“Kagiso Gareng ga Batho ba ba Amogelwang”
“Kgalalelo e nne go Modimo kwa bogodimong jo bo kwa godimo, mme mo lefatsheng go nne kagiso gareng ga batho ba ba amogelwang.”—LUKE 2:14.
Lebaka la go bo bangwe ba keteka Keresemose.
Ngwaga le ngwaga, mopapa le baeteledipele ba bangwe ba bodumedi ba rera ka kagiso ba solofetse gore paka ya Keresemose e tla diragatsa mafoko ano a moengele: “Mo lefatsheng go nne kagiso gareng ga batho ba ba amogelwang.” Bangwe ba tsaya maeto a sedumedi go ya go keteka Keresemose.
Ke ka ntlha yang fa e le kgwetlho?
Gantsi kagiso ka nako ya Keresemose ke selo sa nakwana fela. Ka sekai, ka December 1914 fa Ntwa ya Lefatshe ya 1 e ne e fagile kwa Yuropa, masole a kwa Boritane le a kwa Jeremane a ne a tswa mo ntweng mme a ya go keteka Keresemose mmogo. Ba ne ba ja, ba nwa mmogo le go abelana disekerete. Ba ile ba bo ba tshameka kgwele ya dinao mmogo. Le fa go ntse jalo, peomarumofatshe ga ya ka ya tsaya lobaka. Mo lekwalong lengwe le lesole lengwe la kwa Boritane le neng la le kwala le le kwa ntweng le ne la tlhalosa se lesole lengwe la Mojeremane le neng la mo raya sone: “Gompieno re mo kagisong. Ka moso o tla lwela naga ya gaeno; nna ke tla lwela ya rona.”
Ke melaometheo efe ya Baebele e e ka thusang?
“Re tsaletswe ngwana . . . O tla tewa leina . . . Kgosana ya Kagiso. Letlotlo la go busa e le kgosana le kagiso ga di kitla di fela.” (Isaia 9:6, 7) A boporofeti joo jo bo buang ka Jesu Keresete ga bo gomotse? Jesu ga a ka a tsholwa mo lefatsheng gore a tlise kagiso ya letsatsi le lengwe ngwaga le ngwaga. E re ka e le Mmusi wa kwa legodimong, o tla tlisa kagiso ya mmatota e e tla nnelang ruri.
“Lo tle lo nne le kagiso ka nna [Jesu]. Mo lefatsheng lo na le pitlagano, mme nnang pelokgale! Ke fentse lefatshe.” (Johane 16:33) Tota le gompieno Jesu o rotloetsa balatedi ba gagwe gore ba nne le kagiso mo gare ga bone. Gone ke boammaaruri gore Bakeresete ba na le pitlagano. Le fa go ntse jalo, ka ntlha ya go ithuta Baebele, ba tlhaloganya lebaka la go bo pogo e le teng le gore Jesu o tla tlisa jang kagiso e e tla nnelang ruri. Ka ntlha ya seo, ba na le kagiso ya mogopolo.
Ka go latela mafoko a ga Jesu, Basupi ba ga Jehofa—go sa kgathalesege gore ke ba morafe ofe, ba mmala ofe, ba lotso lofe kgotsa ba bua puo efe—ba itumelela kagiso e e ntseng jalo. O ka kgona go bona seo ka go ya kwa dipokanong tsa bone kwa Holong ya Bogosi. Gongwe le wena, jaaka batho ba bangwe ba bantsi, o tla dumela gore kagiso eno e botoka go gaisa kagiso epe fela e e nnang teng ka Keresemose.
Basupi ba ga Jehofa ba kopanngwa ke kagiso go sa kgathalesege gore ke ba mmala ofe kgotsa ba bua puo efe. O ka kgona go bona seo ka go ya kwa dipokanong tsa bone kwa Holong ya Bogosi
