“Go ikutlwa o se motho wa sepe ke sekgoreletsi se segolo se ke lekang go se fenya.” Mosadi mongwe yo o neng a go fitlhela go le thata go dumela gore Jehofa o tla tsamaya a nna le lebaka la go amega ka ene o ne a bolela jalo. A le wena o ikutlwa jaaka ene? Fa e le gore go ntse jalo, o ka nna wa ipotsa gore, ‘A tota Jehofa o amega ka mongwe le mongwe wa baobamedi ba gagwe?’ Karabo ke ee! Mafoko a ga Jesu a bontsha gore Jehofa o amega ka rona.—Bala Johane 6:44.

Jesu, yo o itseng botho jwa ga Jehofa botoka le go rata ga gagwe go gaisa ope fela o ne a reng? (Luke 10:22) Jesu o ne a re: “Ga go na motho ope yo o ka tlang mo go nna fa Rara, yo o nthomileng, a sa mo goge.” Ka gone, re ka se nne balatedi ba ga Keresete—le baobamedi ba Rraarona yo o kwa legodimong, Jehofa—fa Jehofa ka boene a sa re goge. (2 Bathesalonika 2:13) Fa re tlhaloganya gore mafoko a ga Jesu a kaya eng, re tla kgona go bona bosupi jo bo nonofileng jwa gore Modimo o amega ka rona mo mafokong a gagwe.

Go kaya eng gore Jehofa o a re goga? Lediri la Segerika le le ranotsweng e le “goga” le dirisiwa gape fa go buiwa ka go gogela ditlhapi mo letloweng. (Johane 21:6, 11) A Jehofa o re goga le fa re sa batle, a re pateletsa go mo direla? Nnyaa. Jehofa o re neile kgololesego ya go kgona go itlhophela, ka jalo, ga a bule dipelo tsa rona ka go re pateletsa. (Duteronome 30:19, 20) Jehofa o hukutsa dipelo tsa batho ba le dimilione mo lefatsheng leno, a batla batho ba ba nang le boikutlo jo bo siameng. (1 Ditiragalo 28:9) Fa a bona motho yo o ntseng jalo, o tsiboga ka tsela e e lorato. Jang?

Jehofa o ngoka, kgotsa o goga pelo ya motho yo o nang le “tshekamelo e e siameng” ka bonolo. (Ditiro 13:48) Jehofa o dira jalo ka ditsela di le pedi—ka molaetsa wa Baebele wa dikgang tse di molemo, tse di fitlhang mo go mongwe le mongwe wa rona le ka moya wa gagwe o o boitshepo. Fa Jehofa a bona pelo e e ratang dithuto tse di boammaaruri tsa Baebele, o dirisa moya wa gagwe go thusa motho yoo go tlhaloganya le go dirisa boammaaruri joo mo botshelong jwa gagwe. (1 Bakorintha 2:11, 12) Kwantle ga thuso ya Modimo, le ka motlha re ka se nne balatedi ba ga Jesu le baobamedi ba ba ineetseng ba ga Jehofa.

Ka gone, mafoko a ga Jesu a a mo go Johane 6:44 a re ruta eng ka Jehofa Modimo? Jehofa o goga batho ka gonne a bona sengwe se se siameng mo dipelong tsa bone e bile o amega ka mongwe le mongwe wa bone. Go tlhaloganya boammaaruri jono jo bo kgotsofatsang go ile ga gomotsa mosadi yo o umakilweng kwa tshimologong. A re: “Go nna motlhanka wa ga Jehofa ke tshiamelo e kgolo e motho ope a ka nnang le yone. Mme fa e le gore Jehofa o ntlhophile go nna motlhanka wa gagwe, go raya gore ke tshwanetse ka bo ke le botlhokwa mo go ene.” Go tweng ka wena? A go itse gore Jehofa o amega ka mongwe le mongwe wa baobamedi ba gagwe go go rotloetsa go mmulela pelo ya gago?