NNANG LO DISITSE!
Goreng Go se Na Kagiso?—Baebele e a Reng?
Baeteledipele ba dipolotiki le mekgatlho ya lefatshe, ga e kgone go dira gore go nne le kagiso. Fa e sale go tloga ka Ntwa ya Bobedi ya Lefatshe, gompieno go na le dintwa tse dintsi mo lefatsheng go feta le fa e leng pele. Batho ba ka nna dibilione di le pedi, mo e ka nnang kwatara ya palo ya batho mo lefatsheng lotlhe, ba amilwe ke dintwa.
Goreng batho ba sa kgone go dira gore go nne le kagiso? Baebele e a reng?
Mabaka a le mararo a go bo batho ba sa kgone go tlisa kagiso
1. Batho ba na le mekgwa e e dirang gore ba se ka ba tsaya matsapa a go dira kagiso le ba bangwe. Baebele e ile ya bolelelapele gore mo motlheng wa rona, “batho ba tla ikakanyetsa ba le bosi, ba rata madi, ba ikgantsha, ba le mabela . . . ba sa ikanyege, . . . ba sa batle go dumalana le ba bangwe ka sepe, . . . ba sa ithibe mo go sepe, ba le bogale jo bo tshabegang, . . . ba le tlhogoethata, ba ikgogomosa.”—2 Timotheo 3:2-4.
2. Batho ga ba kgone go rarabolola mathata a ba nang le one kwa ntle ga thuso ya Mmopi wa bone e bong Jehofa a Modimo. Baebele e tlhalosa gore “motho ga a kgone go kaela botshelo jwa gagwe.”—Jeremia 10:23.
3. Lefatshe le laolwa ke mmusi yo o maatla le yo o bosula e bong Satane Diabolo, yo o “tsietsang lefatshe lotlhe.” (Tshenolo 12:9) Fa fela “lefatshe lotlhe le [tswelela le] laolwa ke Satane,” go tla tswelela go nna le dintwa le dikgotlhang.—1 Johane 5:19.
Ke mang yo o ka dirang gore go nne le kagiso?
Baebele e a re Modimo ke ene fela yo o ka dirang gore go nne le kagiso, e seng batho.
“‘Ke itse sentle se ke lo se batlelang, ke batla go lo naya kagiso e seng masetlapelo, e bile ke batla go lo naya bokamoso le tsholofelo,’ go bua Jehofa.”—Jeremia 29:11.
Modimo o tla diragatsa jang tsholofetso eo? “Modimo yo o nayang kagiso o tla tšhwetla Satane.” (Baroma 16:20) Modimo o tla dirisa puso ya gagwe e Baebele e e bitsang “Bogosi Jwa Modimo,” go dira gore go nne le kagiso mo lefatsheng lotlhe. (Luke 4:43) Fa Kgosi ya Bogosi Jwa Modimo Jesu Keresete a busa, batho ba tla rutiwa go tshela ka kagiso.—Isaia 9:6, 7.
Go ithuta mo go oketsegileng bala setlhogo se se reng “Bogosi Jwa Modimo bo Tla Fitlhelela Eng?”
a Jehofa ke leina la Modimo.—Pesalema 83:18.
Tse Dingwe Tse O ka Di Kgatlhegelang
DIKARABO TSA DIPOTSO TSA BAEBELE
Kagiso mo Lefatsheng—Ke Eng Fa go Le Thata Jaana go e Bona?
Matsapa a batho ba a tsereng go lere kagiso mo lefatsheng a retetse. Sekaseka mabaka a le mmalwa.
DIKARABO TSA DIPOTSO TSA BAEBELE
Kagiso mo Lefatsheng—E Tla Tla Jang?
Utlwa kafa Modimo a solofetsang go tlisa kagiso ka teng mo lefatsheng ka Bogosi jwa gagwe.
DITHUTO TSA BOTLHOKWA TSA BAEBELE
Bogosi Jwa Modimo ke Eng?
Fa Jesu a ne a le mo lefatsheng, selo sa konokono se a neng a ruta batho ka sone e ne e le Bogosi Jwa Modimo. Batho ba le bantsi ga ba bolo go rapelela gore Bogosi jono bo tle.
KA GA RONA
Kopa Thuto ya Baebele ya Mahala
Tlotlang ka potso nngwe ya Baebele kgotsa ithute mo go oketsegileng ka Basupi ba ga Jehofa.
