Basupi ba ga Jehofa ba dirisa dibidio le dikgatiso tse di fitlhelwang mo Internet go feta ka nako epe fela. Mme mo dikarolong tse di farologaneng tsa lefatshe, Internet e a tura ka jalo, bakaulengwe ba rona ga ba kgone go nna le yone. Ba bangwe ba nna mo mafelong a Internet e leng bonya, e sa berekeng ka metlha kgotsa a a se nang Internet gotlhelele.

 Le fa go ntse jalo, gone jaanong bakaulengwe le bokgaitsadi ba rona ba le bantsi ba kgona go itseela dikgatiso ba sa dirise Internet. Ba kgona jang?

 Diphuthego tse di se nang Internet di newa lebokoso le lennye le le bidiwang JW Box. Le na le sedirisiwa se se rekilweng kwa khampaning nngwe le dikgatiso le dibidio tse di mo jw.org tse di tsentsweng ke Lefapha la Dikhomputara kwa Bethele. Lebokoso le le lengwe le ka ja R1 073,20.

 Fa bakaulengwe ba le kwa Holong ya Bogosi ba gokaganya didirisiwa tsa bone tsa ileketeroniki le JW Box ba bo ba itseela dikgatiso le dibidio. Tota le fa motho a na le didirisiwa tsa ileketeroniki tse di sa jang madi a mantsi kgotsa di le dikgologolo, o sa ntse a ka kgona go itseela dibidio le dikgatiso mo JW Box. Jaanong fa e le gore phuthego ga e na Internet, JW Box e tsaya kae dibidio le dikgatiso tsa bosheng? Ofisi ya lekala e romela di-USB kwa diphuthegong ka metlha gore di kgone go tsenya dikgatiso le dibidio tse disha tse di mo jw.org mo JW Box. USB e le nngwe e ja R57,24.

 JW Box e thusitse bakaulengwe ba rona jang? Nathan Adruandra, yo o nnang kwa Democratic Republic of Congo, a re: “Ke lekile makgetlonyana go itseela dibidio tsa ‘Jehofa, . . . Ke Ikantse Wena’ le ya Gakologelwa Mosadi wa ga Lote. Mme ga ke a kgona, ke bo ke kgobega marapo. Gone jaanong ke kgona go tsenya dibidio tseno mo founong ya me, e bile re kgona go ruta bana ba rona ka tsone.”

 Mokaulengwe mongwe yo o thusang diphuthego kwa Nigeria go dirisa JW Box a re: “Bakaulengwe ba tsaya JW Box e le mpho e e tswang kwa go Jehofa. Ba itumelela gore gone jaanong ba kgona go itseela dikgatiso le dibidio mo Lebokosong la Rona la go Ruta motlhofo fela.”

 Palo ya mabokoso a a setseng a romeletswe bakaulengwe ba rona mo Afrika, kwa Oceania le South America e feta 1 700 gape go setse go dirilwe dithulaganyo tsa go romelela diphuthego tse dingwe mabokoso ano. Madi a go dira jaana a tswa kae? Mo meneelong e e ntshediwang go tshegetsa tiro ya lefatshe lotlhe, e e ntshiwang mo donate.pr418.com. Re lebogela meneelo e lo e ntshang ka bopelotshweu.