A o mongwe wa batho ba le dimilione ba ba amilweng ke maemo a bosa a a bakang tshenyo? Maemo a bosa a a kotsi a baka tshenyo ka ditsela tse dintsi tse di farologaneng. Gantsi ditsuatsue le dikgwanyape di dira gore go nne le dipula tsa matlakadibe, merwalela kgotsa diphefo tsa matsubutsubu tse di senyang. Dipula tsa matlakadibe di ka dira gore mmu o gogole matlo le ditsela mme diphefo tsa matsubutsubu di ka baka dikgadima tse di ka dirang gore go nne le melelo e e fisang dikgwa. Komelelo, mogote o o feteletseng le serame sa mariga se se maatla le tsone di ka baka mathata.

 Gompieno maemo a bosa a a bakang tshenyo e kgolo mo lefatsheng a a anama e bile a nna maswe le go feta. Pego ya International Federation of Red Cross and Red Crescent Societies e a re: “Go oketsega ga merwalela, dipula tsa matlakadibe le komelelo go dira gore batho ba bantsi ba amiwe ke masetlapelo a tlholego. Ka jalo batho ba le bantsi ba latlhegelwa ke matshelo a bone le magae e bile ba bangwe ba felelwa ke ditiro.”

 Fa dilo tseo di direga, batho ba utlwa botlhoko ka gonne ba senyegetswe ke dithoto le magae e bile ba tlhokafaletswe ke batho ba ba ba ratang.

 Fa e le gore o kile wa amiwa ke maemo a bosa a a bakang tshenyo, Baebele e ka go thusa. E a gomotsa, e dira gore re nne le tsholofelo e bile e na le dikgakololo tse di thusitseng batho ba le bantsi ba ba amilweng ke maemo a bosa a a bakang tshenyo. (Baroma 15:4) Gape e araba dipotso tse di botlhokwa tse batho ba le bantsi ba ipotsang tsone, tse di jaaka: Goreng Modimo a letlile seno gore se direge? A ke otlhaiwa ke Modimo?

 Baebele e a re Modimo ga se ene a dirang gore batho ba welwe ke mathata a a dirang gore ba boge. E re tlhomamisetsa gore “Modimo ga a ka ke a lekwa ka dilo tse di bosula, le gone ene ka boene ga a leke ope.” (Jakobe 1:13) Seno se raya gore ga se ene a dirang gore go nne le maemo a bosa a a bosula a a amang batho gompieno.

 Gone Baebele e bua ka dinako dingwe tsa fa Modimo a ne a dirisa maatla a tlholego go otlhaya batho ba ba bosula. Mme ditiragalo tseo, di ne di sa tshwane le maemo a bosa a gompieno a a bakang tshenyo, a a welang batho ba ba siameng le ba ba sa siamang e bile a ba wela ka tshoganyetso. Go farologana le seo, dipego tsa Baebele di bontsha gore ka dinako tsotlhe Modimo o ne a tlhagisa batho go sa le gale, a sireletsa batho ba ba se nang molato, e bile a tlhalosa lebaka la go bo a otlhaya batho ba ba bosula. Ka sekai, Modimo o ne a tlhalosa lebaka la go bo a ne a tlisa Morwalela ka motlha wa ga Noa, go tswa foo o ne a tlhagisa batho go sa ntse go na le nako, a bo a sireletsa Noa le lelapa la gagwe.​—Genesise 6:13; 2 Petere 2:5.

 Fa o batla go itse gore ke eng fa re re masetlapelo a tlholego a a diregang gompieno ga se kotlhao e e tswang kwa Modimong, bona setlhogo se se reng “Baebele ya Reng ka Masetlapelo a Tlholego?”

 Baebele e a re Jehofa a Modimo o a re kgathalela e bile o utlwa botlhoko fa re diragalelwa ke dilo tse di bosula. Akanya ka ditemana tseno tse di gomotsang:

•   Isaia 63:9: “Ka dinako tsa fa ba le mo matshwenyegong, [Modimo] le ene o ne a tshwenyega.”

   Se e se kayang: Jehofa o utlwa botlhoko fa a bona batho ba boga.

•   1 Petere 5:7: “O a [re] kgathalela.”

   Se e se kayang: Jehofa o batla gore re itumelele botshelo re sa tshwenngwe ke sepe.

 E re ka Jehofa a re kgathalela e bile a re tlhomogela pelo, o re gomotsa a dirisa kgakololo e e mo Baebeleng le tsholofelo ya mmatota ya gore mo nakong e e tlang go tla bo go se na mathata a a bakwang ke maemo a bosa a a bosula.​—2 Bakorintha 1:3, 4.

