Ke mathata afe a o kopanong le one letsatsi le letsatsi? A o tlhogo ya lelapa mme o na le maikarabelo a mantsi a o lekang go a dira? A ke wena fela motsadi mo lelapeng mme o leka go tlamela ba lelapa la gago? A o mosha yo o kgerisiwang ke ba bangwe kwa sekolong? A o leka go itshokela bolwetse kgotsa manokonoko a botsofe? Mongwe le mongwe o na le mathata. Bakeresete ba le bantsi ba mekamekana le mathata a le mantsi ka nako e le nngwe. Mme re a itse gore go ise go ye kae, Jehofa o tla re golola mo mathateng ao.—2Bak 4:16-18.

Gone jaanong, re gomodiwa ke go itse gore Jehofa o tlhaloganya mathata a rona mme o itumelela go re bona re ikanyega e bile re itshoka. Gape re gomodiwa ke go itse gore Jehofa o tla re segofatsa thata. (Jer 29:11, 12) Jesu le ene o a re rata e bile o re tsaya re le botlhokwa. Fa re ntse re diragatsa maikarabelo a rona, a Bakeresetse ba tshwanetseng go a dira, re tlhatswegile pelo ka mafoko a ga Jesu a a reng: “Ke na le lona.” (Mat 28:20) Fa re ipha nako ya go akanya thata ka kgololesego ya mo isagweng e e tla nnang gone fa Bogosi Jwa Modimo bo busa, tsholofelo ya rona e tla nonofa e bile re tla ikemisetsa go itshokela mathata a rona.—Bar 8:19-21.

LEBANG BIDIO YA FA SETSUATSUE SE NTSE SE ATAMELA, TSWELELA O TSEPAMISITSE MOGOPOLO MO GO JESU!—MASEGO A BOGOSI, LO BO LO ARABA DIPOTSO TSE DI LATELANG:

• Go tlile jang gore batho ba kgaogane le Modimo mme seo se ile sa dira gore go nne le diphelelo dife?

• Batho ba ba ikanyegang mo go Jehofa ba tla nna le isagwe e e ntseng jang?

• Go tla jang gore go nne le isagwe e e itumedisang jalo?

• Ke masego afe a o letetseng go a bona kwa lefatsheng le lesha?