Jesu o ne a laela barutwa ba gagwe gore ba tsamaye ba ye go dira batho barutwa. (Mat 28:19) Go dira batho barutwa go akaretsa go ba rerela le go ba ruta. Re tshwanetse go nna re ipotsa gore, ‘Nka tokafatsa jang tsela e ke dirang tiro ya go dira barutwa ka yone?’

Ga re a tshwanela go emela gore batho ba tle kwa go rona, re tshwanetse go ya go batla batho ‘ba ba tshwanetseng.’ (Mat 10:11) Fa o le mo bodireding, a o leka ka natla go rerela mongwe le mongwe yo o kopanang le ene? (Dit 17:17) Lidia o ile a nna morutwa ka gonne moaposetoloi Paulo o ne a rerela mongwe le mongwe.—Dit 16:13-15.

LEBA BIDIO YA TSWELELA O RERA O “SA KGAOTSE”—RERELA BATHO LE FA O SE MO BODIREDING LE KA NTLO LE NTLO, GO TSWA FOO ARABA DIPOTSO TSE DI LATELANG:

• Obakeng o ne a dira eng letsatsi le letsatsi go bontsha gore o jala peo ya boammaaruri?

• Goreng re tshwanetse go rera gongwe le gongwe kwa re kopanang le batho gone?

• Ke bomang ba o ka ba rerelang fa o ntse o tsweletse ka ditiro tsa letsatsi le letsatsi?

Fa re batla go dira batho barutwa, ga re a tshwanela go ba tlogelela dikgatiso fela. Re tshwanetse go boela kwa go bone le go ba tshwarela dithuto tsa Baebele gore ba kgone go itse Modimo. (1Bak 3:6-9) Le fa go ntse jalo, re tshwanetse go dira eng fa re lekile go ruta motho Baebele mme go bonala a sa dire diphetogo ka bonako? (Mat 13:19-22) Re tshwanetse go nna re batla batho ba dipelo tsa bone di tshwanang le ‘mmu o o molemo.’—Mat 13:23; Dit 13:48.

LEBA BIDIO YA TSWELELA O RERA O “SA KGAOTSE”—RERA PHATLALATSA MME O DIRE BARUTWA, GO TSWA FOO ARABA DIPOTSO TSE DI LATELANG:

• Nkhumisang le Dimakatso ba ile ba jala peo ya boammaaruri jang mo pelong ya ga Kaone le Abueng?

• Boikaelelo jwa rona e tshwanetse go nna eng fa re rerela batho, go akaretsa le fa re rera ka dikolotsana?

• Re ka dira eng gore go tshwara dithuto tsa Baebele e nne selo sa botlhokwa mo matshelong a rona?