Go na le boporofeti jo bontsi mo Baebeleng. Ga go ope yo o ka bolelelang pele isagwe. Ka jalo, go diragadiwa ga boporofeti jo bo mo Baebeleng ke bosupi jwa gore Baebele ke Lefoko la Modimo.—Bala Joshua 23:14; 2 Petere 1:20, 21.

Boporofeti jwa Baebele jo bo setseng bo diragaditswe bo dira gore re nne le lebaka la go dumela mo Modimong. (Bahebera 11:1) Bo re tlhomamisetsa gore ditsholofetso tsa Modimo tsa mo nakong e e tlang di tla diragadiwa. Ka jalo, boporofeti jwa Baebele bo dira gore re nne le tsholofelo ya mmatota.—Bala Pesalema 37:29; Baroma 15:4.

Boporofeti jo bongwe bo a re tlhagisa gore re tseye kgato. Ka sekai, fa Bakeresete ba bogologolo ba bona boporofeti bongwe bo diragadiwa, ba ne ba tswa kwa Jerusalema. Moragonyana, fa motse o ne o senngwa ka gonne bontsi jwa batho bo ganne go amogela Jesu, Bakeresete ba ne ba ya kwa lefelong le le kgakala e bile le sireletsegile.—Bala Luke 21:20-22.

Boporofeti jo bo setseng bo diragaditswe bo bontsha gore mo nakong e e sa fediseng pelo, Bogosi Jwa Modimo bo tla fedisa magosi le dipuso tsa batho. (Daniele 2:44; Luke 21:31) Ka jalo, go potlakile gore mongwe le mongwe a tseye kgato gone jaanong gore a amogelwe ke Jesu Keresete, Kgosi e e tlhomilweng ke Modimo.—Bala Luke 21:34-36.