modimo.” Satane ga a batle gore o itse leina la Modimo e bong Jehofa. Le fa go ntse jalo, Satane o foufatsa megopolo ya batho jang?—2 Bakorintha 4:4-6.

Satane o dirisitse bodumedi jwa maaka gore batho ba se ka ba itse leina la Modimo. Ka sekai, mo metlheng ya bogologolo Bajuda bangwe ba ne ba itlhokomolosa Dikwalo tse di tlhotlheleditsweng mme ba tlhopha go latela dingwao tse di neng di batla gore batho ba se ka ba dirisa leina la Modimo. Mo lekgolong la ntlha la dingwaga la Motlha wa Rona, go bonala Bajuda ba ba neng ba balela batho ba ne ba laetswe gore ba se ka ba bala leina la Modimo jaaka le tlhagelela mo Dikwalong tsa bone tse di Boitshepo mme ba le emisetse ka lefoko ʼAdho·naiʹ, le le kayang “Morena.” Ga go pelaelo gore mokgwa ono o ne wa dira gore batho ba se ka ba kgatlhegela dilo tsa semoya. Batho ba le bantsi ga ba a ka ba bona melemo ya go nna le kamano le Modimo. Mme go tweng ka Jesu? O ne a ikutlwa jang ka go dirisa leina la Modimo e bong Jehofa?

Jesu o ne a bua jaana fa a rapela Rraagwe: “Ke . . . itsisitse leina la gago e bile ke tla dira gore le itsiwe.” (Johane 17:26) Ga go pelaelo gore Jesu o ne a dirisa leina la Modimo ka makgetlo a le mmalwa fa a ne a bala, a nopola kgotsa a tlhalosa dikarolo tsa Dikwalo Tsa Sehebera tse di nang le leina leo le le botlhokwa. Jesu o tshwanetse a bo a ile a dirisa leina la Modimo ka kgololesego fela jaaka baporofeti botlhe ba ne ba dira pele ga gagwe. Fa e le gore Bajuda ba ne ba sa dirise leina la Modimo ka nako ya bodiredi jwa ga Jesu, Jesu o ne a sa latele mokgwa wa bone. O ne a kgala thata baeteledipele ba bodumedi fa a ne a ba raya a re: “Lo dirile lefoko la Modimo lefela ka ntlha ya ngwao ya lona.”—Mathaio 15:6.

Balatedi ba ga Jesu ba ba ikanyegang ba ne ba tswelela pele ba itsise leina la Modimo fa Jesu a sena go swa le go tsosiwa. (Bona lebokoso la setlhogo se se reng  “A Bakeresete ba Pele Ba ne Ba Dirisa Leina la Modimo?”) Ka Pentekosete ya 33 C.E., letsatsi le phuthego ya Bokeresete e neng ya tlhomiwa ka lone, moaposetoloi Petere o ne a nopola boporofeti jwa ga Joele fa a raya boidiidi jwa Bajuda le basokologi a re: “Mongwe le  mongwe yo o bitsang leina la ga Jehofa o tla bolokwa.” (Ditiro 2:21; Joele 2:32) Bakeresete ba pele ba ne ba thusa batho ba ditšhaba di le dintsi gore ba itse leina la Modimo e bong Jehofa. Ka jalo, fa baaposetoloi le banna ba bagolwane ba ne ba kopane kwa Jerusalema, morutwa Jakobe o ne a re: ‘Modimo o ne a lebisa tlhokomelo ya gagwe kwa ditšhabeng gore a ntshe batho ba leina la gagwe mo go tsone.’—Ditiro 15:14.

