•   “China e begile gore mo ngwageng ono e nnile le paka ya selemo e e mogote thata,’ mme ke lekgetlo la boraro naga eo e omelela ka tsela eo.”​—The Guardian, September 7, 2022.

•   “E tla bo e le dingwaga di le tlhano tse di latelanang dikarolo dingwe tsa Afrika di nna le leuba le le tseneletseng.”​—UN News, August 26, 2022.

•   “Go na le matshosetsi a gore karolo ya Yuropa e e fetang halofo e tlhaselwe ke leuba, mme go ka direga gore leuba leo e nne lone le le maswe thata mo dingwageng di le 500.”​—BBC News, August 23, 2022.

 Babatlisisi ba le bantsi ba fopholetsa gore leuba le tla tswelela le le gone e bile le tla nna maswe le go feta. A go na le tsholofelo ya gore dilo di tla siama mo nakong e e tlang? Baebele e a reng ka gone?

 Baebele e ne ya bolelela pele jaana ka motlha o re tshelang mo go one:

•   “Go tla nna le . . . ditlhaelo tsa dijo . . . mo mafelong ka go latelana.”​—Luke 21:11.

 Gantsi leuba le baka ditlhaelo tsa dijo. Fa go nna le ditlhaelo tsa dijo, batho ba a boga e bile ba a swa, mme seo se diragatsa boporofeti jwa Baebele.​—Tshenolo 6:6, 8.

 Baebele e tlhalosa lebaka la konokono la go bo leuba le gakala. E a re:

•   “Motho ga a kgone go kaela botshelo jwa gagwe.”​—Jeremia 10:23.

 Seno se raya gore batho ga ba ka ke ba kgona ‘go ikaela mo botshelong’ kgotsa go ipusa. Ditshwetso tsa bone tse di sa siamang gantsi di baka lebua le go tlhaela ga metsi.

•   Baitsesaense ba le bantsi ba dumela gore dilo tse batho ba di dirang di bakile go gotela ga moya o o mo loaping, mme seo se dirile gore leuba le oketsege mo lefatsheng lotlhe.

•   Dilo tse di dirwang ke batho ba ba pelotshetlha le ba ba bayang melao ba sa akanye ka bokamoso, di baka go senngwa ga dikgwa, go kgotlelwa ga moya le tikologo le go sa dirisiweng sentle ga dilo tsa tlholego. Ka ntlha ya seo, re ka feleletsa re se na metswedi ya metsi.

 Le fa go ntse jalo, Baebele e re naya tsholofelo.

 Baebele e re solofetsa gore Modimo o tla rarabolola mathata a re nang le one a go tlhaela ga metsi. O tla dira seo jang?

1.  1. Modimo o tla ‘senya ba ba senyang lefatshe.’ (Tshenolo 11:18) O tla tlosa sengwe sa dilo tse di bakang go tlhaela ga metsi, e leng badirabosula ba ba pelotshetlha, ba ba senyang tikologo ka ditiro tsa bone.​—2 Timotheo 3:1, 2.

2.  2. “Mmu o o omeleditsweng ke mogote o tla nna jaaka mogobe o o tletseng lotlhaka.” (Isaia 35:1, 6, 7) Modimo o tla baakanya tshenyo e e bakilweng ke leuba a bo a fetola lefatshe leno gore e nne paradaise e e nang le metsi a mantsi.

3.  3. “O tlhokomela lefatshe, o dira gore le ungwe thata e bile o a le nontsha.” (Pesalema 65:9) Modimo o tla segofatsa lefatshe gore le ntshe dijo tse dintsi tse di siameng le gore batho botlhe ba nne le metsi a a phepa.