A o na le dingwaga di le 23 go ya go di le 65 e bile o le mo tirelong ya nako e e tletseng? A o na le botsogo jo bo siameng, e bile a o ka kgona go direla kwa go nang le tlhokego e ntsi gone? Fa e le gore o arabile dipotso tseno ka ee, a o ile wa akanyetsa go ikwadisetsa Sekolo sa Baboledi ba Bogosi? Fa e sa le ka tlelase ya ntlha, banyalani, bakaulengwe ba ba sa nyalang le bokgaitsadi ba ba sa nyalwang ba ntse ba ikwadisetsa sekolo seno. Mme gone, re tlhoka bakaulengwe ba bantsi ba ba sa nyalang mo sekolong seno. Kopa Jehofa a go thuse gore o mo direle mo go oketsegileng le gore o etse Morwawe. (Pes 40:8; Mat 20:28; Bah 10:7) Go tswa foo, leka go bona gore o na le maikarabelo afe a o tlhokang go a dira a a jaaka go tlhokomela lelapa, tiro kgotsa dikoloto. Mme fa di le teng, o ka dira diphetogo dife gore o tshwanelegele go ya sekolong seno?

Fa ba sena go aloga mo Sekolong sa Baboledi ba Bogosi ke ditiro dife tse ba ka di dirang? Bangwe ba bone ba romelwa go ya go direla kwa go buiwang dipuo tse dingwe gone kgotsa go dira tiro e e kgethegileng ya go rera phatlalatsa mo ditoropong. Moragonyana ba bangwe ba direla jaaka balebedi ba potologo ba nakwana, balebedi ba potologo kgotsa barongwa. Fa o ntse o akantse ka ditiro tse o ka di dirang mo tirong ya ga Jehofa, nna o gopotse mafoko a ga moporofeti Isaia fa a ne a re: “Ke fano! Roma nna!”—Isa 6:8.

LEBANG BIDIO YA BARONGWA—BADIRI MO THOBONG, LO BO LO ARABA DIPOTSO TSE DI LATELANG:

• Barongwa ba tlhopiwa jang?

• Barongwa ba dira tiro efe e e botlhokwa?

• Barongwa ba itumelela masego afe?