Le fa go ntse jalo, mmaba wa leina la Modimo ga a ka a ineela. Fa baaposetoloi ba sena go swa, Satane o ne a simolola ka bonako go kgothaletsa botlhanogi. (Mathaio 13:38, 39; 2 Petere 2:1) Ka sekai, mokwadi yo go tsewang gore ke Mokeresete e bong Justin Martyr o ne a tsholwa mo e ka nnang ka nako e moaposetoloi wa bofelo e bong Johane a tlhokafetseng ka yone. Le fa go ntse jalo, gangwe le gape mo dibukeng tsa gagwe Justin o ne a gatelela gore Motlamedi wa dilo tsotlhe ke “Modimo yo o sa bidiweng ka leina lepe.”

 Fa Bakeresete ba batlhanogi ba ne ba dira dikhopi tsa Dikwalo Tsa Bokeresete Tsa Segerika, go bonala ba ne ba ntsha leina la ga Jehofa ba bo ba le emisetsa ka Kyʹri·os, e leng lefoko la Segerika le le kayang “Morena.” Go ne ga direga se se tshwanang le mo Dikwalong Tsa Sehebera. E re ka bakwadi ba batlhanogi ba Bajuda ba ne ba sa tlhole ba balela leina la Modimo kwa godimo, ba ne ba le emisetsa ka ʼAdho·naiʹ mo Dikwalong tsa bone ka makgetlo a feta 130. Ka 405 C.E., Jerome o ne a wetsa go ranola Baebele ya Selatine e e neng ya tlhotlheletsa batho ba le bantsi, e e neng e bidiwa Vulgate e le yone e neng e se na leina la Modimo.

Gompieno bakanoki ba a itse gore leina la ga Jehofa le tlhaga makgetlo a ka nna 7 000 mo Baebeleng. Ka jalo, dithanolo dingwe tse di dirisiwang thata, tse di jaaka Jerusalem Bible ya Katoliki, La Biblia Latinoamérica ya Katoliki e e kwadilweng ka Se-Spain le thanolo e e itsegeng ya Reina Valera e le yone e kwadilweng ka Se-Spain, di dirisa leina la Modimo. Dithanolo dingwe di ranola leina la Modimo e le “Yahweh.”

Ka maswabi, dikereke di le dintsi tse di tshegetsang ka madi go ranolwa ga Baebele di gatelela bakanoki gore ba se ka ba tsenya leina la Modimo fa ba ranola Baebele. Ka sekai, mo lekwalong la June 29, 2008 le Vatican e le kwaletseng boporesidente ba bobishopo ba Katoliki, e ne ya re: “Mo dingwageng tsa bosheng mokgwa ono wa go bitsa leina la Modimo wa Iseraele o ne wa dirisiwa ka iketlo.” Lekwalo leno le laela jaana ka tlhamalalo: “Leina la Modimo . . . ga le a tshwanela go dirisiwa kgotsa go umakiwa.” Mo godimo ga moo, “fa go ranolwa mokwalo wa Baebele ka dipuo tsa bosheng, . . . ditlhaka di le nnè tse di emelang leina la Modimo di tshwanetse go ranolwa e le Adonai/Kyrios: ‘Morena.’” Eleruri, boikaelelo jwa taelo eno ya Vatican ke go nyeletsa go dirisa leina la Modimo.

Baporotesetanta le bone ka tsela e e tshwanang ba ile ba nyatsa leina la Modimo e bong Jehofa. Mmueledi wa New International Version e e neng e tshegediwa ke Baporotesetanta ka madi, e e gatisitsweng ka Seesemane ka 1978, o ne a kwala jaana: “Jehofa ke leina le le tlhaolang Modimo mme re tshwanetse go ka bo re le dirisitse. Mme re dirisa dimilione di le 17 tsa diranta go ranola thanolo eno mme tsela e e siameng e re ka bong re dirisitse madi ao ka yone ke ka go ranola, ka sekai, Pesalema 23 e le, ‘Yahweh ke modisa wa me.’”

