“Seno se Raya Botshelo Jo bo Sa Khutleng”

“Seno se raya botshelo jo bo sa khutleng, go tsenya kitso ka ga gago, Modimo yo o esi wa boammaaruri, le ka ga yo o mo romileng, e bong Jesu Keresete.”—JOHANE 17:3.

KITSO e ka boloka botshelo. Fa Nouhou wa dikgwedi di le lesome a ne a lwala, mmaagwe—yo o neng a direla setšhaba ditiro tse di amanang le boitekanelo kwa Niger—o ne a itse se a tshwanetseng go se dira. O ne a direla morwawe motswako o o dirang gore motho a boe a nne le metsi gape mo mmeleng, a o dira ka go tlhakanya sukiri, letswai le metsi a a phepa. Go ya ka mokgatlho wa UNICEF, e re ka mosadi yono a ile a “tsaya kgato ka bonako e bile a ne a na le kitso nngwe ya tsa boitekanelo, ngwana wa gagwe o ile a fola ka bonako.”

Kitso e e fitlhelwang mo Baebeleng le yone e ka boloka matshelo a batho. Mokwadi wa ntlha wa Baebele e bong Moshe o ne a bolela jaana: “Ga se lefoko le le se nang mosola mo go lona, mme le raya botshelo jwa lona, mme lo ka lelefatsa malatsi a lona ka lefoko leno.” (Duteronome 32:47) A tota Baebele e ka lelefatsa malatsi a rona? Ke ka tsela efe e rayang botshelo mo go rona?

Ditlhogo tse tlhano tse di fetileng tsa motseletsele ono di bontshitse gore Baebele ke buka e e sa tshwaneng le epe malebana le kafa boporofeti jwa yone bo ikanyegang ka teng, kafa ditiragalo tsa yone di leng boammaaruri ka teng le kafa e leng boammaaruri ka teng mo go tsa saense, kafa dibuka tsa yone di dumalanang ka teng le kafa kaelo ya yone e leng mosola ka teng. Seno se bontsha gore Baebele e tlhomologile. Ka jalo, fa e bua ka go tshela botshelo jo boleele—botshelo jo bo sa khutleng—a seo ga se go tlhotlheletse gore o e sekaseke ka kelotlhoko?

Re go rotloetsa go ithuta kafa kitso ya boammaaruri ya Baebele e ka dirang ka teng gore o nne le kagiso ya mogopolo gone jaanong le gore o itumele mo isagweng. Basupi ba ga Jehofa ba tla itumelela go go bontsha kafa o ka bonang kitso eo ka teng.

[Lebokoso/Setshwantsho mo go tsebe 9]

Tsela e nngwe e Baebele e tlhomologileng ka yone ke gore ke yone fela e e re nayang dikarabo tse di kgotsofatsang tsa dipotso tseno tsa botlhokwa tse re di ipotsang:

• Ke eng fa re le mono?

• Ke eng fa go na le pogo e kana kana?

• A go na le tsholofelo epe ka batho ba ke ba ratang ba ba suleng?

O ka bona dikarabo tsa dipotso tseno tse di tswang mo Baebeleng mo bukeng eno Totatota Baebele e Ruta Eng? e e gatisitsweng ke Basupi ba ga Jehofa.