A o kile wa tlhaolwa? A go kile ga direga gore o se ka wa direlwa selo se o se kopang kgotsa wa tshwarwa makgwakgwa ka ntlha ya mmala wa letlalo la gago, lotso lwa gago kgotsa ka ntlha ya maemo a gago? Fa e le gore go ntse jalo, ga se wena fela. Le fa go ntse jalo, dikgang tse di itumedisang ke tseno: Le fa go sotliwa jalo go tletse mo lefatsheng, ga go a nna jalo kwa legodimong. Moaposetoloi wa Mokeresete e bong Petere o ne a bolela jaana a tlhatswegile pelo thata: “Modimo ga a na tlhaolele.”—Bala Ditiro 10:34, 35.

Petere o ne a bua mafoko ao mo maemong a a sa tlwaelegang—mo ntlong ya Moditšhaba mongwe e bong Korenelio. Petere, yo o tshotsweng e le Mojuda, o ne a tshela ka nako ya fa Bajuda ba ne ba leba Baditšhaba e le batho ba ba seng phepa mme ka ntlha ya seo motho o ne a sa tshwanela go nna le kamano epe le bone. Gone mme, ke ka ntlha yang fa Petere a ne a le kwa ntlong ya ga Korenelio? Ka gonne Jehofa Modimo o ne a rulagantse gore ba kopane. Petere o ne a bona ponatshegelo e e tswang kwa Modimong e mo go yone a neng a bolelelwa jaana: “Tlogela go bitsa dilo tse Modimo a di ntlafaditseng o re di leswafetse.” Pelenyana ga foo, Petere a sa itse, Korenelio le ene o ne a bona ponatshegelo e mo go yone moengele a neng a mo laela gore a bitse Petere. (Ditiro 10:1-15) Fa Petere a lemoga gore ke thulaganyo ya ga Jehofa, ga a ka a kgona go didimala.

Petere o ne a re: “Ruri ke a lemoga gore Modimo ga a na tlhaolele.” (Ditiro 10:34) Lefoko la Segerika le le ranotsweng e le “tlhaolele” fa le tsewa fela jaaka le ntse, le kaya “motho yo o tsayang difatlhego.” (The Kingdom Interlinear Translation of the Greek Scriptures) Malebana le lefoko leno, mokanoki mongwe a re: “Le kaya moatlhodi yo o lebang sefatlhego sa motho a bo a ntsha katlholo, e seng go ya ka se se tlhalositsweng mo kgetsing eo mme e le go ya ka gore a o rata motho yoo kgotsa ga a mo rate.” Modimo ga a tseye sefatlhego sa motho yo mongwe mme a bo a gana sa yo mongwe ka ntlha ya setso, setšhaba, boemo kgotsa mabaka ape fela a a bonalang.

Go na le moo, Jehofa o bona se se leng mo pelong. (1 Samuele 16:7; Diane 21:2) Go tswa foo Petere o ne a re: “Mo setšhabeng sengwe le sengwe motho yo o mmoifang a ba a dira tshiamo o a amogelesega mo go ene.” (Ditiro 10:35) Go boifa Modimo go kaya go mo tlotla le go mo ikanya mme o tila sepe fela se se ka mo kgopisang. Go dira tshiamo go akaretsa go ikemisetsa go dira se se siameng mo matlhong a Modimo. Jehofa o rata motho yo pelo ya gagwe e nang le poifo e e mo tlhotlheletsang go dira se se siameng.—Duteronome 10:12, 13.

Fa e le gore o kile wa tlhaolwa, o na le mabaka a a utlwalang a go tsaya tsia se Petere a se buileng ka Modimo. Jehofa o gogela batho ba ditšhaba tsotlhe mo kobamelong ya boammaaruri. (Johane 6:44; Ditiro 17:26, 27) O reetsa le go araba dithapelo tsa baobamedi ba gagwe go sa kgathalesege gore ke ba lotso lofe, setšhaba sefe kgotsa ba na le boemo bofe. (1 Dikgosi 8:41-43) Re ka tlhatswega pelo gore fa Jehofa a re leba a le kwa legodimong, o bona lotso lo le longwe fela—batho. A o tlhotlheletsega go ithuta mo go oketsegileng ka Modimo yono yo o se nang tlhaolele?