Mo godimo ga moo, dikereke di thibetse batho ba kwa Latin America go itse leina la Modimo. Steven Voth, moitse wa tsa boranodi wa United Bible Societies (UBS) a re: “Sengwe sa dilo tse Baporotesetanta ba kwa Latin America ba ganetsanang thata ka sone ke go dirisiwa ga leina  Jehová . . . Se se kgatlhang ke gore batho ba bantsi le ba ba ntseng ba oketsega ba ba ratang kereke ya Pentekosete . . . ba ne ba re ba batla thanolo ya 1960 ya Reina Valera, mme e se na leina Jehová. Go na le moo, ba ne ba batla lefoko Señor [Morena].” Go ya ka Voth, kwa tshimologong UBS e ne ya gana kopo eno mme moragonyana ya ineela le go gatisa thanolo ya Baebele ya Reina Valera “e sa tsenya lefoko Jehová.”

Go phimola leina la Modimo mo Lefokong la gagwe le le kwadilweng le go le emisetsa ka “Morena,” go dira gore babadi ba se ka ba itse gore Modimo ke mang. Seo se baka tlhakatlhakano. Ka sekai, mmadi a ka nna a se lemoge gore a lefoko “Morena” le kaya Jehofa kgotsa Morwawe, Jesu. Ka jalo, mo temaneng e moaposetoloi Petere a nopolang Dafide a re: “Jehofa o ne a raya Morena [Jesu yo o tsositsweng] wa me a re: ‘Nna kafa seatleng sa me sa moja,’” dithanolo di le dintsi tsa Baebele di balega jaana: “Morena o ne a raya Morena wa me a re.” (Ditiro 2:34, NIV) Mo godimo ga moo, David Clines mo tlhamong ya gagwe ya “Yahweh le Modimo wa Thutabodumedi ya Bokeresete,” a re: “Lebaka le lengwe la go bo Yahweh a seyo mo Bokereseteng ke gore go ntse go tlwaetswe go buiwa thata ka Keresete.” Ka jalo, batho ba le bantsi ba ba tsenang kereke ga ba itse gore Modimo wa boammaaruri yo Jesu a neng a mo rapela ke Motho yo o nang le leina—Jehofa.

Satane o dirile ka natla go foufatsa megopolo ya batho gore ba se ka ba itse Modimo. Tota le fa go ntse jalo, o ka kgona go atamalana thata le Jehofa.

O ka tlhomamisega gore Satane o ikaeletse go nyeletsa leina la Modimo, mme ka botlhale o dirisitse bodumedi jwa maaka gore bo dire seno. Le fa go ntse jalo, boammaaruri ke gore ga go na maatla ape kwa legodimong kgotsa mo lefatsheng a a ka thibelang Morena Molaodimogolo Jehofa go itsise batho ba ba batlang go itse boammaaruri ka ene, leina la gagwe le se a ikaeletseng go se direla batho ba ba ikanyegang.

Basupi ba ga Jehofa ba tla itumelela go go thusa go bona kafa o ka atamalanang le Modimo ka gone ka go ithuta Baebele. Ba latela sekao sa ga Jesu yo o neng a raya Modimo a re: “Ke ba itsisitse leina la gago.” (Johane 17:26) Fa o ntse o tlhatlhanya ka ditemana tse di senolang ditiro tse di farologaneng tse Jehofa a tla di direlang batho, o tla itse dikarolo di le dintsi tse di kgatlhang tsa botho jwa gagwe jo bo sa tshwaneng le bope.

Tlhogo ya lotso e e ikanyegang e bong Jobe, o ne a itumelela go “atamalana thata le Modimo” mme le wena o ka kgona. (Jobe 29:4) Fa o na le kitso ya Lefoko la Modimo, o ka kgona go itse leina la ga Jehofa. Kitso eo e tla go tlhomamisetsa gore Jehofa o tla dira tumalanong le se a reng ke bokao jwa leina la gagwe—‘Ke Tla Nna sengwe le sengwe se ke batlang go nna sone.’ (Ekesodo 3:14) Ka jalo, ruri o tla diragatsa ditsholofetso tsotlhe tse di molemo tse a di solofeditseng batho.