Go simolola ka September, Bukana ya Botshelo le Bodiredi e tla akaretsa mofuta o mosha wa dipuisano tse re ka di dirisang tsa setlhogo se se reng, “Ruta Boammaaruri.” Boikaelelo jwa sone e tla bo e le go re tlhotlheletsa go rerela batho molaetsa o mokhutshwane, re dirisa potso le temana.

Fa re bona e kete motho o na le kgatlhego, re ka thaya motheo wa loeto lwa go boela ka go mo tlogelela kgatiso nngwe kgotsa go mmontsha bidio nngwe e e mo jw.org. Re tshwanetse go lwela go boela kwa mothong ka bonako jo bo ka kgonegang go tsweledisa motlotlo. Dipuisano tseno le dikabelo tsa baithuti di tla bo di theilwe mo bukeng ya Baebele e Ruta Eng. Kwa bofelong jwa kgaolo nngwe le nngwe go na le lebokose le le nang le dipotso le ditemana tse di ka re thusang go dira loeto lwa go boela kgotsa go tshwara thuto re dirisa Baebele fela.

Go na le tsela e le nngwe fela e e isang botshelong. (Mat 7:13, 14) E re ka re bua le batho ba ba farologanang ka bodumedi le maemo a botshelo, re tshwanetse go ba bontsha gore boammaaruri jo bo mo Baebeleng bo ba ama jang ka tlhamalalo. (1Ti 2:4) Fa re ntse re itlwaelanya le go rera re dirisa ditlhogo tse di farologaneng mo Baebeleng le go tokafatsa bokgoni jwa rona jwa go ‘tshwara lefoko la boammaaruri sentle,’ re tla itumela le go feta gape re tla atlega mo go ruteng batho boammaaruri.—2Ti 2:15.