 Baebele e a re Jehofa o batla go re “naya bokamoso le tsholofelo.” (Jeremia 29:11) Jehofa ga a itumelele go bona re tshela re tshogile ka ntlha ya maemo a bosa, mme o batla gore re tshele re itumetse ka nako ya fa a tla bo a dira lefatshe gore e nne paradaise.​—Genesise 1:28; 2:15; Isaia 32:18.

 Modimo o tla tlisa diphetogo tseo a dirisa Bogosi jwa gagwe, e leng puso ya kwa legodimong e e eteletsweng pele ke Jesu. (Mathaio 6:10) Jesu o na le botlhale le maatla a go thibela masetlapelo a a bakwang ke maemo a bosa. Fa Jesu a ne a le mo lefatsheng, o ne a bontsha gore o na le maatla a go laola maemo a bosa. (Mareko 4:37-41) Fa Jesu a busa mo lefatsheng o tla busa ka temogo le botlhale mme o tla ruta batho go tlhokomela lefatshe le go tshela sentle mo go lone. (Isaia 11:2) Ka jalo, batho ga ba kitla ba tlhola ba amiwa ke maemo a bosa a a bakang tshenyo.

 O ka tswa o ipotsa jaana: ‘Jesu o tla dirisa maatla a gagwe leng go laola maemo a bosa?’ Go bona karabo ya potso eno, bala setlhogo se se reng, “Bogosi Jwa Modimo bo Tla Busa Leng mo Lefatsheng?”

 Baebele e ka go naya kgakololo e e ka go thusang go lebana le maemo a bosa a a bosula pele ga a direga, ka nako ya fa a direga le fa a sena go direga.

•   Pele ga a direga: Ipaakanyetse go tsaya kgato ka bonako.

   Se Baebele e se buang: “Yo o botlhale o bona kotsi a bo a iphitlha, mme yo o se nang maitemogelo o tswelela a tsamaya a bo a tlelwa ke ditlamorago tse di botlhoko.”​—Diane 22:3.

   Se e se kayang: Akanya ka masetlapelo a a ka diregang mo lefelong le o nnang mo go lone gore o itse se o tla tlhokang go se dira ka potlako le gore o ka sireletsa ba lelapa la gago jang.

   Maitemogelo: “Go ipaakanyetsa masetlapelo go sa le gale go ile ga re thusa go falola melelo. Re ne re na le dibeke tsa maemo a tshoganyetso tse di tsentseng dilo tse di botlhokwa go akaretsa melemo le diaparo. Batho ba bangwe ba ne ba tshogile e bile ba sa itse gore ba dire eng. Ke itumelela gore ka nako eo, rona re ne re na le sengwe le sengwe se re se tlhokang!”​—Tamara wa kwa California, U.S.A.

•   Ka nako ya fa a direga: Akanya thata ka dilo tse di botlhokwa.

   Se Baebele e se buang: “Tota le fa motho a na le dilo tse dintsi, botshelo jwa gagwe ga bo a ikaega ka dilo tse a nang le tsone.”​—Luke 12:15.

   Se e se kayang: Botshelo bo botlhokwa thata go gaisa dithoto.

   Maitemogelo: “Fa Setsuatsue sa Lawin b se ne se senya ntlo ya rona, ke ne ke sa itse gore ke dire eng. Mme se se botlhokwa se ke ileng ka se dira ke go rapela Jehofa Modimo ka tlhoafalo. Ke ne ka lemoga gore dithoto tse di re latlhegetseng di ne di se botlhokwa thata, se se botlhokwa ke gore re ne re sa ntse re tshela.”—Leslie wa kwa Philippines.

•   Fa a sena go direga: O se ka wa akanya thata ka dilo di le dintsi.

   Se Baebele e se buang: “Lo se ka lwa tlhobaela ka letsatsi le le latelang, ka gonne letsatsi le le latelang le tla nna le ditlhobaelo tsa lone.”​—Mathaio 6:34.

   Se e se kayang: O se ka wa tshwenyega thata ka dilo tse o akanyang gore di ka direga mo nakong e e tlang.

   Maitemogelo: “Fa Setsuatsue sa Irma se sena go dira gore metsi a tlale mo ntlong ya me, ke ne ka tshwanelwa ke go dira ditshwetso di le dintsi thata mme seo se ne sa ntlhakanya tlhogo. Ke ne ka leka ka bojotlhe go dirisa kgakololo ya Baebele e e reng re se ka ra tlhobaela thata. Ke ne ka lemoga gore ka thuso ya ga Jehofa ke kgona go lebana le mathata go feta kafa ke neng ke akanya ka gone.”—Sally wa kwa Florida, U.S.A.

 Go bona dikakantsho tse di ka go thusang, bala setlhogo se se reng “Fa go Nna le Masetlapelo​—Se se Ka Dirwang go Boloka Matshelo.”