Fa motsamaisimogolo wa United Nations e bong António Guterres a bua ka go tlhaselwa ga Israel ke Iran ka Lamatlhatso April 13, 2024 o ile a re, “eno ke nako ya go rarabolola dilo. Ke nako ya go bontsha boikgapo.”

 Ntwa e e kwa Botlhabagare ke nngwe ya dintwa tse dintsi tse di leng gone mo lefatsheng.

 “Fa e sa le ka ntwa ya lefatshe ya bobedi, go na le dintwa di le dintsi thata go feta le fa e le leng pele .”​—United Nations Security Council, January 26, 2023.

 Dinaga tse di amegang mo ntweng eno ke Israel, Gaza, Syria, Azerbaijan, Ukraine, Sudan, Ethiopia, Niger, Myanmar, le Haiti. a

 Dintwa tseno di tla fela leng? A baeteledipele ba lefatshe ba ka dira gore go nne le kagiso? Baebele e a reng ka seno?

 Dikgotlhang tse di mo lefatsheng di supa gore go gaufi gore dintwa di fele. Dintwa tseno di diragatsa boporofeti jwa Baebele jo bo ka ga malatsi a re tshelang mo go one. Baebele e a re ke “malatsi a bofelo.”​—Mathaio 24:3.

•   “Lo tlile go utlwalela ka dintwa le dipego tsa dintwa. . . . Setšhaba se tla tlhasela setšhaba se sengwe le bogosi bo tla tlhasela bogosi jo bongwe.”​—Mathaio 24:6, 7.

 Bala setlhogo se se reng “Sesupo sa ‘Metlha ya Bofelo’ Kgotsa sa “Bokhutlo” ke Eng?” go bona gore dintwa di diragatsa jang boporofeti jwa Baebele.

 Baebele e bolelelapele gore dikgotlhang di tla fela. Seo se tla direga jang? Seo ga se na go direga ka maatla a batho mme se tla direga ka Aramagedona e leng, “ntwa ya letsatsi le legolo la Modimo Mothatayotlhe.” (Tshenolo 16:14, 16) Ntwa eno e tla dira gore Modimo a kgone go diragatsa maikaelelo a gagwe a gore batho ba itumelele kagiso e e nnelang ruri.​—Pesalema 37:10, 11, 29.

 Go ithuta mo go oketsegileng ka ntwa ya Modimo e e tla fedisang dintwa tsotlhe bala setlhogo se se reng “Ntwa ya Haramagedona ke Eng?”