Ke tsholetswe kwa torotswaneng ya Texcoco. Ka nako eo, bontsi jwa mebila e ne e tletse maje e bile e le lorole. Go ne go tlwaelegile go bona batho ba tswa mo metseng e e gaufi ba tla ka ditonki tsa bone mo toropong di rwele dilo tse ba di rekisang. Re ne re le lelapa le le humanegileng thata la bana ba le robongwe, mme nna ke ne ke le wa bosupa mo go bone. Rre o ne a baakanya di-guarache (dimpatšhane tsa bogologolo) go tlamela lelapa. O ne a tlhokafala fa ke le dingwaga di le supa. Go tloga ka nako eo, mmè o ne a kgaratlha gore a kgone go tlamela lelapa ka dijo.

Rremogolo o ne a tshameka violin e bile o ne a opedisa mmino wa orchestra o o neng o dirisiwa thata mo mminong wa bodumedi wa classic. Mo e ka nnang mongwe le mongwe mo lelapeng o ne a na le seletswa se a se tshamekang. Mmè o ne a opela mo khwaereng ya kereke mme malome ene e ne e le seopedi sa opera e bile a tshameka piano. Re ne re le lelapa le le ratang bodumedi thata—ke ne ke le mosimane yo o thusang moruti ka nako ya mmisa e bile ke ne ke batla go nna morongwa wa Mokatoliki. Mme gape ke ne ke rata difilimi tsa karate. Fa ke ntse ke leba difilimi tseno, ke ne ka nna dikgoka le go feta.

Ke ne ka tsena sekolo sa bodumedi kwa Puebla, se se neng se tshwana le sekolo sa boruti. Mokgele wa me e ne e le go nna moruti wa Katoliki. Mme fa ke tloga ke fetsa dithuto tsa me, ke ne ka swabisiwa ke Kereke ya Katoliki. Moitlami mongwe yo mosha o ne a batla gore ke tlhakanele dikobo le ene. Ke ne ka tila thaelo mme tiragalo eo e ne ya dira gore ke nne le keletso ya go nyala. Mo godimo ga moo, ke ne ka lemoga gore baruti bangwe ba ne ba tshela botshelo jwa boitimokanyi. Kgabagare, ke ne ka tlogela mokgele wa go batla go nna moruti.

 Ke ne ka swetsa ka gore ke ye go ithuta mmino kwa National Conservatory of Music kwa Mexico City. Fa ke sena go aloga, ke ne ka nyala mme go ise go ye kae nna le mosadi wa me re ne ra nna le bana ba le banè. Ke ne ka tlamela lelapa la me ka go opela ka nako ya Mmisa mo Kerekeng ya Katoliki.

Go tloga fela kwa tshimologong re ne ra nna le mathata mo lenyalong la rona. Nna le mosadi wa me re ne re lwa, re lwa segolobogolo ka go bo re ne re le lefufa ka bobedi jwa rona. Kwa tshimologong re ne re lwa ka mafoko mme go tswa foo ra lwantshana ka tsela ya mmatota. Kgabagare, morago ga dingwaga di le 13, re ne ra swetsa ka gore re kgaogane mme moragonyana re ne ra tlhalana.

Lekgetlho la ntlha ke kopana le Basupi ba ga Jehofa e ne e le pele ga ke kgaogana le mosadi wa me. Basupi ba le babedi ba ne ba re etela mme ba ne ba kopa go tlotla le rona ka Baebele. Ke ne ke akanya gore ke itse go le gontsi ka bodumedi mme ke ne ke batla go ba bontsha gore ga ba bue boammaaruri. Ke ne ka ba botsa dipotso tse di thata tse ke neng ke akanya gore ba ka se di arabe. Ke ne ka gakgamadiwa ke gore ka metlha ba ne ba nnaya dikarabo tse di utlwalang tse di theilweng mo Baebeleng. Ke ne ka simolola go bona kafa ke neng ke sa itse sepe ka gone. Le fa go ntse jalo, mosadi wa me o ne a galefela Basupi thata mme nna ke ne ke tshwaregile thata, ka jalo, ba ne ba tlogela go re etela.

Dingwaga di le tlhano moragonyana, fa ke kopana gape le Basupi ba ga Jehofa ke ne ke nna le mosadi yo mongwe e bong Elvira. Elvira o ne a sa ganetse Basupi, ka jalo go ne go le motlhofo gore ke ithute Baebele ka metlha. Le fa go ntse jalo, go ile ga ntsaya dingwaga di le mmalwa gore ke kgone go fetola tsela e ke neng ke tshela ka yone.

Ke ne ka lemoga gore fa ke batla go obamela Jehofa ka peloyotlhe, ke tlhoka go dira diphetogo dingwe tse dikgolo. Sa ntlha ke ne ka tshwanelwa ke go tlogela tiro ya me ya go opela ka nako ya Mmisa mo Kerekeng ya Katoliki, se se neng se raya gore ke ne ke tshwanelwa ke go batla tsela e nngwe ya go itshedisa. (Tshenolo 18:4) Gape ke ne ke tlhoka go kwadisa lenyalo la me semolao.

Phetogo e nngwe e ke neng ka tshwanelwa ke go e dira, e ne e le go ithuta go laola kgalefo ya me. Ke thusitswe thata ke ditemana tse pedi tseno tsa Baebele: Pesalema 11:5 e e bontshang gore Jehofa o tlhoile thubakanyo le 1 Petere 3:7 e e nthutileng gore fa ke batla gore Jehofa a utlwe dithapelo tsa me, ke tshwanetse go tlotla mosadi wa me. Fa ke ntse ke tlhatlhanya ka ditemana tseo le go rapela gore Jehofa a nthuse, ka bonya ke ne ka kgona go laola bogale jwa me.

Gone jaanong ke itumela go bo ke na le lelapa le le itumetseng. Ke leka go baakanya kamano ya me le bomorwaake ba lenyalo la ntlha le go thusa lelapa le ke nang le lone gone jaanong gore le nne le nonofile mo tumelong.

Fa ke ne ke le ngwana ke ne ke batla go nna moruti le go thusa batho. Jaanong ke akanya gore botshelo jwa me bo na le bokao jwa mmatota. Ke tlamela ba lelapa la me ka go ruta mmino. Ke leboga Jehofa thata go bo a ile a nna pelotelele mo go nna le go nnaya tshono ya go fetoga go nna motho yo o botoka!